નીરસ / અક્ષય તૃતીયામાં ગ્રાહકોને ગોલ્ડના ભાવે દઝાડયા, ઓફર ઉપરથી ડિસ્કાઉન્ટ છતાં સોનું ઓછું વેચાયું, જુઓ કેવું રહ્યું બજાર

• અક્ષય તૃતીયાના દિવસે સોનુ ખરીદવા ગ્રાહકો નીરસ
• વધુ સોનુ વેંચાવાની વેપારીઓને સોનેરી આશા ઠગારી નીવડી
• ગત વર્ષની સરખામણીમાં 50 ટકા ખરીદી અને વ્યાપાર ઓછો થયો

અક્ષય તૃતીયાના દિવસે સોનુ ખરીદવાની વર્ષો જુની પરંપરા છે. આથી સ્વાભાવિક છે આ અવસરે સોનુ વેંચાવાની વેપારીઓને સોનેરી આશા હોય છે. પરંતુ આ આશા હાલ ઠગારી નીવડી હોય તેમ સોનાની ખરીદી અપેક્ષા કરતા ઘરાકી ખૂબ ઓછી જોવા મળી હતી.સોની બજારમા લોકોની અવરજવર મોટાપાયે જોવા મળી હતી. ભાવવધારા ઉપરાંત અનેક પ્રતિકુળતાને પગલે લોકે ઘરેણાં ખરીદવાને બદલે અન્ય વસ્તુઓ ખરીદવામા રસ દાખવ્યો હતો. લોકોએ સોનાના સિક્કા સહિતની નાની વસ્તુઓ ખરીદી સંતોષ માન્યો હતો. એક અંદાજ એવો પણ હતો કે આ વર્ષે અક્ષય તૃતીયા પર સોનાનું વેચાણ 20 ટકા ઓછું રહી શકે છે.

સોનાના સિક્કા, નાની ચીજો ખરીદી
એક અંદાજ મુજબ ચાલુ વર્ષે અક્ષય તૃતીયાના અવસરે ગત વર્ષની સરખામણીમાં 50 ટકા ખરીદી અને વ્યાપાર ઓછો થયો છે. મોટાભાગના ગ્રાહકોએ દાગીના કરતા સોનાના સિક્કા, નાની ચીજો ખરીદી હતી એટલે કે લોકોએ રોકાણ માટે સોનુ ખરીધ્યું હતું. બીજી તરફ, જ્વેલરી ખરીદવા પર પ્રથમ મેકિંગ ચાર્જમાં મોટી રકમ ખર્ચવામાં આવે છે જેથી લોકોએ નાની વસ્તુ ખરીદી હતી.

મેકિંગ ચાર્જીસ પર ડિસ્કાઉન્ટ

દિલ્હીમાં જ 250 કરોડ રૂપિયાના ટર્નઓવરનો અંદાજ છે. વેચાણ ઘટવાનું મુખ્ય કારણ તોલા દીઠ એટલે કે 10 ગ્રામ સોનાની કિંમત 60 હજાર રૂપિયાથી વધુ છે, ગત વર્ષે આ જ કિંમત 50 હજાર રૂપિયા હતી. આવી સ્થિતિમાં, 20 ટકા વધુ કિંમતે મોંઘા દાગીના ખરીદવાનું લોકો માંડી વાળ્યું હતું. અક્ષય તૃતીયાના અવસર પર, ઘણા જ્વેલર્સે ગ્રાહકો દ્વારા સોનાની ખરીદી માટે મેકિંગ ચાર્જીસ પર ડિસ્કાઉન્ટ પણ આપ્યું હતું. છતાં પણ ગ્રાહકોએ જ્વેલરી ખરીદવામાં વધુ રસ દાખવ્યો ન હતો, તો કેટલાક ગ્રાહકોએ ડિજિટલ સોનું ખરીદવામાં પણ રસ દાખવ્યો છે. નોંધનીય છે કે તુર્કી, ભારત, ઉઝબેકિસ્તાન સોનાના સૌથી મોટા ખરીદદાર હતા. તાજેતરમાં જાહેર થયેલા આકડા અનુસાર વિશ્વના કુલ સોનાના 8 ટકા ભંડાર ભારતમાં છે. જેમાં પણ ચાલુ વર્ષે ભારતના ગોલ્ડ રિઝર્વમાં 10 થી 12 ટકાનો ઉછાળો જોવા મળી શકે છે. અંદાજ એવો પણ છે કે ભારતમાં આશરે 25 હજારથી 27 હજાર ટન સોનું છે. સાથે જ દેશના મંદિરો પાસે 3 હજારથી 4 હજાર ટન સોનું હોવાનો અંદાજ લગાવાઈ રહ્યો છે.