દુર્ઘટના / સુરત અને વડોદરામાં આગના બનાવો, કોઈ જાનહાની નહી, કાપડની ફેક્ટરી, પ્લાયવુડનો શોરૂમ બળીને ખાખ

• પીપોદરા GIDCની સુખવીલાસ કાપડની કંપનીમાં લાગી આગ
• વડોદરાના આજવા વિસ્તારની હાર્ડવેરની દુકાનમાં આગ
• હાર્ડવેર શોરૂમમાંથી 30 દુકાનોમાં આગ ફેલાઈ

સુરતના પીપોદરા GIDC પાસેની કંપનીમાં આગ લાગી હતી. કામરેજ પારડીની સુખવીલાસ કાપડની કંપનીમાં ભયંકર આગ લાગી હતી. જો કે ફાયરની 5 ગાડીઓ સમયસર પહોંચી જતા આગ ઉપર કલાકોની મહેનતબાદ કાબૂ મેળવી શકાયો હતો. કોઈ જાનહાની થઈ નથી પરંતુ કંપની બળીને ખાખ થઈ ગઈ હતી. 

વડોદરાના આજવામાં 30 દુકાનો આગની ઝપેટમાં
વડોદરાના આજવા વિસ્તારના રહીશો ભરનિંદ્રામાં હતા ત્યારે ઉમિયા હાર્ડવેર નામની બે માળની પ્લાયવૂડની દુકાનમાં ભીષણ આગ લાગી હતી. આગ લાગતા આખો શો રૂમ બની ભષ્મ થઈ ગયો હતો. દુકાનની આસપાસના વિસ્તારોમાં અન્ય 30 દુકાનો આગની લપેટમાં આવે તે પહેલાં ફાયર બ્રિગેડ ઘટના સ્થળે પહોંચી ગઈ હતી. આગની જાણ થતાં જ મધ્યગુજરાત વીજ કંપનીએ સતર્કતા દાખવી અને આસપાસના વિસ્તારનો વીજ પૂરવઠો ખોરવી નાખ્યો હતો.  ફાયર બ્રિગેડની 10 ગાડીઓએ 3 કલાક સુધી વૉટરકેનનનો મારો કરતા મોટી દુર્ઘટના ટળી હતી.

રહિશોમાં હાહાકાર
આગના કારણે શોરૂમમાં લાખો રૂપિયાનું નુકસાન ગયુ હોવાની આશંકા છે. જોકે, સમયસર કામગીરી ન થઈ હોત તો નજીકના એપાર્ટમેન્ટમાં રહેતા રહીશો ફસાઈ જવાની શક્યતા હતી. ફાયર બ્રિગેડના લાશ્કરોએ આગ બુઝાવવાની સાથે સાથે નજીકના એપાર્ટમેન્ટમાં રહેતા લોકોને સલામત સ્થળે ખસેડ્યા હતા. આગની ઘટનાથી સમગ્ર વિસ્તારમાં હાહાકાર મચી ગયો હતો અને મોડી રાત્રે લોકોના ટોળા એકઠાં થઈ ગયા હતા.