- કોંગ્રેસના નેતાઓ દિલ્લીથી ગુજરાત પહોંચ્યા
- ઉમેદવાર પસંદગી માટે યોજાઈ હતી દિલ્હીમાં કોંગ્રેસની CECની બેઠક
- ઉમેદવારોને ઔપચારિક સૂચના પણ આપી દેવાઇ
ગુજરાત વિધાનસભા ચૂંટણીના ધમધમાટ વચ્ચે AAPએ પોતાના ઉમેદવારોની 7 યાદી જાહેર કરી દીધી છે. ત્યારે હવે ભાજપ-કોંગ્રેસે પણ પોતાના ઉમેદવારોની પસંદગીને લઇને કવાયત તેજ કરી છે. ભાજપ દ્વારા સેન્સ પ્રક્રિયા જોરશોરથી ચાલી રહી છે. તેવામા ઉમેદવારોને લઇને કોંગ્રેસનું મંથન પૂર્ણ થયુ છે. કોંગ્રેસના ઉમેદવાર પસંદગી માટે દિલ્હીમાં કોંગ્રેસની CECની બેઠક યોજાઈ હતી. જે પૂર્ણ થતાં કોંગી નેતાઓ દિલ્લીથી ગુજરાત પહોંચ્યા છે. હવે 2 દિવસમાં કોંગ્રેસ ઉમેદવારોના નામ ગમે તે ઘડીએ જાહેર થઇ શકે છે.
50થી 65 બેઠકના ઉમેદવારોના નામ ઉપર CEC એ મંજૂરીની મહોર મારી
નવનિયુક્ત પ્રમુખ મલ્લિકાર્જુન ખડગેની ઉપસ્થિતિમાં ઉમેદવાર પસંદગીને લઇને કોંગ્રસ દ્વારા દિલ્હીમાં CECની બેઠક યોજાઈ હતી. જેમાં 50થી 65 બેઠકના ઉમેદવારોના નામ ઉપર CEC એ મંજૂરીની મહોર મારી હોવાનું જાણવા મળી રહ્યું છે. જેને પગલે કોંગ્રેસ દ્વારા ઉમેદવારોને ઔપચારિક સૂચના પણ આપી દેવામાં આવી હોવાનું પણ સામે આવ્યું છે.
3 દાયકાથી જે બેઠક કોંગ્રેસ હારે છે તે બેઠકના ઉમેદવાર નક્કી
ગુજરાતમાં વિધાનસભા ચૂંટણીની તડામાર તૈયારીઓ ચાલી રહી છે. ત્યારે તમામ રાજકીય પક્ષો ચૂંટણી પંચ ક્યારે તારીખોની જાહેરાત કરશે તેની રાહ જોઈ રહ્યાં છે. બેઠકમાં સોનિયા ગાંધી સહીતના અગ્રણીઑ હાજર રહ્યા હતા. આ દરમિયાન લાંબા મંથન બાદ 3 દાયકાથી જે બેઠક કોંગ્રેસ હારે છે તે બેઠકના ઉમેદવાર નક્કી કરવામાં આવ્યા હોવાનું જાણવા મળી રહ્યું છે. વધુમાં 2017માં સૌથી ઓછા મતે કોંગ્રેસના ઉમેદવાર હાર્યા હતા તે બેઠકના પણ ઉમેદવાર લગભગ નક્કી કરી દેવામાં આવ્યા છે. એજ રીતે વર્તમાન ધારાસભ્યો સિવાય 35 ઉમેદવારો સ્ક્રીનીંગ કમિટીએ નક્કી કરી લીધા છે.
