- માંગરોળના આસરમા ગામ નજીક અકસ્માત
- બર્થડે પાર્ટીમાં ગયેલા યુવાનોને નડ્યો અકસ્માત
- કીમ નદીના પુલ પરથી નીચે પટકાતા બે યુવકોના મોત
કીમ નદીના પુલ પરથી નીચે પટકાતા માંગરોળના બોરસરા ગામના બે યુવકોના મોત થયા છે. બે યુવકના મોતથી બોરસરા ગામમાં શોક માહોલ સર્જાયો છે. તો પરિવારમાં પણ ગમગીની છવાઈ છે. માંગરોળ પોલીસે ઘટના પહોંચીને બંને યુવકોના મૃતદેહ કબજે લીધા છે.
બર્થ ડે પાર્ટીમાંથી ઘરે પરત ફરતી વખતે નડ્યો અકસ્માત
મળતી માહિતી અનુસાર, સુરતના માંગરોળ તાલુકાના બોરસરા ગામના નવાપરા ફળીયા ખાતે રહેતા રોહિત વસાવા અને યોગેશ રાઠોડ નામના બે મિત્રો બાઈક પર માંગરોળના ધોળીકુઈ ગામે મિત્રના જન્મદિવસની પાર્ટીમાં આવ્યા હતા. જે બાદ બંને રાત્રે 8 વાગ્યે ધોળીકુઈ ગામથી બોરસરા જવા નીકળ્યા હતા. આ દરમિયાન આસરમા ગામ નજીક તેમને અકસ્માત નડ્યો હતો.
સ્ટેરીંગ પર કાબુ ગુમાવતા બાઇક સાથે પડ્યા નદીમાં
આસરમાની કીમ નદી પાસે તેમની બાઈક ડિવાઈડર સાથે અથડાતા સ્ટેરીંગ પરનો કાબુ ગુમાવતા બંને યુવકો બાઇક સાથે કીમ નદીમાં પડ્યા હતા. આ અકસ્માતમાં બંને યુવકોના ઘટનાસ્થળે જ મોત નિપજ્યાં હતા. જે બાદ રાહદારીઓ દ્વારા આ અંગેની જાણ પોલીસે કરાતા પોલીસની ટીમ ઘટના સ્થળે દોડી આવી હતી. પોલીસે બંને યુવકોના મૃતદેહ કબજે લઈ આગળની કાર્યવાહી હાથ ધરી છે.
ધોલેરા-ભાવનગર હાઈવે પર ગાડીનું ટાયર ફાટતા અકસ્માત સર્જાયો
નોંધનીય છે કે, રાજ્યમાં છેલ્લા ઘણા સમયથી હાઈવે પર અકસ્માતની ઘટના વધુ બની રહી છે. આજે સવારે ધોલેરા-ભાવનગર હાઈવે પર સાંઢીડા અને બાવલિયાળી નજીક શ્રમિકો ભરેલી તુફાન ગાડીનું ટાયર ફાટતા અકસ્માત સર્જાયો હતો. આ અકસ્માતમાં 20 લોકોને સામાન્ય ઈજા અને 5 લોકોને ગંભીર ઈજા પહોચી હતી. ઈજાગ્રસ્તોને સારવાર માટે ભાવનગરની સર.ટી હોસ્પિટલમાં ખસેડવામાં આવ્યા હતા. એવું કહેવામાં આવી રહ્યું છે કે તુફાનમાં 10 બાળકો સહિત 32 લોકો સવાર હતા. જેમાંથી 10 જેટલા લોકો તુફાન ગાડીની છત પર બેઠા હતા. હાલ તો ઈજાગ્રસ્તોની હોસ્પિટલમાં સારવાર ચાલી રહી છે.
