કાર્યવાહી / અમદાવાદમાં ચાલુ વીડિયો કોલ પર યુવકે કેનાલમાં ઝંપલાવ્યું, ગર્લફ્રેન્ડના પિતાની ધમકીઓથી કંટાળી કર્યો આપઘાત

અમદાવાદના ઓઢવ વિસ્તારમાં રહેતા એક યુવક દ્વારા પાંચ મહિના પહેલા ગાંધીનગર જિલ્લાના નભોઈ નજીક નર્મદા કેનાલમાં કૂદીને આત્મહત્યા કરવાના બનાવમાં હવે નવો વળાંક આવ્યો છે. ઘટનાનો એક શોકિંગ વીડિયો સામે આવ્યો છે, જેમાં યુવક પોતાની ગર્લફ્રેન્ડની સંબંધી યુવતી સાથે વીડિયો કોલ પર વાત કરતા કરતા જ કેનાલમાં ઝંપલાવતો જોવા મળે છે. વીડિયો સામે આવતા સમગ્ર મામલો ફરી ચર્ચામાં આવ્યો છે. આ કેસમાં યુવકને આત્મહત્યા માટે પ્રેરિત કરવાના આક્ષેપસર ગર્લફ્રેન્ડના પિતા વિરુદ્ધ પોલીસ ફરિયાદ નોંધાવવામાં આવી છે અને પોલીસે વધુ તપાસ હાથ ધરી છે.

યુવકે 15 જાન્યુઆરીએ આપઘાત કર્યો હતો

અમદાવાદના ઓઢવ વિસ્તારમાં રહેતા આશિષ શાહ નામના યુવકે પાંચ મહિના પહેલા ગાંધીનગર નજીક આવેલી નભોઈ કેનાલમાં કૂદીને આપઘાત કર્યાનો મામલો હવે ફરી ચર્ચામાં આવ્યો છે. આ ઘટનામાં મૃતક યુવકની ગર્લફ્રેન્ડના પિતા સામે પોલીસ ફરિયાદ નોંધાવવામાં આવી છે. તપાસ દરમિયાન આશિષના મોબાઈલ ફોનમાંથી મળેલા કોલ રેકોર્ડિંગ અને મેસેજથી ખુલ્યું છે કે યુવતીના પિતા તેને વારંવાર ધમકી આપતા હતા. આશિષનો અમરાઈવાડી વિસ્તારમાં રહેતી યુવતી સાથે પ્રેમસંબંધ હતો અને આ સંબંધને લઈને યુવતીના પિતાની સતત ધમકીઓથી કંટાળી જઈ આશિષે આ પગલું ભર્યું હોવાનો આરોપ કરવામાં આવ્યો છે. હાલ પોલીસ સમગ્ર મામલે વધુ તપાસ હાથ ધરી રહી છે.

આ પણ વાંચોઃ વડોદરામાં કળિયુગી દીકરો ભૂલ્યો ભાન, પૈસા-કાર માટે પિતા પર ચાકૂથી કર્યો જીવલેણ હુમલો

ગાંધીનગર નજીક નર્મદા કેનાલ વિસ્તારમાં બનેલી આ દુઃખદ ઘટનાએ સ્થાનિકોમાં ચકચાર મચાવી છે. આશિષ નામના યુવકે પોતાના મિત્રની હાજરીમાં ગર્લફ્રેન્ડ સાથે વીડિયો કોલ દરમિયાન અચાનક કેનાલમાં ઝંપલાવી આપઘાત કર્યો હોવાનું સામે આવ્યું છે. ઘટનાનો એક વીડિયો પણ બહાર આવતા મામલો વધુ સંવેદનશીલ બન્યો છે. યુવકના પિતાએ યુવતીના પિતા સામે ફરિયાદ નોંધાવતા પોલીસે સમગ્ર ઘટનાની દિશામાં તપાસ તેજ કરી છે અને ઘટનાના તમામ પાસાઓની છાનબીન કરી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ