કહેર / VIDEO : રમકડાંની જેમ ગાડીઓ તણાઈ, રસ્તા બન્યા નદી, ભયાનક પૂરથી તારાજી

સ્પેન હાલમાં ભારે વરસાદથી હેરાન છે, દેશના અનેક રાજ્યમાં હવામાન એજન્સી AEMET તરફથી ચેતવણીઓ જારી કરવામાં આવી છે. તેમાંના 8 વિસ્તારમાં વધુ ગંભીર સ્થિતિને ધ્યાનમાં રાખી ઓરેન્જ એલર્ટ જાહેર કરવામાં આવ્યું છે. હુએસ્કા, ટેરુએલ, ઝરાગોઝા, બાર્સેલોના, ગિરોના, લેઇડા, ટેરાગોના અને કેસ્ટેલોન જેવા વિસ્તારોમાં લોકો અને પ્રવાસીઓને ભારે તોફાન, અચાનક પૂર અને ભારે વરસાદ માટે ચેતવણી આપવામાં આવી છે.

ઝરાગોઝાના ટેરાઝોના શહેરમાં શુક્રવારે માત્ર એક કલાકમાં જ 100 મિલીમીટર વરસાદ વરસી ગયો હતો. પરિણામે રસ્તાઓ પાણીમાં ગરકાવ થઈ ગયા, વાહનો વહેતા દેખાયા અને ઘણી દુકાનોમાં પાણી ઘૂસી ગયા હતા. જેના કારણે સમગ્ર શહેરમાં જનજીવન અસ્તવ્યસ્ત બની ગયું છે. આ સ્થિતિને ગંભીરતાથી લઈ હવામાન વિભાગે આજે પણ રેડ એલર્ટ જાહેર કર્યો છે. ટેરાઝોનામાં જાહેર પરિવહન બંધ છે અને અનેક સ્થળોએ ઘરો અને મિલકતને ભારે નુકસાન થયું છે.

વિસ્તારોમાં તાત્કાલિક ધોરણે ટીમો તહેનાત

રાષ્ટ્રીય કટોકટી નિબંધન અને રાહત માટે જવાબદાર મિલિટરી ઇમરજન્સી યુનિટ (UME) ની ટીમો તાત્કાલિક અસરથી અસરગ્રસ્ત વિસ્તારોમાં તૈનાત કરવામાં આવી છે. તેઓ હાલ ટેરાઝોના અને આસપાસના વિસ્તારોમાં બચાવ કામગીરીમાં લાગેલા છે. ઝરાગોઝામાં હજુ સુધી 30થી વધુ પૂર સંબંધિત ઘટનાઓ સામે આવી છે જેમાં રસ્તા બંધ થયા છે, વૃક્ષો પડી ગયા છે અને વાહન વ્યવહાર ઠપ થઈ ગયો છે. જો કે સદનસીબે કોઈ જાનહાનિ થઈ નથી.

વધુ ગંભીર પરિસ્થિતિ

કેતાલોનિયા અને એરાગોનમાં મોસમની સૌથી કઠિન પરિસ્થિતિ જોવા મળી રહી છે. અહીં પ્રતિ ચોરસ મીટર 50 મીમી જેટલો વરસાદ પડવાની આગાહી છે, જેના કારણે નદી-નાળાઓ છલકાવાની શક્યતા છે. કેટલન હવામાન સેવા મેટીઓકેટે સ્થિતિને ગંભીર ગણાવીને પોતાના પાંચમા અને છઠ્ઠા સ્તરે હવામાન ચેતવણી જાહેર કરી છે, જેનાથી સ્પષ્ટ છે કે વિસ્તારને યેલો અને ઓરેન્જ એલર્ટ કરતાં વધુ ગંભીર સ્થિતિનો સામનો કરવો પડી રહ્યો છે.

ભારે વરસાદની ચેતવણી

સ્થાનિક લોકોને રાત્રીના સમય પર સતત ભારે વરસાદ અને વાવાઝોડા માટે સાવચેત રહેવાની સલાહ આપવામાં આવી છે. મોબાઇલ ફોન પર પણ આપત્તિ ચેતવણી સંદેશાઓ મોકલવામાં આવી રહ્યા છે જેથી લોકો સમયસર સલામત સ્થળે જઈ શકે. ચિત્રો અને વીડિયો ક્લિપ્સમાં લોકો પોતાના ઘરના ગટરો ખોલતા, રસ્તાઓ પર પાણી ખેંચતા અને બચાવ દળો કાર્યરત હોવાનું દેખાઈ રહ્યું છે.

આ પણ વાંચો : જાપાની બાબા વેંગાની ભવિષ્યવાણી સાચી ઠરી, જ્વાળામુખી ફાટતા હાહાકાર

બીજી તરફ બ્રિટનમાં તડકો

દરમિયાન બ્રિટનમાં લોકો તડકાનો આનંદ લઈ રહ્યા છે જ્યાં પારો 35°C સુધી પહોંચવાની સંભાવના વ્યક્ત થઈ છે, જ્યારે સ્પેનના પ્રવાસન સ્થળોએ રજા માણવા આવેલા બ્રિટિશ પ્રવાસીઓ માટે અઘરી સ્થિતિ સર્જાઈ છે. સ્પેનમાં આવેલા અનેક પ્રવાસીઓ આ અસાધારણ હવામાન પરિસ્થિતિના કારણે અટવાઈ પડ્યા છે અને તેમની રજાઓ પર પાણી ફરી વળ્યું છે. આગાહી મુજબ આગામી દિવસોમાં વરસાદ ધીમો પડી શકે છે, પરંતુ હાલ માટે રાજ્યમાં સતત એલર્ટ સ્થિતિ જારી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ