વિશ્વ / આજથી પાકિસ્તાનમાં અમેરિકા-ઇરાન વચ્ચે શાંતિમંત્રણા, લેબલોનમાં સ્થિતિ ચિંતાજનક

US Iran Talks : પશ્ચિમ એશિયામાં વધતા તણાવ વચ્ચે અમેરિકા અને ઇરાન વચ્ચે શાંતિ માટેની નવી પહેલ શરૂ થવા જઈ રહી છે. બંને દેશોએ તાત્કાલિક યુદ્ધવિરામ માટે સંમતિ વ્યક્ત કરી હોવા છતાં, મેદાનમાં હજી શાંતિ દેખાતી નથી. ખાસ કરીને ઇઝરાયેલ દ્વારા લેબનોન પર સતત હુમલાઓએ પરિસ્થિતિને વધુ જટિલ બનાવી દીધી છે. ઇઝરાયેલના વડાપ્રધાન Netanyahuએ સ્પષ્ટ કર્યું છે કે લેબનોન યુદ્ધવિરામનો ભાગ નથી. તેના પરિણામે બૈરૂત સહિતના વિસ્તારોમાં થયેલા હુમલાઓમાં ભારે જાનહાનિ થઈ છે અને લેબનોનમાં શોકનું વાતાવરણ છવાયું છે. બીજી તરફ, ઇરાનએ આ હુમલાઓને ગંભીર રીતે લીધા છે અને ચેતવણી આપી છે કે જો આક્રમણ ચાલુ રહેશે તો શાંતિપ્રક્રિયા ખોરંભે પડી શકે છે.

આ પરિસ્થિતિ વચ્ચે ઇસ્લામાબાદમાં અમેરિકા અને ઇરાન વચ્ચે મહત્વપૂર્ણ શાંતિ મંત્રણા શરૂ થઈ રહી છે. અમેરિકન પ્રતિનિધિમંડળનું નેતૃત્વ જે ડી વેન્સ કરી રહ્યા છે, જ્યારે ઇરાન તરફથી પણ ઉચ્ચ સ્તરીય પ્રતિનિધિઓ ભાગ લઈ રહ્યા છે. આ મંત્રણા માટે સમગ્ર ઇસ્લામાબાદમાં કડક સુરક્ષા વ્યવસ્થા ગોઠવવામાં આવી છે.

ઇરાનના વિદેશ પ્રધાન Abbas Araghchiએ જણાવ્યું છે કે યુદ્ધવિરામની શરતો સ્પષ્ટ છે અને તેમાં લેબનોનને અલગ કરી શકાય નહીં. તેમની દલીલ મુજબ, લેબનોન પરના હુમલા સીધા યુદ્ધવિરામનો ભંગ છે. આ વચ્ચે હોર્મુઝની ખાડીનું મહત્વ ફરી એકવાર કેન્દ્રમાં આવ્યું છે. ઇરાનએ ખાડીમાં સુરક્ષા કારણોસર નવી માર્ગદર્શિકા જાહેર કરી છે અને જહાજોને ચોક્કસ માર્ગોનો ઉપયોગ કરવા જણાવ્યું છે. આ નિર્ણયને કારણે વૈશ્વિક વેપાર પર અસર થવાની શક્યતા છે, જેના કારણે યુરોપીયન દેશોએ ચિંતા વ્યક્ત કરી છે.

આ પણ વાંચો : સીઝફાયર પછી હોર્મુઝ સ્ટ્રેટમાં હલચલ: ગુજરાત આવી રહેલું પ્રથમ તેલ ટેન્કર સલામત પસાર

વિશ્વ રાજકારણમાં આ તણાવ વચ્ચે ડોનાલ્ડ ટ્રમ્પના નિવેદનથી પણ વિવાદ ઊભો થયો છે, જેમાં તેમણે લેબનોનને યુદ્ધવિરામથી અલગ ગણાવ્યો હતો. ઇરાનએ આ નિવેદનનો કડક વિરોધ કર્યો છે અને શાંતિ માટે સમગ્ર વિસ્તારને આવરી લેવાની જરૂરિયાત પર ભાર મૂક્યો છે. આ સાથે ઇરાનની પરમાણુ નીતિ પણ ચર્ચાનો કેન્દ્ર બની છે. ઇરાનના પરમાણુ વિભાગના વડાએ સ્પષ્ટ કર્યું છે કે યુરેનિયમ સંવર્ધનનો અધિકાર કોઈપણ શાંતિ મંત્રણા માટે સમર્પિત નહીં કરવામાં આવે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ