ચેતવણી / "રાતે 8 વાગે..", ટ્રમ્પે નક્કી કર્યો સમય, શું ઈરાન પર મોટો હુમલો કરવાની તારીખ ફાઇનલ?

US-Iran War: અમેરિકા, ઈઝરાયલ અને ઈરાન વચ્ચે ચાલી રહેલા તણાવમાં હવે દિવસે ને દિવસે તણાવ વધુ ઉગ્ર બનતો નજર આવી રહ્યો છે. ખાસ કરીને હોર્મુઝ સ્ટ્રેટને લઈને વોશિંગ્ટન અને તેહરાન વચ્ચે ટકરાવ વધ્યો છે.

ટ્રમ્પની કડક ચેતવણી અને અલ્ટીમેટમ

અમેરિકાના રાષ્ટ્રપતિ ડોનાલ્ડ ટ્રમ્પે ઈરાન વિરુદ્ધ કડક નિવેદન આપતાં ચેતવણી આપી છે કે જો કોઈ સમજૂતી નહીં થાય તો અમેરિકા ઈરાનને ભારે નુકસાન પહોંચાડી શકે છે. એક મીડિયા સાથેની મુલાકાત દરમિયાન તેમણે જણાવ્યું હતું કે ઈરાન સંમત નહીં થાય તો સમગ્ર દેશને નિશાન બનાવવામાં આવી શકે છે. સાથે જ તેમણે હોર્મુઝ સ્ટ્રેટ ખોલવા માટે મંગળવાર સાંજ સુધીનું અલ્ટીમેટમ જાહેર કર્યું છે.

સંભવિત હુમલાની ધમકી અને સમયરેખા

ટ્રમ્પે પોતાના સોશિયલ મીડિયા પ્લેટફોર્મ પર સંભવિત સૈન્ય કાર્યવાહીનો સમય પણ જાહેર કર્યો હતો. તેમણે ઈશારો આપ્યો કે ઈરાનના પાવર પ્લાન્ટ અને બ્રિજ પર હુમલો થઈ શકે છે. પોસ્ટમાં જણાવ્યા મુજબ આ કાર્યવાહી મંગળવારે રાત્રે 8 વાગ્યે (અમેરિકાના સમય) થઈ શકે છે. જે ભારતીય સમય મુજબ બુધવારે સવારે થઈ શકે છે. આ નિવેદન બાદ સમગ્ર વિસ્તારમાં ચિંતા વધી ગઈ છે.

ઈરાનનો કડક પ્રતિસાદ

ઈરાન તરફથી પણ આ મુદ્દે તીખો પ્રતિસાદ આવ્યો છે. ઈરાની સંસદના સ્પીકર મોહમ્મદ બાઘર ગાલિબાફે ટ્રમ્પના નિવેદનોને બેદરકાર ગણાવતા કહ્યું કે આવા પગલાં સમગ્ર ક્ષેત્રને યુદ્ધની આગમાં ધકેલી શકે છે. તેમણે વધુમાં જણાવ્યું કે અમેરિકા જો આ પ્રકારની કાર્યવાહી કરશે તો તેનું ગંભીર પરિણામ આવશે અને આ સમસ્યાનો ઉકેલ માત્ર ઈરાનના અધિકારોનું સન્માન અને સંવાદ દ્વારા જ શક્ય છે.

આ પણ વાંચો: ટ્રમ્પની ધમકી પર ઈરાનનો પલટવાર, કહ્યું - નેતન્યાહુના રસ્તે ચાલશો તો બળીને રાખ થઈ જશો

હોર્મુઝ સ્ટ્રેટ મુદ્દે અમેરિકા અને ઈરાન વચ્ચેનો તણાવ હવે ગંભીર દિશામાં આગળ વધી રહ્યો છે. બંને દેશોના આક્રમક વલણને કારણે મધ્ય પૂર્વમાં સંઘર્ષ વધવાની ભીતિ વધુ મજબૂત બની છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ