અમેરિકા / ટ્રમ્પના ડાંડિયા ડૂલ! અમેરિકામાં 7.5 લાખ સરકારી કર્મચારીઓને વગર પગારે ઘરભેગા કરાયાં, આ શું બન્યું?

જગત જમાદાર અમેરિકાને પણ નાણાભીડ નડી છે અને પરિણામે ત્યાં સરકારી શટડાઉન લાગુ પડી ગયું છે. શટડાઉન હેઠળ સરકારે ઈમરજન્સી સિવાયના વિભાગો બંધ કરી દીધાં હોવાથી લગભગ 7.5 લાખ કર્મચારીઓને વગર પગાર ઘેર જવાનો વારો આવ્યો છે અને જ્યારે શટડાઉન હટી જશે ત્યારે તેમને ફરી નોકરીએ લેવામાં આવશે.

ફંડિગ બિલ પાસ ન થતાં શટડાઉન

હકીકતમાં ટ્રમ્પની આગેવાની વાળી રિપબ્લિકન પાર્ટીની સરકાર સંસદમાંથી ફંડિગ બિલ અથવા બજેટ પાસ કરાવી શકી નહોતી. ફંડિગ બિલ પાસ ન થતાં સરકાર પાસે કાયદારીતે એક રપિયો પણ હોતો નથી અને આથી સરકારે શટડાઉનની જાહેરાત કરે છે જે હેઠળ ઈમરજન્સી ન હોય તેવી સેવામાં રોકાયેલા કર્મચારીઓને વગર પગાર ઘેર મોકલી દેવાય છે. ટ્રમ્પના બીજા કાર્યકાળના આ શટડાઉનમાં 7.5 લાખ કર્મચારીઓને વગર પગારે ઘેર મોકલી દેવાયાં છે જેમાં શિક્ષણ વિભાગના સૌથી વધુ કર્મચારીઓ છે.

શટડાઉન વખતે કયા વિભાગો બંધ

આ વખતના શટડાઉનમાં FBI તપાસ, CIA કામગીરી, હવાઈ ટ્રાફિક નિયંત્રણ, લશ્કરી સેવા, સામાજિક સુરક્ષા તપાસ, મેડિકેર દાવાઓ અને નિવૃત્ત સૈનિકો માટે હેલ્થ સંબંધિત વિભાગો ચાલુ રખાયા છે જ્યારે બાકીના બધા વિભાગો બંધ કરી દેવાયાં છે.

ટ્રમ્પના પહેલા કાર્યકાળમાં 35 દિવસનું શટડાઉન

ઉલ્લેખનીય છે કે ટ્રમ્પના પ્રથમ કાર્યકાળ દરમિયાન 35 દિવસના શટડાઉન દરમિયાન, 340,000 કર્મચારીઓને રજા પર ઉતારવામાં આવ્યા હતા, જ્યારે બાકીના લોકોએ શટડાઉન ન ખુલે ત્યાં સુધી વગર પગારે કામ કર્યું હતું.

વધુ વાંચો : જીત બાદ ટ્રોફી કાંડ : મોહસીન નકવીએ અડધી રાતે સંતાડી દીધી એશિયા કપની ટ્રોફી-મેડલ, મોટો વિવાદ

શું હોય છે શટડાઉન

અમેરિકન સરકારે સરકાર ચલાવવા માટે દર વર્ષે સંસદ પાસેથી ફંડિગ બિલ અથવા બજેટ પાસ કરાવાનું હોય છે. આ ફંડિગ કે બજેટ બિલ પાસ થાય તો જ અમેરિકન સરકારને ખર્ચ કરવા મળે છે, બજેટ કે બિલ ન થવાના કિસ્સામાં સરકાર પાસે પૈસા બચતાં નથી, આથી તે ઈમરજન્સી સિવાયના વિભાગો બંધ કરી નાખે છે અને કર્મચારીઓને પગાર વગર ઘેર મોકલી દે છે. અમેરિકામાં નવું નાણાકીય વર્ષ 1 ઓક્ટોબરથી શરૂ થાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ