વિશ્વ / રશિયાથી 5500 કિમી દૂર, જ્યાં આવ્યો છે અમેરિકાનો સિક્રેટ અડ્ડો, જેની પર ચીનની પણ છે બાજ નજર!

અમેરિકાથી લગભગ 4000 કિલોમીટર, ચીનથી લગભગ 5000 કિલોમીટર અને રશિયાથી લગભગ 5500 કિલોમીટર દૂર દરિયામાં એક એવી જગ્યા આવેલી છે, જ્યાં કેટલાક ટાપુ છે. આ જગ્યાને માર્શલ દ્વીપ કહેવાય છે. આ દ્વીપમાંથી બે ટાપુઓ ક્વાજાલીન અને એબે છે, જે 20 કિલોમીટર સુધી પણ ફેલાયેલા નથી. પરંતુ એવું કહેવાય છે કે આજે અમેરિકાની જે ખતરનાક સિક્યોરિટી સિસ્ટમ છે, તેમાં આ નાના ટાપુઓ મહત્ત્વપૂર્ણ ભૂમિકા ભજવે છે.

અમેરિકા અહીં કરોડો રૂપિયા ખર્ચ કરી રહ્યું છે, આ જગ્યાના સ્થાનિક નેતાઓને કરોડો રૂપિયા ભાડું પણ ચૂકવી રહ્યું છે. હવે સવાલ એવો થાય છે કે આ જગ્યા એવું શું ખાસ છે, આ નાના ટાપુઓ અમેરિકા માટે આટલા મહત્ત્વપૂર્ણ શા માટે છે? એમ તો આ જગ્યા પર માત્ર અમેરિકા જ નહીં, પણ ચીનની પણ નજર છે. ચીન પણ અહીંના લોકોને મોટી રકમ ચૂકવીને અથવા સુવિધાઓ આપીને અહીં કબજો કરવા માંગે છે. જો કે હજુ સુધી ચીનની વાત નથી બની અને હાલમાં અમેરિકન સૈન્ય કરોડો રૂપિયા ખર્ચ કરીને આ વિસ્તારનો ઉપયોગ કરી રહ્યું છે. ચાલો જાણીએ આ જગ્યા ક્યાં આવેલી છે અને અમેરિકા અહીં શું કરે છે.

Kwajalein US Army Base: ક્યાં છે ક્વાજાલીન?

ક્વાજાલીન અમેરિકા, ચીન અને રશિયાથી હજારો કિલોમીટર દૂર છે, પણ તેનું સ્થાન ત્રણેય દેશો માટે મહત્ત્વપૂર્ણ છે. આ ટાપુઓ પેસિફિક મહાસાગરમાં આવેલા છે, જ્યાં આશરે 10,000 લોકો રહે છે. ક્વાજાલીનનો ભૂમિ વિસ્તાર ફક્ત 16 ચોરસ કિલોમીટર છે. માહિતી પ્રમાણે, અમેરિકા આ જગ્યાનો ઉપયોગ સૈન્ય અડ્ડા તરીકે કરે છે અને ચીન અથવા રશિયન મિસાઇલ હુમલાઓ સામે સુરક્ષા કવચ તરીકે કામ કરે છે. અહેવાલ પ્રમાણે, આ આર્મી બેઝ અમેરિકાની સુરક્ષા વ્યવસ્થામાં મહત્ત્વપૂર્ણ ભૂમિકા ભજવે છે. અહીં ઘણી અમેરિકન મિસાઇલોનું પરીક્ષણ કરવામાં આવે છે. અમેરિકા પર ચીન અથવા રશિયન મિસાઇલ હુમલાની સ્થિતિમાં, અહીં સૌથી પહેલા જાણ થાય છે અને આ પ્રારંભિક ચેતવણી પ્રણાલી તરીકે કામ કરે છે.

જણાવી દઈએ કે ક્વાજાલીન અમેરિકન સૈન્યનું એક હાઇ-ટેક બેઝ છે, જ્યારે એબે એ જગ્યા છે, જ્યાં મોટાભાગની સ્થાનિક વસ્તી રહે છે. અમેરિકન સૈન્ય એબેના લોકોને ક્વાજાલીન બેઝ પર મજૂરી અને સર્વિસ માટે લઈ જાય છે. પરંતુ અહીં આર્મીનું કોઈ મોટું બેઝ નથી.

Kwajalein: અમેરિકા ચૂકવે છે કરોડોમાં ભાડું

ઉલ્લેખનીય છે કે ક્વાજાલીન બેઝ પર 1,300 અમેરિકન સૈનિકો અને કેટલાક ખાસ લોકો એર-કન્ડિશન્ડ ઘરો, ઊંચા તાડના ઝાડ, જાહેર સ્વિમિંગ પૂલ, એક કન્ટ્રી ક્લબ, નવ-હોલવાળું ગોલ્ફ કોર્સ અને બોલિંગ એલીનો આનંદ માણે છે. અહીં એક હોસ્પિટલ અને એક એનિમલ ક્લિનિક પણ છે. અમેરિકનો આ ટાપુને "લગભગ સ્વર્ગ" કહે છે.

અહેવાલ પ્રમાણે, ઓસ્ટ્રેલિયન સ્ટ્રેટેજિક પોલિસી ઇન્સ્ટિટ્યૂટમાં રક્ષા રણનીતિના ડેપ્યુટી ડિરેક્ટર અને પરમાણુ મુદ્દાઓ પર પેન્ટાગોનના પૂર્વ સલાહકાર કોર્ટની સ્ટુઅર્ટનું કહેવું છે કે આ અમેરિકન સૈન્યના સૌથી મહત્ત્વપૂર્ણ બેઝમાંથી એક છે. એક અહેવાલમાં જણાવાયું છે કે યુએસ બજેટ દસ્તાવેજોથી જાણવા મળે છે કે સેના 2026 નાણાકીય વર્ષમાં ફક્ત ક્વાજાલીન અભિયાનો પર ઓછામાં ઓછા 458 મિલિયન ડોલર ખર્ચ કરવાની યોજના બનાવી રહી છે.

2025ના માર્શલ બજેટ દસ્તાવેજો અનુસાર, ક્વાજાલીનના ઉપયોગના બદલામાં, અમેરિકા ટાપુના પરંપરાગત નેતાઓને વાર્ષિક લગભગ 26 મિલિયન ડોલરનું ભાડું ચૂકવે છે, જેનો એક ભાગ એબેના અન્ય રહેવાસીઓ સાથે શેર કરવામાં આવે છે. અમેરિકા દર વર્ષે એબેમાં સ્થાનિક અધિકારીઓને લગભગ 17 મિલિયન ડોલરની આર્થિક મદદ પણ કરે છે.

ચીનને પણ જમાવવો છે અધિકાર

અમેરિકાની સાથે, ચીન પણ આ પેસિફિક ટાપુઓ પર પોતાનો દબદબો બનાવી રહ્યું છે. જોકે, હાલમાં એબે ટાપુઓ પર ચીનની કોઈ હાજરી નથી. એવું કહેવાય છે કે ગયા વર્ષે એક પ્રાદેશિક પરિષદમાં, ચીનના પેસિફિક સાથીઓમાંથી એક દેશના એક અધિકારીએ બીજિંગ વતી તેમને પ્રસ્તાવ મૂક્યો હતો. સાથે જ ચીન નોંધપાત્ર રકમની ઓફર કરીને અહીં ઘૂસવાનો પ્રયાસ કરી રહ્યું છે. 100 મિલિયન ડોલરથી વાટાઘાટોની શરૂઆત થઈ છે.

આ પણ વાંચો: ટ્રમ્પે બોલાવી દુનિયાભરના જનરલની મીટિંગ, શું US છે કોઇ નવાજૂનીના મૂડમાં?

ખૂબ જ ખરાબ સ્થિતિમાં છે અહીંના લોકો

અહેવાલોમાંથી માહિતી પ્રમાણે, અહીં પરિસ્થિતિ ભયંકર છે. ડાયાબિટીસનો પ્રકોપ છે, આસપાસના પાણીમાં માછલીઓ દૂષિત છે, અને અહીંના લોકોનું આયુષ્ય ખૂબ જ ટૂંકું છે. 2017ના એક અહેવાલ પ્રમાણે, એબેની આસપાસની માછલીઓમાં આર્સેનિક અને અન્ય હાનિકારક રસાયણોનું પ્રમાણ એટલું વધારે હતું કે તેને ખાવાથી ગંભીર બીમારીઓ થઈ રહી હતી. પરિસ્થિતિ એટલી ગંભીર છે કે કેટલાક લોકોએ અહીં પૈસાની તંગીને કારણે ખાવાનું બંધ કરી દીધું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ