અમેરિકા / ટ્રમ્પે બોલાવી દુનિયાભરના જનરલની મીટિંગ, શું US છે કોઇ નવાજૂનીના મૂડમાં?

યુએસ ડિપાર્ટમેન્ટ ઓફ ડિફેન્સે એક અસામાન્ય અને ગુપ્ત બેઠકની જાહેરાત કરી છે. ડિફેન્સ સેક્રેટરી પીટ હેગસેથે વિશ્વભરના સેંકડો જનરલો અને એડમિરલોને આવતા અઠવાડિયે વર્જિનિયાના ક્વોન્ટિકોમાં આવેલા મરીન કોર્પ્સ બેઝ પર ભેગા થવાનો આદેશ આપ્યો છે. આ બેઠકનો હેતુ હજુ સુધી સ્પષ્ટ નથી કરવામાં આવ્યો, જેના કારણે લશ્કરી વર્તુળોમાં મૂંઝવણ અને ચિંતાની સ્થિતિ ઉભી થઈ છે. પેન્ટાગોનના પ્રવક્તાએ ફક્ત એટલું જ કહ્યું છે કે "યુદ્ધ સચિવ આવતા અઠવાડિયાની શરૂઆતમાં તેમના વરિષ્ઠ લશ્કરી નેતાઓને સંબોધિત કરશે." હવે એવી અટકળો ચાલી રહી છે કે શું અમેરિકા કોઈ દેશ પર હુમલો કરવાની તૈયારી કરી રહ્યું છે?

એક અમેરિકન અખબારે આ અંગે ગુરુવારે અહેવાલ આપ્યા પછી પહેલીવાર સામે આવી કે હેગસેથે શોર્ટ નોટીસ પર મોટા પાયે મિટીંગ બોલાવી છે. પેન્ટાગોનના મુખ્ય પ્રવક્તા શૉન પાર્નેલે આ બેઠકની પુષ્ટિ કરી, પરંતુ વધુ કોઈ વિગતો ન આપી. ટ્રમ્પ વહીવટીતંત્રના બીજા કાર્યકાળ દરમિયાન લશ્કરી નેતૃત્વમાં મોટા પાયે થયેલા ફેરફારો વચ્ચે આ ઘટના બની છે, જેમાં આ વર્ષે ઘણા વરિષ્ઠ અધિકારીઓને બરતરફ કરી દેવામાં અવ્યા છે.

US Military Leaders Meeting: શું હોઈ શકે આ બેઠકના સંભવિત કારણો?

યુએસ સૈન્યમાં લગભગ 800 જનરલો અને એડમિરલ છે, જે અમેરિકા અને વિશ્વમાં ફેલાયેલા છે. આટલા મોટા પાયે વ્યક્તિગત બેઠક બોલાવવી ખૂબ જ અસામાન્ય છે, કારણ કે આવી ચર્ચાઓ સામાન્ય રીતે સુરક્ષિત વીડિયો કોન્ફરન્સ દ્વારા થાય છે. નિષ્ણાતોના મતે, આવી બેઠકનું આયોજન લોજિસ્ટિકલ પડકારોથી ભરેલું હોય છે, ખાસ કરીને જ્યારે ઘણા અધિકારીઓ વિદેશી મિશન પર તૈનાત હોય છે.

લશ્કરી વિશ્લેષકો અનુસાર, આ બેઠક પાછળ ઘણા સંભવિત કારણો હોઈ શકે છે, જેમ કે -

વરિષ્ઠ અધિકારીઓમાં ઘટાડો - મે મહિનામાં, હેગસેથે ફોર-સ્ટાર જનરલોમાં 20% ઘટાડો અને તમામ જનરલ અને ફ્લેગ અધિકારીઓમાં 10% ઘટાડો કરવાનો આદેશ આપ્યો હતો. કેટલાક સ્ત્રોતોનું અનુમાન છે કે આ બેઠક એવા અધિકારીઓની યાદી જાહેર કરવા અથવા તેમને જાણ કરવા માટે હોઈ શકે છે કે જેમને તેમના પદ પરથી હટાવવામાં આવશે.

રાષ્ટ્રીય રક્ષા રણનીતિનો ખુલાસો - ચાર વર્ષે એક વાર બહાર પાડવામાં આવતી નેશનલ ડિફેન્સ સ્ટ્રેટેજીનું અનાવરણ થઈ શકે છે, જેમાં આ વર્ષે અમેરિકન માતૃભૂમિના રક્ષણ પર વધુ ભાર મૂકવામાં આવશે.

લશ્કરી સુધારા અને પુનર્ગઠન - ટ્રમ્પ વહીવટીતંત્રે રક્ષા વિભાગને "યુદ્ધ વિભાગ" નામ અપાયું છે (જોકે કોંગ્રેસની મંજૂરી બાકી છે), અને હેગસેથે લશ્કરી મુખ્યાલયને મર્જ કરવાની યોજનાઓ પર કામ શરૂ કર્યું છે, જેમ કે યુરોપિયન કમાન્ડ અને આફ્રિકન કમાન્ડનું એકીકરણ.

બજેટ અને શટડાઉનનું સંકટ - 1 ઓક્ટોબરના રોજ સંભવિત સરકારી શટડાઉન વચ્ચે, લશ્કરી પગારમાં વિલંબ થઈ શકે છે, જોકે અધિકારીઓ ફરજ પર રહેશે. આ મુદ્દા પર ચર્ચા કરવા માટે પણ આ બેઠક યોજાઈ શકે છે.

આ પણ વાંચો: 'મને મનમોજી લોકો પસંદ નથી', વ્હાઇટ હાઉસની મીટિંગમાં ટ્રમ્પે આવું કોને કહ્યું?

લશ્કરી નેતૃત્વમાં તાજેતરની ઉથલપાથલ

આ બેઠક ટ્રમ્પ વહીવટીતંત્રના લશ્કરી નેતૃત્વના "પુનઃકલ્પના" અભિયાન વચ્ચે થઈ રહી છે. હેગસેથે આ વર્ષે ડઝનબંધ વરિષ્ઠ અધિકારીઓને બરતરફ કર્યા છે, જેમાં ઘણી મહિલાઓ અને અશ્વેત અધિકારીઓ સામેલ છે, જેમ કે -

• જોઈન્ટ ચીફ્સ ઓફ સ્ટાફના ચેરમેન જનરલ ચાર્લ્સ ક્યુ. બ્રાઉન જુનિયર (અશ્વેત)
• નૌકાદળના પ્રથમ મહિલા કમાન્ડર એડમિરલ લિસા ફ્રેન્ચેટ્ટી
• નાટો લશ્કરી સમિતિમાં યુએસ પ્રતિનિધિ વાઇસ એડમિરલ શોશાના ચેટફિલ્ડ
• વાયુસેનાના ચીફ ઓફ સ્ટાફ જનરલ ડેવિડ ડબલ્યુ. એલ્વિન
• ડિફેન્સ ઈન્ટેલીજન્સ એજન્સીના વડા લેફ્ટનન્ટ જનરલ જેફરી એ. ક્રુઝ.

હેગસેથે એક પોડકાસ્ટમાં જણાવ્યું હતું કે સૈન્યના ત્રીજા ભાગના વરિષ્ઠ અધિકારીઓ "રાજનીતિકરણ" માં સામેલ છે, જેને તેઓ સમાપ્ત કરવા માંગે છે. પ્રોજેક્ટ ઓન ગવર્નમેન્ટ ઓવરસાઇટના ગ્રેગ વિલિયમ્સે તેને "અભૂતપૂર્વ" ગણાવ્યું, જ્યારે સેન્ટર ફોર ડિફેન્સ ઇન્ફર્મેશનના ડિરેક્ટરે કહ્યું કે આટલા મોટા પાયે બેઠકના તાજેતરના કોઈ ઉદાહરણ નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ