મંદી / શું તેલ સંકટના લીધે વિશ્વ આખું ખતરામાં? CEOની ચેતવણીથી હડકંપ

Global Recession: અમેરિકા અને ઈરાન વચ્ચે વધતા તણાવને કારણે વૈશ્વિક ઊર્જા બજારમાં અનિશ્ચિતતા વધી રહી છે. આ પરિસ્થિતિએ વિશ્વ અર્થતંત્ર માટે ગંભીર ચિંતાઓ ઊભી કરી છે.

અમેરિકા અને ઈરાન વચ્ચે વધતા ભૂરાજકીય તણાવના કારણે કાચા તેલના ભાવમાં ભારે ચડાવ-ઉતાર જોવા મળી રહ્યો છે. જે વૈશ્વિક અર્થતંત્ર માટે જોખમી સંકેત આપી રહ્યો છે. BlackRock ના સીઈઓ Larry Fink એ તાજેતરમાં ચેતવણી આપી છે કે જો તેલના ભાવ પ્રતિ બેરલ $150 સુધી પહોંચશેતો તે વિશ્વવ્યાપી મંદી તરફ દોરી શકે છે. તેમના મુજબ મધ્ય પૂર્વમાં ચાલી રહેલા સંઘર્ષનો સીધો પ્રભાવ ઊર્જા બજાર પર પડી રહ્યો છે. અને આ અસર લાંબા સમય સુધી રહી શકે છે. ખાસ કરીને જો અમેરિકાને અને ઈરાન વચ્ચેનો વિવાદ શમતો નથી તો તેલના ભાવ ઘણા વર્ષો સુધી ઊંચા જ રહી શકે છે. જે અર્થતંત્ર માટે અત્યંત નુકસાનકારક સાબિત થઈ શકે છે.

લેરી ફિંકે તેમના નિવેદનમાં વધુમાં જણાવ્યું હતું કે યુદ્ધવિરામ થવા છતાં પરિસ્થિતિ સંપૂર્ણ રીતે સામાન્ય નહીં બને. જો ઈરાન હોર્મુઝ સ્ટ્રેટ જેવા મહત્વપૂર્ણ વેપારી માર્ગોમાં અવરોધ ઉભો કરતું રહેશે તો વૈશ્વિક સપ્લાય ચેઇન પર ગંભીર અસર પડશે. આ સ્ટ્રેટ વિશ્વના કુલ તેલ પરિવહનનો લગભગ 20 ટકા હિસ્સો ધરાવે છે તેથી તેની અસ્થિરતા સમગ્ર વિશ્વ માટે ચિંતાજનક છે. ઊર્જાના વધતા ખર્ચનો સૌથી મોટો ફટકો ગરીબ અને મધ્યમવર્ગીય પરિવારોને પડે છે કારણ કે તે જીવન જરૂરિયાતોની કિંમતોમાં વધારો કરે છે. ફિંકે આ પરિસ્થિતિને "અપ્રત્યક્ષ કર" તરીકે વર્ણવી હતી. જેનાથી ગરીબ વર્ગ પર અસમાન અસર થાય છે અને સામાજિક અસંતુલન વધે છે.

આ પણ વાંચો: યુદ્ધના સંકટ વચ્ચે આ દેશમાં ફરી કોરોનાએ માથું ઉચક્યું, જાણો ભારતને કેટલું જોખમ?

આગળ વધતા સંજોગોમાં નિષ્ણાતો માને છે કે દેશોએ ઊર્જા નીતિમાં વૈવિધ્ય લાવવું અનિવાર્ય બની ગયું છે. ફક્ત પરંપરાગત ઇંધણ પર આધાર રાખવો હવે જોખમી બની રહ્યો છે. જો તેલના ભાવ લાંબા ગાળે ઊંચા રહેશે, તો વિશ્વભરના દેશો ઝડપથી સૌર, પવન અને અન્ય વૈકલ્પિક ઊર્જા સ્ત્રોતોની તરફ વળશે. Larry Fink એ પણ ભારપૂર્વક કહ્યું કે ભવિષ્યમાં સ્થિરતા માટે સંતુલિત ઊર્જા મોડલ અપનાવવું ખૂબ જરૂરી છે. હાલની પરિસ્થિતિ સ્પષ્ટ રીતે દર્શાવે છે કે વૈશ્વિક અર્થતંત્ર એક જ ઊર્જા સ્ત્રોત પર આધાર રાખીને આગળ વધી શકતું નથી, અને આવનારા સમયમાં ઊર્જા સુરક્ષા સૌથી મોટો મુદ્દો બનવાનો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ