SCO Summit / શી જિનપિંગ પોતે કરશે પીએમ મોદી અને પુતિનનું સ્વાગત, અમેરિકાને લાગશે મરચાં!

SCO Summit: ચીનના તિયાનજિનમાં શાંઘાઈ કોઓપરેશન ઓર્ગેનાઇઝેશન (SCO) સમિટમાં PM મોદી અને રશિયાના રાષ્ટ્રપતિ વ્લાદિમીર પુતિન 20 દેશોના નેતાઓ સાથે ભેગા થશે. ચીન અને ભારત જે રીતે એકબીજાના ખૂબ જ ઉષ્માભર્યા સ્વાગત માટે રેડ કાર્પેટ પાથરી રહ્યા છે, તે થોડું આશ્ચર્યજનક છે. પહેલા, નવી દિલ્હીમાં ચીનના વિદેશ મંત્રી વાંગ યીનું ઉષ્માભર્યું સ્વાગત કરવામાં આવ્યું અને હવે ચીનથી આવી રહેલા અહેવાલો પ્રમાણે, ચીનના રાષ્ટ્રપતિ શી જિનપિંગ ભારતીય વડાપ્રધાન નરેન્દ્ર મોદી અને રશિયન પ્રમુખ વ્લાદિમીર પુતિનનું સ્વાગત પોતે કરવાના છે.

SCO સમિટમાં ભાગ લેશે PM મોદી

ચીનના સહાયક વિદેશ મંત્રી લિયુ બિને જણાવ્યું કે રશિયન રાષ્ટ્રપતિ વ્લાદિમીર પુતિન, ભારતના PM નરેન્દ્ર મોદી અને અન્ય દેશોના ઘણા નેતાઓ SCO સમિટમાં હાજરી આપશે. આનું આયોજન ચીનના તિયાનજિન શહેરમાં થશે. જણાવી દઈએ કે આ બે દિવસીય સમિટમાં સંયુક્ત રાષ્ટ્રના મહાસચિવ એન્ટોનિયો ગુટેરેસ અને નવ અન્ય આંતરરાષ્ટ્રીય સંગઠનોના વડાઓ પણ ભાગ લેશે.

છેલ્લા સાત વર્ષમાં આ પહેલી એવી તક હશે જ્યારે કોઈ ભારતીય વડાપ્રધાન ચીનની મુલાકાત લેશે. ગલવાન ખીણમાં ભારતીય અને ચીની સૈનિકો વચ્ચે થયેલી હિંસક અથડામણ બાદ, બંને દેશોએ સંબંધોને પાટા પર લાવવા માટે ફરીથી પ્રયાસો તેજ કર્યા છે. અગાઉ, બંને નેતાઓએ છેલ્લે કઝાનમાં યોજાયેલી બ્રિક્સ કોન્ફરન્સ દરમિયાન સ્ટેજ શેર કર્યો હતો. આ વખતે આ સમિટને ગ્લોબલ સાઉથની એકતાનું પ્રતીક માનવામાં આવી રહ્યું છે, ખાસ કરીને એવા સમયે જ્યારે અમેરિકાએ રશિયાથી તેલની આયાતને કારણે ભારત પર ટેરિફ લગાવ્યું છે.

સંયુક્ત ઘોષણાપત્ર પર કરવામાં આવશે હસ્તાક્ષર

SCO સમિટનું આયોજન ચીનના રાષ્ટ્રપતિ શી જિનપિંગ કરી રહ્યા છે. આ સમિટ દરમિયાન, બધા SCO દેશો સંયુક્ત ઘોષણાપત્ર પર હસ્તાક્ષર કરી શકે છે. આ ઉપરાંત, બધા સભ્ય દેશો SCO વિકાસ વ્યૂહરચનાને મંજૂરી આપશે, અને સુરક્ષા અને આર્થિક સહયોગને મજબૂત બનાવવાના પગલાં પર પણ ચર્ચા કરશે. એવું માનવામાં આવે છે કે આ ઘોષણાપત્રમાં યુએસ ટેરિફ નીતિનો યોગ્ય જવાબ આપી શકાય છે.

પીએમ મોદીની હાજરી ખૂબ જ મહત્ત્વપૂર્ણ: ચીન

જણાવી દઈએ કે ભારતમાં ચીનના રાજદૂત શુ ફેઈહોંગે ​​ગુરુવારે કહ્યું કે આ મહિનાના અંતમાં યોજાનારી SCO સમિટ માટે પીએમ મોદીની ચીન મુલાકાત શિખર સંમેલન અને બંને દેશો વચ્ચેના દ્વિપક્ષીય સંબંધો માટે ખૂબ જ મહત્ત્વપૂર્ણ છે. ચીન અને ભારતનું એક કાર્યકારી જૂથ આ મુલાકાતને સફળ બનાવવા માટે તૈયારી કરી રહ્યું છે.

અમેરિકાને ઘેરવાનો પ્રયાસ કરી રહ્યું છે ચીન

ચીનમાં યોજાનારી આ સમિટમાં માત્ર નરેન્દ્ર મોદી અને પુતિન જ નહીં, પરંતુ મધ્ય એશિયા, મધ્ય પૂર્વ, દક્ષિણ એશિયા અને દક્ષિણપૂર્વ એશિયાના ઘણા અન્ય નેતાઓને પણ આમંત્રણ આપવામાં આવ્યું છે. SCOની રચના પછી આ સંમેલન સૌથી મોટું થવાનું છે. ચીનના વિદેશ મંત્રાલયના એક અધિકારીએ તેને "નવા પ્રકારના આંતરરાષ્ટ્રીય સંબંધોની દિશામાં તરફ એક મહત્ત્વપૂર્ણ શક્તિ" ગણાવ્યું છે. અહેવાલ પ્રમાણે, નવી દિલ્હીમાં રશિયન દૂતાવાસના અધિકારીઓએ ગયા અઠવાડિયે કહ્યું હતું કે મોસ્કોને આશા છે કે ચીન અને ભારત સાથે ત્રિપક્ષીય વાટાઘાટો ટૂંક સમયમાં યોજાશે.

આ પણ વાંચો: ટ્રમ્પના ટેરિફ બૉમ્બ વચ્ચે હવે ભારત પાસે માત્ર 4 વિકલ્પ, ત્રીજો તો જાણીને ચોંકી જશો

નોંધનીય છે કે આ સમિટ દ્વારા ચીન અમેરિકાને પોતાની શક્તિ બતાવવાનો પ્રયાસ કરશે. અગાઉ, ચીનના સહાયક વિદેશ મંત્રી લિયુ બિનએ SCO બેઠકને કોઈ ચોક્કસ દેશના ચરિત્રથી અલગ ગણાવી. અમેરિકાનું નામ લીધા વિના, તેમણે કહ્યું કે કેટલાક દેશો પોતાના રાષ્ટ્રીય હિતને બીજાના હિત કરતાં ઉપર રાખવા માંગે છે. આનાથી સ્પષ્ટ થાય છે કે તેમણે અમેરિકા તરફ ઈશારો કર્યો હતો. અમેરિકન રાષ્ટ્રપતિએ દુનિયાના ઘણા દેશો પર ટેરિફ લગાવ્યા છે. લિયુએ દાવો કર્યો કે SCOનો સિદ્ધાંત એકની જીત બીજાની હાર જેવી જૂની વિભાવનાઓથી તદ્દન અલગ છે. તેમણે કહ્યું કે આ સંગઠન સમય સાથે વધુ મજબૂત બન્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ