વિશ્વ / શું યુદ્ધ બંધ થશે? ટ્રમ્પે આપ્યો લશ્કરી કાર્યવાહી બંધ કરવાનો સંકેત, કહ્યું "મિશન ઈરાન" પૂર્ણ થવાના આરે

Donald Trump : મધ્ય પૂર્વમાં ચાલી રહેલા અમેરિકા અને ઈરાન વચ્ચેના તણાવને લઈને એક મહત્વપૂર્ણ નિવેદન સામે આવ્યું છે. અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં સૂચન કર્યું છે કે, અમેરિકાની લશ્કરી કામગીરી હવે સમાપ્તિની નજીક હોઈ શકે છે. આ નિવેદનથી આંતરરાષ્ટ્રીય સ્તરે ચર્ચા તેજ બની છે કે શું હવે આ સંઘર્ષ અંત તરફ જઈ રહ્યો છે?

ટ્રમ્પે પોતાના નિવેદનમાં કહ્યું કે, અમેરિકાએ પોતાના મુખ્ય લશ્કરી લક્ષ્યો લગભગ હાંસલ કરી લીધા છે. તેમના જણાવ્યા અનુસાર, ઈરાનની મિસાઈલ ક્ષમતા, રક્ષણ ક્ષેત્ર અને નૌકાદળ જેવી મહત્વપૂર્ણ વ્યવસ્થાઓને ભારે નુકસાન પહોંચાડવામાં આવ્યું છે. સાથે જ તેમણે આ પણ ભારપૂર્વક જણાવ્યું કે, અમેરિકા ઈરાનને પરમાણુ હથિયાર સુધી પહોંચતા રોકવા માટે પ્રતિબદ્ધ રહેશે.

આ નિવેદનનો એક મહત્વનો પાસો હોર્મુઝ સ્ટ્રેટ અંગે હતો. Strait of Hormuz વિશ્વ માટે ઊર્જા સપ્લાયનો ખૂબ જ અગત્યનો માર્ગ છે. ટ્રમ્પે સૂચવ્યું કે,હવે આ દરિયાઈ માર્ગની સુરક્ષા માટે અન્ય દેશોએ આગળ આવવું જોઈએ, કારણ કે અમેરિકાનો તેનો સીધો ઉપયોગ ઓછો છે. જરૂર પડ્યે અમેરિકા સહાય પૂરી પાડી શકે છે, પરંતુ મુખ્ય જવાબદારી અન્ય દેશોએ સંભાળવી જોઈએ. તેમણે આ પણ જણાવ્યું કે અમેરિકા તેના પ્રાદેશિક સાથી દેશો જેમ કે Israel, Saudi Arabia, Qatar, United Arab Emirates, Bahrain અને Kuwait ની સુરક્ષા માટે આગળ પણ પ્રતિબદ્ધ રહેશે.

આ પણ વાંચો : ટ્રમ્પના દબાણ સામે બ્રિટન ઝૂક્યું! ઈરાન પર હુમલા માટે અમેરિકાને સોંપ્યા સૈન્ય મથકો

હાલમાં, યુદ્ધને લગભગ ત્રણ અઠવાડિયા જેટલો સમય થયો છે અને આ વિસ્તારમાં તણાવ યથાવત છે. જો કે, ટ્રમ્પના નિવેદનથી આશા ઊભી થઈ છે કે કદાચ હવે આ સંઘર્ષમાં ઘટાડો આવી શકે. તેમ છતાં, પરિસ્થિતિ હજી સ્પષ્ટ નથી અને આવનારા દિવસોમાં જ ખરો દિશા જાણી શકાશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ