WAR / ટ્રમ્પના દબાણ સામે બ્રિટન ઝૂક્યું! ઈરાન પર હુમલા માટે અમેરિકાને સોંપ્યા સૈન્ય મથકો

મધ્ય પૂર્વમાં ઇઝરાયેલ અને ઈરાન વચ્ચે ચાલી રહેલા લોહિયાળ જંગમાં હવે બ્રિટને પણ સક્રિય ભૂમિકા ભજવવાની તૈયારી કરી લીધી છે. શુક્રવારે બ્રિટિશ વડાપ્રધાનના કાર્યાલય 'ડાઉનિંગ સ્ટ્રીટ' દ્વારા પુષ્ટિ કરવામાં આવી છે કે સ્ટ્રેટ ઓફ હોર્મુઝમાં આંતરરાષ્ટ્રીય જહાજો પર ઈરાન દ્વારા કરવામાં આવતા મિસાઈલ હુમલાઓને રોકવા માટે અમેરિકા હવે બ્રિટિશ સૈન્ય ઠેકાણાઓનો ઉપયોગ કરી શકશે. આ નિર્ણય પશ્ચિમી દેશો વચ્ચેના સૈન્ય ગઠબંધનને વધુ મજબૂત બનાવે છે, પરંતુ તેની સાથે જ ખાડી દેશોમાં 'મહાયુદ્ધ' ફાટી નીકળવાના સંકેતો પણ મળી રહ્યા છે. બ્રિટિશ સરકારે સ્પષ્ટ કર્યું છે કે આ પગલું સામૂહિક આત્મરક્ષાના ભાગરૂપે લેવામાં આવ્યું છે જેથી વૈશ્વિક વેપાર માર્ગો સુરક્ષિત કરી શકાય.

ચોંકાવનારી વાત એ છે કે થોડા દિવસો પહેલા જ બ્રિટિશ વડાપ્રધાન કીયર સ્ટારમરે અમેરિકાની આ માંગને ફગાવી દીધી હતી. તે સમયે તેમણે દલીલ કરી હતી કે કોઈ પણ સૈન્ય કાર્યવાહી કરતા પહેલા તેનું કાયદાકીય પાસું તપાસવું જરૂરી છે અને બ્રિટન સીધી રીતે કોઈ મોટા યુદ્ધનો હિસ્સો બનવા માંગતું નથી. જોકે, ઈરાન દ્વારા ખાડી દેશોમાં બ્રિટિશ સહયોગીઓ અને જહાજો પર કરવામાં આવેલા તાજેતરના આક્રમક હુમલાઓએ લંડનને પોતાની નીતિ બદલવા માટે મજબૂર કર્યું છે. આ સમજૂતી હેઠળ અમેરિકી વાયુસેના હવે બ્રિટિશ બેઝ 'આરએએફ ફેરફોર્ડ' અને હિંદ મહાસાગરમાં સ્થિત અત્યંત વ્યૂહાત્મક મથક 'ડીએગો ગાર્સિયા'નો ઉપયોગ ઈરાની સૈન્ય ઠેકાણાઓ પર હુમલો કરવા માટે કરી શકશે.

રોઇટર્સના અહેવાલ મુજબ, બ્રિટનનો આ નિર્ણય રાજદ્વારી રીતે પણ ખૂબ જ મહત્વનો છે. તાજેતરમાં જ અમેરિકી રાષ્ટ્રપતિ ડોનાલ્ડ ટ્રમ્પે બ્રિટનની આલોચના કરતા તેને નિરાશાજનક સાથી ગણાવ્યો હતો. ટ્રમ્પના આ નિવેદન બાદ બ્રિટન પર દબાણ વધ્યું હતું કે તે અમેરિકાની સૈન્ય રણનીતિમાં સહકાર આપે. બ્રિટિશ સરકારના આ તાજા નિર્ણયથી ટ્રમ્પ સાથેના સંબંધોમાં તો સુધારો થઈ શકે છે, પરંતુ તેના પોતાના દેશમાં વિરોધના સુર ઉઠી રહ્યા છે. બ્રિટનમાં થયેલા એક સર્વે મુજબ, મોટી સંખ્યામાં સ્થાનિક નાગરિકો આ યુદ્ધમાં બ્રિટનની સીધી સંડોવણી અને અમેરિકા-ઇઝરાયેલની સૈન્ય કાર્યવાહીની વિરુદ્ધમાં છે.

આ પણ વાંચોઃ મધ્ય પૂર્વમાં તણાવ વધતા DGCA સતર્ક, 11 દેશોના હવાઈ ક્ષેત્ર ટાળવા સૂચના

સૈન્ય મથકોની મંજૂરી આપવાની સાથે બ્રિટિશ સરકારે શાંતિની અપીલ પણ કરી છે. ડાઉનિંગ સ્ટ્રીટના નિવેદનમાં કહેવામાં આવ્યું છે કે તેઓ ઈચ્છે છે કે તણાવ તાત્કાલિક ઓછો થાય અને આ યુદ્ધનો જલ્દી ઉકેલ આવે. જોકે, નિષ્ણાતો માને છે કે અમેરિકાને સૈન્ય બેઝ સોંપવાથી ઈરાન વધુ ઉશ્કેરાઈ શકે છે અને તે હોર્મુઝની સામુદ્રધુનીને સંપૂર્ણપણે બ્લોક કરવાની કોશિશ કરી શકે છે, જે વિશ્વ માટે મોંઘવારી અને આર્થિક મંદીનું કારણ બની શકે છે. હવે આખી દુનિયાની નજર ઈરાનના વળતા પ્રહાર પર ટકેલી છે કે તે બ્રિટનના આ નિર્ણયને કેવી રીતે લે છે અને આંતરરાષ્ટ્રીય જળસીમામાં તણાવ કઈ હદે વધે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ