વિશ્વ / ટ્રમ્પનો હમાસને ચેતાવણીભર્યો સંદેશ, “હથિયાર મૂકો નહીં તો અમે મજબૂર કરીશું”

મંગળવારે અમેરિકાના રાષ્ટ્રપતિ ડોનાલ્ડ ટ્રમ્પે કહ્યું કે હમાસે પોતાના શસ્ત્રો સોંપી દેવા જોઈએ, નહીં તો અમેરિકા તેને હથિયાર મૂકવા માટે “મજબૂર” કરશે. ટ્રમ્પે કહ્યું કે જો હમાસ એ ન કરે, તો પગલાં “ઝડપથી અને કદાચ હિંસક રીતે” લેવામાં આવશે. તેમણે સ્પષ્ટતા કરી કે આ સંદેશ સીધી વાતચીતથી નહીં, પરંતુ “મારા લોકો દ્વારા, ઉચ્ચતમ સ્તરે” પહોંચાડવામાં આવ્યો છે.

ટ્રમ્પ વ્હાઇટ હાઉસમાં આર્જેન્ટિનાના રાષ્ટ્રપતિ જાવિઅર મેલી સાથેની મુલાકાત દરમિયાન બોલતા હતા. તેમણે કહ્યું કે, “હમાસ જાણે છે કે હું કોઈ રમત નથી રમતો.” ઓક્ટોબર 2023ના હુમલા પછીથી હમાસ પર ઇઝરાયલ અને અમેરિકા બંનેની તીવ્ર ટીકા થઈ રહી છે. કારણ કે હમાસે હુમલામાં મૃત્યુ પામેલા ઇઝરાયલી બંધકોના મૃતદેહો હજુ સુધી પરત કર્યા નહોતા.

યુદ્ધવિરામ કરાર

આ દરમિયાન હમાસે વધુ ચાર મૃત બંધકોના અવશેષો સોંપ્યા છે. સોમવારે યુદ્ધવિરામ કરાર હેઠળ, હમાસે બાકી રહેલા 20 જીવતા બંધકોને મુક્ત કર્યા હતા, જ્યારે ઇઝરાયલે હજારો પેલેસ્ટિનિયન કેદીઓને છોડ્યા હતા. ઇઝરાયલી સેનાએ કહ્યું કે રેડ ક્રોસ મારફતે આ ચાર મૃતદેહો ગાઝાથી ઇઝરાયલ પરત લાવવામાં આવ્યા છે. આ પગલું ગાઝા પટ્ટીમાં ચાલી રહેલા બે વર્ષના યુદ્ધને સમાપ્ત કરવા તરફનું મહત્વપૂર્ણ પગલું ગણાય છે.

ચીન સાથેના સંબંધો

ટ્રમ્પે આ મુલાકાત દરમિયાન ચીન સાથેના સંબંધો વિશે પણ વાત કરી. તેમણે કહ્યું, “ચીન સાથે આપણો સાવધન અભિગમ રાખવો પડશે. રાષ્ટ્રપતિ શી સાથે મારા સંબંધો સારા છે, પણ ક્યારેક ચીન લોકોનો ફાયદો ઉઠાવે છે. તેમ છતાં, આપણાં સંબંધો સ્થિર છે અને મને લાગે છે બધું સારું જશે.”

આ પણ વાંચો : શાહબાઝ શરીફ બન્યા ચાપલૂસીના ચેમ્પિયન, ડોનાલ્ડ ટ્રમ્પના કર્યા ભરપેટ વખાણ, જુઓ વીડિયો

આ સાથે જ ટ્રમ્પે આર્જેન્ટિના અંગે પણ ચેતવણી આપી. તેમણે કહ્યું કે જો રાષ્ટ્રપતિ જાવિઅર મેલી ચૂંટણી હારી જાય, તો અમેરિકા હવે આર્જેન્ટિનાપ્રત્યે “ઉદાર” નહીં રહે. તેમણે સંકેત આપ્યો કે અમેરિકા દ્વારા આર્જેન્ટિનાને મળતી સહાય બંધ થઈ શકે છે. સાથે જ મેલીના વિરોધીની ટીકા કરતાં કહ્યું કે તે “ખૂબ જ ડાબેરી વિચારધારાવાળા છે” અને દેશની ખરાબ આર્થિક પરિસ્થિતિ માટે જવાબદાર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ