તમારા કામનું / આજે જ પતાવી લેજો આ 6 કામ, નહીં તો ભરવો પડશે ભારે ટેક્સ

Financial Year End: નાણાકીય વર્ષ 2025-26 આજે 31 માર્ચ 2026ના રોજ સમાપ્ત થઈ રહ્યું છે. તો આજે જ તમારા ફાઇનાન્સિયલ પ્લાનિંગ સાથે જોડાયેલા મહત્વપૂર્ણ કામો પૂરા કરવા હવે અત્યંત જરૂરી બની ગયું છે. ટેક્સ ફાઇલિંગ, ઇન્વેસ્ટમેન્ટ પ્રૂફ સબમિશન અથવા અન્ય નાણાકીય જવાબદારીઓમાં જો કોઈ કાર્ય બાકી હોય તો આજે જ તેને પૂરી કરી દો કારણ કે સમયસર કાર્યવાહી ન કરવાથી વધારાનો ટેક્સ, વ્યાજ અથવા દંડ ભરવાનો વારો આવી શકે છે. પોતાના નાણાકીય વ્યવહારને જાળવી રાખવા માટે આ છેલ્લી તકને અવગણવી નહીં અને સમજદારીપૂર્વક બાકી રહેલા તમામ કાર્યો આજે જ પૂરા કરવા જોઈએ.

એડવાંન્સ ટેક્સનો હિસાબ કરો

જો તમારી કુલ ટેક્સની રકમ 10000 રૂપિયાથી વધુ હોય તો નાણાકીય વર્ષ દરમિયાન એડવાન્સ ટેક્સ ચૂકવવો કાનૂની રીતે ફરજિયાત બને છે. ઘણીવાર લોકો આ બાબતને અવગણે છે. પરંતુ તે આગળ જઈને વધારાના ખર્ચનું કારણ બની શકે છે. જો તમે સમયસર એડવાન્સ ટેક્સ ચૂકવતા નથી તો તમારે વ્યાજ ભરવું પડી શકે છે. અને 31 માર્ચ સુધીમાં પૂરતી રકમ જમા ન કરવાથી વધારાના વ્યાજનો બોજ પણ વધે છે. તેથી અનાવશ્યક દંડથી બચવા માટે તમારી કર જવાબદારીની તાત્કાલિક ગણતરી કરીને બાકી રકમ શક્ય તેટલી વહેલી તકે જમા કરાવવી વધુ યોગ્ય છે.

ટેક્સ બચતની છેલ્લી તક

જો તમે હજુ પણ જૂના ટેક્સ માળખા મુજબ ભરી રહ્યા છો તો ટેક્સ બચાવવાના અનેક અસરકારક વિકલ્પો તમારા માટે ઉપલબ્ધ છે. PPF, ELSS, જીવન વીમા, NSC અને ટેક્સ સેવિંગ FD જેવી યોજનાઓમાં રોકાણ કરીને તમે તમારી કર જવાબદારીમાં નોંધપાત્ર ઘટાડો કરી શકો છો. આ ઉપરાંત NPSમાં વધારે બચત કરવાથી તમને વધારાની ટેક્સમાં રાહત મળી શકે છે. આરોગ્ય વીમાના પ્રીમિયમ પર પણ કર છૂટ મળે છે. જે તમારા ખર્ચને ઘટાડવામાં મદદરૂપ બને છે. તેથી સમય બગાડ્યા વગર આ તમામ વિકલ્પોનો ઉપયોગ કરીને સમજદારીપૂર્વક ટેક્સ બચાવવાનો લાભ લેવું યોગ્ય રહેશે.

નોકરી બદલી હોય તો આ કામ ના ભુલશો

જો તમે આ નાણાકીય વર્ષ દરમિયાન નોકરી બદલી હોય તો એક અગત્યનું કામ એવું છે જેને ઘણા લોકો અવગણતા હોય છે. નવી કંપનીમાં જોડાયા બાદ તમારે તમારી અગાઉની નોકરીમાંથી મેળવેલા પગાર અને આવકની સંપૂર્ણ વિગતો નવા એમ્પ્લોયરને આપવી જરૂરી છે. જો તમે આવું નહીં કરો તો તમારા કુલ આવકની સાચી ગણતરી થઈ શકશે નહીં અને પરિણામે ITR ફાઇલ કરતી વખતે તમને વધારાનો ટેક્સ ચૂકવવાનો વારો આવી શકે છે. તેથી અનાવશ્યક મુશ્કેલી અને વધારાના ખર્ચથી બચવા માટે આ માહિતી સમયસર આપવી ખૂબ જ જરૂરી છે.

PPF અને સુકન્યા એકાઉન્ટને એક્ટિવેટ રાખો

ઘણા લોકો PPF અથવા સુકન્યા સમૃદ્ધિ યોજનામાં ખાતું તો ખોલાવે છે પરંતુ દર વર્ષે જરૂરી ન્યૂનતમ રકમ જમા કરવાનું ભૂલી જાય છે. જેના કારણે ખાતું નિષ્ક્રિય બનવાની શક્યતા રહે છે. એકવાર ખાતું નિષ્ક્રિય થઈ જાય પછી તેને ફરી સક્રિય કરવા માટે વધારાનો દંડ અથવા ફી ચૂકવવી પડે છે. તેથી આવી મુશ્કેલીથી બચવા માટે નાણાકીય વર્ષ પૂર્ણ થાય તે પહેલાં જરૂરી લઘુત્તમ રકમ સમયસર જમા કરાવવી ખૂબ જ જરૂરી છે.

MSME પેમેન્ટમાં મોડું ના કરશો

જો તમે વ્યવસાય ચલાવતા હો અને નાના કે મધ્યમ ઉદ્યોગો (SMEs) પાસેથી માલ અથવા સેવાઓ ખરીદતા હો તો તેમને સમયસર ચુકવણી કરવી ખૂબ જ આવશ્યક છે. નિર્ધારિત સમયમર્યાદામાં ચૂકવણી ન કરવાથી તે ખર્ચ પર મળતા કર લાભો ગુમાવી શકાય છે. જેના કારણે તમારી કુલ કર જવાબદારી વધવાની શક્યતા રહે છે. તેથી ભવિષ્યમાં વધારાના કરબોજથી બચવા માટે તમારી બધી બાકી ચુકવણીઓની સમીક્ષા કરીને તેને શક્ય તેટલી વહેલી તકે ચૂકવી દેવી સમજદારીભર્યો નિર્ણય ગણાય.

આ પણ વાંચો: શું તમારા પણ ફોનની બેટરી ફટાફટ ખતમ થઈ જાય છે?, જાણી લો આ ટ્રિક

કેપિટલ ગેન અને લોસનું રાખો ધ્યાન

આજે તમારા તમામ રોકાણ ખાતાઓની સંપૂર્ણ સમીક્ષા કરવી અત્યંત જરૂરી છે જેથી તમે શેર અથવા મ્યુચ્યુઅલ ફંડમાંથી મળેલા નફા કે થયેલા નુકસાનની સ્પષ્ટ સમજ મેળવી શકો. જો ક્યાંક નુકસાન થયું હોય તો તેને નફા સામે એડજસ્ટ કરીને કરમાં બચત કરવાની તક મેળવી શકાય છે. આવી સમજદારીભરી વ્યૂહરચના અપનાવવાથી તમારી કુલ કર જવાબદારીને અસરકારક રીતે ઘટાડવામાં મદદ મળે છે. તેથી સમયસર આ પ્રક્રિયા પૂર્ણ કરવી મહત્વપૂર્ણ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ