મહામારી / હકીકતમાં ભારતમાં કોરોનાથી 42 લાખ લોકોના મોત, વિશ્વના સૌથી જાણીતા અખબારનો ચોંકાવનારો દાવો

• અમેરિકાના પ્રતિષ્ઠિત અખબાર ન્યૂયોર્ક ટાઈમ્સનો દાવો
• ભારતમાં કોરોનાથી 42 લાખ લોકોના મોત થયા
• સત્તાવાર રીતે તો ભારતમાં 3 લાખ લોકોના મોત 
• ત્રણ નેશનલ સીરો સરવે, 12 એક્સપર્ટના અભિપ્રાયને આધારે દાવો 

ભારતમાં કોરોનાથી થનાર મોતના આંકડા પર અવારનવાર સવાલ ઉઠતાં રહ્યાં છે. સરકારી આંકડાઓને પણ ખોટા ગણાવાઈ રહ્યાં છે. સ્મશાન ઘાટો અને નદીઓની તસવીર સરકારી ડેટાને ખોટા ઠેરવી રહી હોવાનું લાગી રહ્યાં છે. સરકારી આંકડામાં તો 3 લાખ લોકોના કોરોનાથી મોત થયાં હોવાનુ જણાવાય છે. અમેરિકી અખબાર ન્યૂયોર્ક ટાઈમ્સે પણ કોરોનાથી મોતના આંકડાને ખોટા ઠેરવી દીધા છે. 

જે આંકડા સરકાર આપી રહી છે તે હકીકત કરતા અલગ

ન્યૂયોર્ક ટાઈમ્સની 25 મેએ પ્રસિદ્ધ ખબરમાં જણાવાયું છે કે જે આંકડા સરકાર આપી રહી છે તે હકીકત કરતા અલગ છે. સરકારી ડેટા કહે છે કે કોરોનાથી ભારતમાં મરનાર લોકોની સંખ્યા 3.07 ટકા છે પરંતુ ન્યૂયોર્ક ટાઈમ્સને મોતની ટકાવારી 14 ગણી વધારે લાગી રહી છે એટલે કે ભારતમાં 42 લાખ લોકોના મોત થયા હોવાનો અખબારનો દાવો છે. 

ત્રણ નેશનલ સીરો સરવે, 12 એક્સપર્ટના અભિપ્રાયને આધારે કરાયો આ દાવો 

ન્યૂયોર્ક ટાઈમ્સે ત્રણ નેશનલ સીરો સરવેના અધ્યયનની ઉપરાંત 12 એક્સપર્ટના અભિપ્રાયને આધારે આ તારણ આપ્યું છે.

ગામડાઓમાં થનાર મોતના આંકડાને સરકારી રેકોર્ડમાં સામેલ કરાતા નથી 

અખબારે જણાવ્યુંકે ભારતમાં સારી રીતે ટેસ્ટિંગ થતું નથી કે મોતના આંકડાનો પણ સારી રીતે રેકોર્ડ રાખવામાં આવતો નથી. કોરોનાના દર્દીઓ ઘેર જ મરી રહ્યાં છે. ગામડાઓમાં થનાર મોતના આંકડાને સરકારી રેકોર્ડમાં સામેલ કરાયા નથી. 

અડધું ભારત કોરોનાની ઝપટમાં

અમેરિકાના આ અખબારનું એવું પણ કહેવું છે કે અડધું ભારત કોરોનાની ઝપટમાં છે પરંતુ સરકાર આ હકીકતને છુપાવી રહી છે જેનાથી પરિસ્થિતિ વધારે બગડી રહી છે.