ખુલાસો / હેલ્મેટ માટે ખિસ્સા ખંખેરતી ગુજરાત પોલીસ પોતે દંડ ભરતી નથી, હજુ 2019નો હિસાબ બાકી!

• વાહનચાલકોનાં ખિસ્સાં ખંખેરતી પોલીસ પોતે જ દંડ નથી ભરતી
• પોલીસકર્મીઓને ફરજમાં બેદરકારી બદલ ફટકારાઈ હતી નોટિસ
• વર્ષ 2019થી અત્યાર સુધીમાં માત્ર 50 ટકા જ દંડ વસૂલાયો

રસ્તા પર ઉભા રહીને વાહનચાલકો પાસેથી રોજ હજારો-લાખો રૂપિયાનું ઉઘરાણું કરતી સુરત પોલીસ પોતે જ દંડ ભરવામાં આળસું છે. વારંવાર નોટીસો મોકલવામાં આવી હોવા છતાં સુરત પોલીસે હજુસુધી લાખો રૂપિયાનો દંડ સરકારની તિજોરીમાં જમા નહીં કરાવ્યો હોવાનો ચોંકાવનારો ખુલાસો આરટીઆઈ (RTI) માં થયો છે.

ફરજમાં બેદરકારી બદલ પોલીસકર્મીઓને પણ દંડ ભરવાનો હોય છે

સુરતમાં પોલીસ કર્મચારીઓની દંડની મોટી રકમ બાકી હોવાની વિગત સામે આવી છે. મહત્વનું છે કે, છેલ્લા 3 વર્ષમાં શહેર પોલીસમાં ફરજ બજાવતા પોલીસ કર્મચારીઓ પૈકી 6442થી વધુ કર્મચારીઓને ફરજમાં બેદરકારી બદલ નોટિસ ફટકારાઈ હતી. ત્યારે વર્ષ 2019થી અત્યાર સુધી માત્ર 50 ટકા જ દંડ વસૂલાયો છે. મહત્વનું છે કે, ફરજમાં બેદરકારી બદલ પોલીસકર્મીઓને પણ દંડ ભરવાનો હોય છે. 

2019માં 3,151 પોલીસકર્મીઓને નોટિસ ફટકારાઈ હતી

અત્રે નોંધનીય છે કે, વર્ષ 2019માં 3 હજાર 151 પોલીસકર્મીઓને નોટિસ ફટકારાઈ હતી. તો વર્ષ 2020માં 1 હજાર 818 પોલીસકર્મીઓને નોટિસ ફટકારાઈ હતી જ્યારે વર્ષ 2021માં 2 હજાર 555 પોલીસકર્મીઓને નોટિસ ફટકારાઈ હતી.

ઝોન-1માં 3 વર્ષમાં 33 લાખ 32 હજાર 850 જેટલો દંડ ફટકારવામાં આવ્યો

ઝોન-1માં 3 વર્ષમાં 33 લાખ 32 હજાર 850 જેટલો દંડ ફટકારવામાં આવ્યો હતો. સુનાવણી બાદ આખરી હુકમ મુજબ 18.10 લાખ દંડની રકમ થઇ હતી. જેમાંથી 9 લાખ 13 હજાર 374 જેટલાં અલગ-અલગ પોલીસ સ્ટેશને દંડ સ્વીકાર્યો હતો. ઝોન-2માં કુલ 6.60 લાખ દંડ વસૂલવામાં આવ્યો.

ઝોન-3 અને ઝોન-4એ માહિતી જ ન આપી

ઝોન-3માં 3 વર્ષ દરમિયાન ફરજમાં બેદરકારી બદલ કુલ 1555 નોટીસ અપાઈ છે. ત્યારે માહિતી અધિકાર અધિનિયમની છટકબારીનો ઉપયોગ કરીને ઝોન -૩ ના નાયબ પોલીસ કમિશ્નરે રકમ અંગે કોઈ માહિતી જ નથી આપી. જ્યારે ઝોન-4માં માહિતી આપવાનો ઇનકાર કરાયો હતો. ઝોન -3 અને 4ના પ્રથમ અપીલ અધિકારી એવાં અધિક પોલીસ કમિશ્નરે પણ માહિતી આપવાનું નકારી દીધું હતું.