સાવધાન! / માણસો જેવો વ્યવહાર કરવા લાગ્યા છે બૉટ્સ: તમારી પ્રાઈવસી પર પણ છે ખતરો

• બૉટ્સ મનુષ્યોની વધુ સારી રીતે નકલ કરવા માટે વિકસિત થઈ રહ્યા છે
• સંશોધનકારોએ સોશિયલ મીડિયાના 2,50,000 એવા યુઝર્સનો અભ્યાસ કર્યો
• આ બૉટ્સ એક સૉફ્ટવેર એપ્લિકેશન છે

સંશોધનકારોએ જણાવ્યું કે, અમારો વિચાર એ વાતની પુષ્ટિ કરે છે કે, બૉટ્સ અને ડિટેક્શન અલ્ગોરિધમ વચ્ચે કોઈ હરિફાઈ ચાલી રહી છે. ડિટેક્શન અલ્ગોરિધમ તેને કહે છે, જે કોઈ બૉટ્સ કે ફેક એકાઉન્ટને ઇન્ટરનેટમાં એક્સેસ કરવાથી રોકે છે. જેમ કે કેપ્ચા કૉડ. જેમ જેમ સોશિયલ મીડિયા કંપનીઓ પોતાની વેબસાઇટ્સને અનધિકૃત પ્રવેશથી બચાવવા માટે ટેક્નિકો લાવી રહી છે તેમ તેમ બૉટ્સ મનુષ્યોની વધુ સારી રીતે નકલ કરવા માટે વિકસિત થઈ રહ્યા છે.

અભ્યાસના લેખક એમિલિયો ફેરારાએ કહ્યું કે, આર્ટિફિશિયલ ઈન્ટેલિજન્સ બૉટ્સને ઘૂસણખોરી કરવા માટે વિકસિત કરી રહ્યું છે. પોતાના અભ્યાસમાં સંશોધનકારોએ સોશિયલ મીડિયાના 2,50,000 એવા યુઝર્સનો અભ્યાસ કર્યો હતો, જેમણે 2016-18ની અમેરિકી ચૂંટણીઓ પર ચર્ચા કરી હતી. આ દરમિયાન, સંશોધનકારોએ 30,000થી વધુ બૉટ્સ શોધી કાઢ્યા હતા. આ બૉટ્સ ટ્વીટ અને રીટ્વીટ પણ કરે છે. તેઓ કહે છે કે, ભવિષ્યમાં યોજાનારી ચૂંટણીઓમાં આ બૉટ્સ નવો પડકાર રજૂ કરશે. તેમને રોકવા ખુબ જરૂરી છે અને સાથે સાથે ખૂબ જ મુશ્કેલ પણ છે.

આ બૉટ્સ આખરે શું છે?

હકીકતમાં આ બૉટ્સ એક સૉફ્ટવેર એપ્લિકેશન હોય છે. જે ઇન્ટરનેટ પર સ્વચાલિત (પોતાની રીતે જ) કાર્યો કરે છે. ઉદાહરણ તરીકે, જો તમે ઇચ્છો છો કે, તમારા જન્મદિન પર સોશિયલ મીડિયામાં શુભેચ્છાઓ અને અભિનંદન આપનારા તમામ લોકો સુધી તમારા તરફથી ઑટોમેટિક ‘ધન્યવાદ’ (Thanks)નો સંદેશ પહોંચી જાય તો આ કામ ખાસ પ્રકારની સૉફ્ટવેર એપ્લીકેશન બનાવીને સરળતાથી કરી શકાય છે. આ એપ્લિકેશન અભિનંદનનો મેસેજ જોતાની સાથે જ આભારનો મેસેજ આપે છે. આ બૉટ્સને જ્યારે આર્ટિફિશિયલ ઇન્ટેલિજન્સથી સજ્જ કરવામાં આવે છે ત્યારે તે ઇન્ટરનેટની આભાસી દુનિયામાં મનુષ્યોની જેમ જ વ્યવહાર કરે છે અને એ રીતે જ વર્તે પણ છે.