કાયદો / તિજોરીઓમાંથી સાડા ત્રણ સો કરોડ રૂપિયા મળ્યા રોકડા, છતાં કોંગ્રેસ નેતા ધીરજ સાહુની હજુ સુધી કેમ નથી થઈ ધરપકડ? જાણો શું કહે છે નિયમ

• 351 કરોડ જપ્ત કર્યા બાદ પણ ધીરજ સાહૂની નથી થઈ ધરપકડ
• 2021માં પીયૂષ જૈનની તાત્કાલિક કરવામાં આવી હતી ધરપકડ
• 11 મહિના બાદ હાઈકોર્ટે પીયષ જૈનને આપી જામીન

ઈનકમ ટેક્સ વિભાગે સાંસદ ધીરજ પ્રસાદ સાહૂનાં સ્થાન પરથી આશરે સાડા ત્રણ સો કરોડથી વધારેની રોકડ જપ્ત કરી છે. આ કાર્યવાહી બાદ કાનપુરમાં અત્તરનાં બિઝનેસમેન પીયૂષ જૈનનો મામલો પણ ફરી ચર્ચામાં આવી ગયો છે. ડિસેમ્બર 2021માં GST DGGIએ પીયૂષ જૈનનાં સ્થાન પર છાપેમારી કરી હતી. ત્યારે DGGIએ જૈન પાસેથી 197 કરોડ રૂપિયા કેશ અને 23 કિલો સોનું જપ્ત કર્યું હતું.

પીયૂષ જૈનને મળી જામીન
આ મામલામાં તપાસ એજન્સીએ બિઝનેસમેનને 497 કરોડ રૂપિયાની પેનલ્ટી નોટિસ ફટકારી હતી. આ સિવાય આટલી મોટી કેશની રકમ મળવા પર પીયૂષ જૈનની ધરપકડ કરી લેવામાં આવી હતી. હાલમાં તેઓ જામીન પર છે. 11 મહિના બાદ તેમને હાઈકોર્ટમાંથી જામીન મળી હતી. ધીરજ સાહૂનાં મામલામાં અધિકારીઓ કહી રહ્યાં છે કે કોઈપણ તપાસ એજન્સી દ્વારા એક જ ઓપરેશનમાં જપ્ત કરવામાં આવેલ આ સૌથી મોટું કાળું નાણું છે. પણ આટલી મોટી ધનરાશિ જપ્ત કર્યા બાદ પણ ધીરજ સાહૂની ધરપકડ શા માટે નથી કરવામાં આવી? 

ઈનકમ ટેક્સ એક્ટ-1961
કોંગ્રેસ સાંસદ ધીરજ સાહૂને ત્યાં જે છાપેમારી કરવામાં આવી તે ઈનકમ ટેક્સ વિભાગે કરી છે અને ઈનકમ ટેક્સ એક્ટ-1961 અનુસાર આયકર વિભાગ પાસે ધરપકડ કરવાનાં અધિકાર નથી હોતાં. આ એક્ટ અંતર્ગત છાપેમારી અને અન્ય કોઈ કાર્યવાહીમાં ધરપકડ કરવાનું કોઈ પ્રાવધાન નથી આપવામાં આવ્યું. વધુમાં વધુ તપાસ સમાપ્ત થયાં બાદ અસેસમેંટ અને પ્રોસિક્યૂશન કરી શકાય છે અને કોર્ટ દ્વારા સજા આપી શકાય છે.

પીયૂષ જૈનની ધરપકડ GST વિભાગ દ્વારા થઈ હતી
અત્રે ઉલ્લેખનીય છે કે પીયૂષ જૈન પર જે કાર્યવાહી કરવામાં આવી હતી તે કેન્દ્રીય જીએસટી વિભાગની ઈંટેલિજેંસ યૂનિટ દ્વારા થઈ હતી. CGST સેક્શન 69 અંતર્ગત ધરપકડ કરવાનું પ્રાવધાન છે જે જીએસટી વિભાગને તાત્કાલિક ધરપકડ કરવાનો પાવર આપે છે. આ જ નિયમ હેઠળ પીયૂષ જૈનની ધરપકડ કરવામાં આવી હતી અને 11 મહિના બાદ હાઈકોર્ટે તેમને જામીન આપી હતી.

ધીરજ સાહૂની ધરપકડ ક્યારે થઈ શકે છે?
ધીરજ સાહૂની ધરપકડ ત્યારે જ સંભવ છે જ્યારે એનફોર્સમેંટ ડાયરેક્ટરેટ કે CBI જેવી એજન્સી તેમાં કેસ નોંધી અને તપાસ શરૂ કરે. જો એજન્સીને લાગે છે કે આ મામલામાં મની લોન્ડેરિંગ થયું છે અથવા તો કોઈ ક્રિમિનલ એક્ટિવિટી થઈ છે તો ED અથવા CBI આ મામલામાં કેસ નોંધી અને ધીરજ સાહૂની ધરપકડ કરી શકે છે.