ગાંધીનગરમાં વર્ગ-3નો કર્મચારી 2000 કરોડનો આસામી હોવાનો કોંગ્રેસના પાટણના ધારાસભ્ય કિરીટ પટેલે ગંભીર આરોપ લગાવ્યો હતો. આ અંગે કિરીટ પટેલે ગાંધીનગર કલેકટર અને મુખ્યમંત્રી પત્ર લખ્યો હતો. ધારાસભ્યએ કહ્યું હતું કે, મારી પાસે 50 ટકાથી વધુનો પુરાવો છે. જોકે આ અંગે અત્યાર સુધીમાં કોઇ કાર્યવાહી કરવામાં નથી આવી. ત્યારે હવે કથિત 2000 કરોડના આસામી અધિકારી પર VTV News દ્વારા મોટો ખુલાસો કરવામાં આવ્યો છે. જાણો કયા અધિકારી પર 2000 કરોડની સંપત્તિ હોવાનો ધારાસભ્ય દ્વારા આક્ષેપ કરવામાં આવ્યો છે.
કથિત 2,000 કરોડના આસામી અધિકારી પર VTV Newsનો ખુલાસો
ધારાસભ્યએ ગુંડા એક્ટ અને ભૂમાફિયા એક્ટના પ્રથમ કેસની શરૂઆત સરકાર તેના નાક નીચેથી કરે તેવી માંગણી કરી છે. ધારાસભ્ય કિરીટ પટેલ પાસે વર્ગ-3ના કર્મચારીની વિગતો છે. ત્યારે ધારાસભ્ય કિરીટ પટેલે લગાવેલા આક્ષેપનો મામલે VTV News દ્વારા ખુલાસો કરવામાં આવ્યો છે. રિટાયર્ડ ડેપ્યુટી મામલતદાર વીરમ દેસાઇ 2,000 કરડોની સંપત્તિના આસામી હોવાનો ધારાસભ્ય કિરીટ પટેલે આરોપ લગાવ્યો છે. મળતી માહિતી અનુસાર, વીરમ દેસાઇના પરિવારની ગાંધીનગરમાં કરોડોની સંપતિ છે. ગાંધીનગરના એક IPS અધિકારી વીરમ દેસાઈને છાવરી રહ્યા છે.
કથિત 2,000 કરોડના આસામી અધિકારી પર VTV Newsનો ખુલાસો
ગાંધીનગર સેક્ટર-7માં 3 બંગલા હોવાની ચર્ચા છે. જેમાં એક બંગલાની કિંમત 6 કરોડ રૂપિયા છે. ગાંધીનગર સેક્ટર-4માં બ્રિજ આર્કડમાં 107 ફ્લેટની સ્કીમ હોવાની પણ ચર્ચા છે. મહેસાણાના લાંઘણજમાં 60 વીઘા જમીન હોવાનો ધારાસભ્ય કિરીટ પટેલે વીરમ દેસાઇ પર ગંભીર આરોપ લગાવ્યો છે. ગાંધીનગરના અંબાપુરમાં બ્રિજ રેસિડન્સીમાં પણ વીરમ દેસાઇનું રોકાણ છે. તો સરગાસણમાં સત્યમેવ ફેમોસા સ્કીમ પણ દેસાઇની હોવાનો આરોપ છે. જ્યારે કુડાસણમા 7 વિઘા જમીન જેની કરોડો રૂપિયા કિંમત છે. સાથે વીરમ દેસાઇ પાસે ફોરચ્યુનર-જેગુઆર જેવી મોંઘી ગાડીઓ પણ છે.
મુખ્યમંત્રી આ કર્મચારીની તપાસ કરાવશે તો હું અભિનંદન આપીશ: ધારાસભ્ય કિરીટ પટેલ
કિરીટ પટેલે કહ્યું કે, જો કાર્યવાહી થશે તો ગુજરાતના ઇતિહાસમાં પ્રથમ એવો ગુનો નોંધાશે જેની નોંધ પ્રધાનમંત્રીએ પણ લેવી પડશે. પાટણના ધારાસભ્ય કિરીટ પટેલે કર્મચારી પર ગંભીર આરોપ લગાવ્યા છે કે IAS-IPSની હરોળમાં વર્ગ-3નો કર્મચારી રહે છે. એક IPSની મદદથી ખાનગી ડૉક્ટર પાસેથી 100 કરોડની કિંમતી સરકારી જમીનનો કબજો કર્મચારી પાસે છે. ગાંધીનગર કલેક્ટર ઓફિસમાં આ કર્મચારીએ ધો-10ની નકલી માર્કશીટથી નોકરી મેળવી છે. કિરીટ પટેલે આ કર્મચારી સત્તાના જોરે પત્નીને ખેડૂત ખાતેદાર બનાવ્યાનો આરોપ લગાવ્યો છે. 302નો આરોપ હતો પણ પૈસાના જોરે ફરિયાદમાંથી નામ કઢાવ્યાનો આરોપ લગાવ્યો છે. કિરીટ પટેલે કહ્યું કે, મુખ્યમંત્રી આ કર્મચારીની તપાસ કરાવશે તો હું અભિનંદન આપીશ.
કિરીટ પટેલે મીડિયા સમક્ષ કહ્યું હતું કે, જો સરકાર અને લાંચ રૂશ્વત બ્યુરોની ઇચ્છાશક્તિ હોય તો હું આ કર્મચારીની મિલ્કતોની તમામ વિગતો આપવા તૈયાર છું. પરંતુ મુખ્યમંત્રી અને લાંચ રૂશ્વત વિરોધી સાચા મનથી તપાસ કરે તો આ દેશનો વર્ગ 3નો પ્રથમ એવો કેસ સાબિત થશે કે ભ્રષ્ટાચારનો આંકડો આશરે 500 કરોડ થશે.
ત્યારે સવાલ થાય છે કે આ કોણ છે અબજોપતિ કર્મચારી? ACBના રડારથી બહાર કેમ? MLAની રજૂઆત બાદ કાર્યવાહી ક્યારે? સરકારી કર્મી પાસે છે 2 હજાર કરોડ? સરકારી કર્મચારી પાસે 2000 કરોડની સંપત્તિ કેવી રીતે ? તે અંગે VTV News દ્વારા મહામંથન પણ કરવામાં આવ્યું હતું.