NRI / કેનેડા જતા પહેલા આટલું અવશ્ય જાણી લેજો, નહીંતર એરપોર્ટથી જ પરત ફરવું પડશે!

Canada Work Permit Rules: કેનેડાના ઇમિગ્રેશન વિભાગ ઇમિગ્રેશન, રેફ્યુજીસ એન્ડ સિટીઝનશિપ કેનેડા (IRCC) એ તાજેતરમાં કામચલાઉ નિવાસી દસ્તાવેજો (Temporary Resident Documents) રદ કરવા અંગે નવી ઓપરેશનલ માર્ગદર્શિકા જાહેર કરી છે. આ અંતર્ગત હવે વિદ્યાર્થીઓ અને કામદારોના પરમિટ એરપોર્ટ પર જ રદ થઈ શકે છે. જો તેઓ દેશમાં પ્રવેશ માટેની ચોક્કસ પ્રવેશ શરતો અથવા પાલન આવશ્યકતાઓ પૂર્ણ ન કરતા હોય. IRCC અનુસાર, આ માર્ગદર્શિકા ઇમિગ્રેશન અધિકારીઓને કાનૂની સત્તા આપે છે કે તેઓ વિઝિટર વિઝા, સ્ટડી પરમિટ, વર્ક પરમિટ અથવા ઇલેક્ટ્રોનિક ટ્રાવેલ ઓથોરાઇઝેશન (eTA) રદ કરી શકે.

નવા નિયમો હેઠળ કયા દસ્તાવેજો પર અસર પડશે?

ઇમિગ્રેશન અને રેફ્યુજી પ્રોટેક્શન રેગ્યુલેશન્સ (IRPR) માં સુધારાઓ કરીને નવા વિભાગો ઉમેરાયા છે. જેમાં Discretionary and Automatic Cancellationsની સ્પષ્ટ વ્યાખ્યા આપવામાં આવી છે. ખાસ કરીને સ્ટડી પરમિટ માટે કલમ 222.7-222.8 અને વર્ક પરમિટ માટે કલમ 209.01-209.02 ઉમેરાઈ છે. આ મુજબ જો પરમિટ ભૂલથી જારી થયું હોય અથવા પરમિટ ધારક હવે જરૂરી માપદંડોને પૂર્ણ ન કરે,તો IRCC તેને રદ કરી શકે છે. વધુમાં જો વિદ્યાર્થી કે કામદારોનું મૃત્યુ થાય અથવા કાયમી રહેઠાણ (Permanent Residency) મળી જાય તો તેમનું પરમિટ આપમેળે રદ ગણાશે.

આ પણ વાંચો: વિદેશી વિદ્યાર્થીઓ પર બ્રેક, H-1B ધારકોને ફાયદો, કેનેડાના નવા નિર્ણયની ભારતીયો પર શું અસર થશે?

વિદ્યાર્થીઓ અને કામદારોને શું ધ્યાનમાં રાખવું જરૂરી છે?

જો કોઈ વિદ્યાર્થી ડેઝિગ્નેટેડ લર્નિંગ ઇન્સ્ટિટ્યૂશન (DLI) એટલે કે એવી કોલેજ કે યુનિવર્સિટી જે વિદેશી વિદ્યાર્થીઓને પ્રવેશ આપવા માટે અધિકૃત છે માં અભ્યાસ કરે છે પરંતુ તે IRCCના નિયમોનું પાલન ન કરે, તો તેની સ્ટડી પરમિટ રદ થઈ શકે છે. તેવી જ રીતે, જો કોઈ કામદાર કેનેડિયન કંપનીમાં નોકરી કરે છે અને તે કંપની ઇમિગ્રેશન નિયમોનું ઉલ્લંઘન કરે છે. તો વર્ક પરમિટ પણ રદ થશે. IRCCનું કહેવું છે કે આ નવો નિયમ કેનેડાની ઇમિગ્રેશન પ્રક્રિયાને વધુ પારદર્શક અને જવાબદાર બનાવવાનો હેતુ ધરાવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ