NRI / હવે H1B વિઝા મેળવવા ભારતીયોને અઘરા પડશે? બનાવ્યા કડક નિયમો, જાણી લેજો

US H1B Visa Rules: અમેરિકામાં કામ કરવા ઇચ્છતા હજારો ભારતીયો માટે ચિંતાજનક સમાચાર છે. ટ્રમ્પ વહીવટીતંત્રના નવા આદેશે H1-B વિઝા પ્રક્રિયાને વધુ કઠિન બનાવી દીધી છે.

ટ્રમ્પ વહીવટીતંત્રનો નવો આદેશ

યુએસ પ્રમુખ ડોનાલ્ડ ટ્રમ્પે H1-B વિઝા પ્રક્રિયા વધુ કડક બનાવવા તાજેતરમાં મહત્વપૂર્ણ આદેશ જાહેર કર્યો છે. આ આદેશ પછી H1-B વિઝા માટે અરજી કરનારા ઉમેદવારોને અગાઉ કરતાં વધુ વિગતવાર તપાસમાંથી પસાર થવું પડશે. રોઇટર્સના અહેવાલ અનુસાર, સ્ટેટ ડિપાર્ટમેન્ટે વિશ્વભરના તમામ યુએસ મિશનને એક કેબલ મોકલીને નવી સ્ક્રુટિની નીતિ અમલમાં મૂકવા સૂચના આપી છે. ખાસ કરીને, વિઝા અરજદારો અથવા તેમના કાર્ય સાથે સંકળાયેલા કોઈપણ વ્યક્તિએ જો વાણી સ્વાતંત્ર્ય પર સેન્સરશીપ અથવા ઑનલાઇન અભિવ્યક્તિ દબાવવાનો પ્રયાસ કર્યો હોય તો તેમની અરજી રદ થઈ શકે છે. આ નિર્ણયમાંથી સૌથી વધુ અસર તે દેશોના ઉમેદવારો પર પડશે, જેમાં ભારત અગ્રેસર છે, કારણ કે H1-B વિઝા મેળવનારા લોકોમાં ભારતીયોની ટકાવારી સૌથી ઊંચી છે.

H1-B અરજદારો અને પરિવારજનોની પણ રિઝ્યુમ ચકાસણી

સ્ટેટ ડિપાર્ટમેન્ટે આપેલા તાજા આદેશ મુજબ હવે માત્ર અરજદારો જ નહીં પરંતુ તેમના પરિવારના સભ્યોની પ્રોફેશનલ માહિતી પણ ચકાસવામાં આવશે. યુએસ કોન્સ્યુલર અધિકારીઓને સ્પષ્ટ સૂચના આપવામાં આવી છે કે તેઓ અરજદારોના રિઝ્યુમ, LinkedIn પ્રોફાઇલ, રોજગાર ઇતિહાસ અને ભૂતકાળનું કામ ધ્યાનપૂર્વક ચકાસે.

ખાસ કરીને જો અરજદારોનું કામ કન્ટેન્ટ મોડરેશન, ફેક્ટ-ચેકિંગ, પાલન, ઑનલાઇન સલામતી, સોશિયલ મીડિયા મેનેજમેન્ટ જેવી પ્રવૃત્તિઓ સાથે જોડાયેલ હોય, તો તેમને વધુ સખત તપાસમાંથી પસાર થવું પડશે. કારણ કે આ ક્ષેત્રોમાં સેન્સરશીપ અથવા અભિવ્યક્તિ પર નિયંત્રણ લગાડવાની કામગીરીનો સમાવેશ થાય છે.

આવો કડક અભિગમ અગાઉ H1-B કેટેગરી માટે કદાચ ક્યારેય અપનાવવામાં આવ્યો નથી. અને નિષ્ણાતો મુજબ આ પગલું ટેક ઉદ્યોગને મોટા પાયે અસર કરી શકે છે.

સેન્સરશીપ સંબંધિત ભૂતકાળ તપાસ

કેબલમાં સ્પષ્ટ કહેવામાં આવ્યું છે કે જો કોઈ અરજદાર અગાઉ યુએસની અંદર અથવા બહાર સેન્સરશીપમાં સામેલ રહ્યો હોય, તો કોન્સ્યુલર અધિકારીઓએ આવી અરજીને ઇમિગ્રેશન અને નૅશનલિટી એક્ટના સ્પષ્ટ વિભાગ હેઠળ અયોગ્ય ગણવાની વિચારણા કરવી જોઈએ.

H1-B વિઝા માટે આવતી આવી વધારાની તપાસને નિષ્ણાતો “અતિવિસ્તૃત અને કઠોર” ગણાવી રહ્યા છે. ખાસ કરીને ટેક ઉદ્યોગ તથા સોશિયલ મીડિયા સંબંધિત કંપનીઓમાં કામ કરતા ભારતીયો માટે આ નવો નિયમ ચિંતાનો વિષય છે, કારણ કે આ ક્ષેત્રોમાં કન્ટેન્ટ મૉડરેશન, ફેક્ટ-ચેકિંગ અને નિયમનકારી કામ સામાન્ય છે.

ટેક ક્ષેત્ર સૌથી વધુ અસરગ્રસ્ત

નવા નિયમો પ્રમાણે તમામ વિઝા અરજદારોની તપાસ વધશે, પરંતુ H1-B અરજદારોને ખાસ નિશાન બનાવવામાં આવ્યા છે, કારણ કે તેઓ મોટા પ્રમાણમાં ટેક કંપનીઓમાં કર્મચારી તરીકે કાર્યરત હોય છે. ટેકનોલોજી કંપનીઓ, સોશિયલ મીડિયા પ્લેટફોર્મ, ફાઇનાન્સ ટેક કંપનીઓ વગેરેમાં કામ કરનારા લોકોના રોજગાર ઇતિહાસની કોન્સ્યુલેટ દ્વારા વિગતવાર તપાસ થશે. કેબલમાં જણાવાયું છે: “તમારે તેમના રોજગાર ઇતિહાસની સંપૂર્ણ સમીક્ષા કરવી જોઈએ જેથી ખાતરી કરી શકાય કે તેઓ અભિવ્યક્તિ દબાવવાના પ્રયાસોમાં સામેલ નથી.”

આ પણ વાંચો: કેનેડામાં જૉબ કરતા ભારતીયોની હાલત અત્યંત દયનીય! લોકો OT કરવા મજબૂર

આથી સ્પષ્ટ થાય છે કે આગામી સમયમાં H1-B વિઝા મેળવવાની પ્રક્રિયા સમયસાધ્ય અને વધુ જટિલ બનશે, અને ખાસ કરીને ભારતીય IT પ્રોફેશનલ્સ માટે આ પોલિસીમોટા પાયે અસરકારક સાબિત થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ