NRI / હવે સરળતાથી મળી જશે કેનેડાના PR, બસ ભારતીયોએ કરવું પડશે આ કામ

Canada PR Rules: જો તમે પણ કેનેડાના પીઆર માટે અરજી કરવા જઈ રહ્યા છો તો આ સમાચાર તમારા માટે મહત્વના છે કારણ કે વિઝા માટે નવા નિયમો આવ્યા છે. એક્સપ્રેસ એન્ટ્રી દ્વારા કેનેડામાં પરમેનેન્ટ રેસિડેન્સ (PR) માટે અરજી કરનારા લોકોએ હવે અરજી સબમિટ કરતા પહેલા મેડિકલ એક્ઝામીનેશન અથવા ટેસ્ટ પાસ કરવી પડશે. નવા નિયમો 21 ઓગસ્ટ, 2025 થી અમલમાં આવશે. ઇમિગ્રેશન, રેફ્યુજીસ અને સિટીઝનશિપ કેનેડા (IRCC) એ નવા નિયમો જાહેર કર્યા છે.

કેનેડા સરકાર કુશળ કામદારોને PR આપવા માટે એક્સપ્રેસ એન્ટ્રીનો ઉપયોગ કરે છે. એક્સપ્રેસ એન્ટ્રીમાં FSWP, FSTP અને CEC જેવા ઇમિગ્રેશન પ્રોગ્રામનો સમાવેશ થાય છે. પહેલા, અરજદારોએ પરમેનેન્ટ રેસિડેન્સ માટે અરજી સબમિટ કરવાની હતી. પછી IRCC સૂચના આપતું હતું કે તેઓએ તબીબી પરીક્ષા પાસ કરવી પડશે કે નહીં.

જોકે, હવે 21 ઓગસ્ટથી, અરજી કરતા પહેલા મેડિકલ એક્ઝામીનેશન કરાવવાનું રહેશે. આ નિયમ ફક્ત એક્સપ્રેસ એન્ટ્રી હેઠળ પરમેનેન્ટ રેસિડેન્સ અરજીઓ સબમિટ કરનારા વિદેશી કામદારો માટે છે. આ નિયમ 21 ઓગસ્ટ પહેલા સબમિટ કરાયેલી અરજીઓ પર લાગુ થશે નહીં. નવા નિયમો અન્ય પદ્ધતિઓ દ્વારા અરજી કરનારા લોકોને પણ અસર કરશે નહીં.

તમારે PR માટે તબીબી પરીક્ષા કેમ પાસ કરવી પડશે?

કેનેડા સરકાર કહે છે કે પરમેનેન્ટ રેસિડેન્સ માટે લાયક બનવા માટે, અરજદાર અને તેના પરિવારના સભ્યો મેડિકલી રીતે ફિટ હોવા જોઈએ. આ શરત એટલા માટે રાખવામાં આવી છે કે અરજદારની હેલ્થ પ્રોબ્લ્મના કારણે કેનેડાની પબ્લિક હેલ્થ સર્વિસ પર દબાણ ન આવે. IRCC અનુસાર, જો અરજદારના રોગની સારવારનો ખર્ચ કેનેડિયન નાગરિકની સારવાર પર થતા સરકારી ખર્ચ કરતાં ત્રણ ગણો વધારે હોય, તો તેને PR માટે પાત્ર ગણવામાં આવશે નહીં.

હાલમાં આ ખર્ચ $27,162 છે. જો ડાયાબિટીસ જેવા ક્રોનિક રોગોની સારી રીતે સારવાર કરવામાં આવી રહી હોય, તો તેના આધારે અરજી નકારવાની શક્યતા ઓછી થઈ જાય છે. જો અરજદારોને કોઈ ચેપી રોગ હોય, તો તેમને PR મળતો નથી, કારણ કે તે અન્ય લોકોના જીવન માટે ખતરો ઉભો કરી શકે છે.

મેડિકલ એક્ઝામીનેશન શું તપાસવામાં આવે છે?

PR માટે અરજી કરતા પહેલા, તબીબી તપાસ ફક્ત IRCC દ્વારા માન્ય ડોકટરો દ્વારા જ કરી શકાય છે. ડોકટરોની યાદી IRCC વેબસાઇટ પર ઉપલબ્ધ છે. સામાન્ય રીતે, મેડિકલ એક્ઝામીનેશનનો ખર્ચ પ્રતિ વ્યક્તિ 140 થી 280 ડોલર હોય છે. જો કોઈપણ પ્રકારની તપાસ, સારવાર અથવા નિષ્ણાત મુલાકાતની જરૂર હોય, તો અરજદારે તેનો ખર્ચ પણ ઉઠાવવો પડે છે. મેડિકલ એક્ઝામીનેશન હેઠળ કરવામાં આવતા પરીક્ષણો વિશેની માહિતી નીચે મુજબ છે.

• મેડિકલ હિસ્ટ્રી રિવ્યુ (શસ્ત્રક્રિયા,ક્રોનિક બીમારી, રોગની સારવાર વિશે માહિતી)
• સંપૂર્ણ ફિજિકલ એકઝામીનેશન (હૃદય, ફેફસાં, આંખો વગેરેની તપાસ)
• Chest X-ray, જેથી ટીબી જેવા રોગો શોધી શકાય.
• બ્લડ અને યુરીન ટેસ્ટ
• મેન્ટલ હેલ્થ ચેક અપ
• વેક્સિનેશન રેકોર્ડ ચેકઅપ

વધુમાં વાંચો: શું ડ્રોપબોક્સ વિઝા ખતમ કરી નાખશે અમેરિકા? જાણો ભારતીય વિદ્યાર્થીઓ પર કેવી અસર થશે

જ્યારે પણ અરજદાર મેડિકલ એક્ઝામીનેશન માટે જાય છે, ત્યારે તેણે તેની સાથે કેટલાક ડોક્યુમેન્ટ્સ લેવા પડે છે. આમાં ચાર ફોટોગ્રાફ્સ, દવાઓની યાદી, ડોક્ટર રિપોર્ટ અને વેક્સિન સર્ટિફિકેટનો સમાવેશ થાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ