સ્પોર્ટ્સ / ન્યૂઝીલેન્ડની ક્રિકેટ ટીમનો મળ્યો નવો કેપ્ટન, આ ઓલરાઉન્ડર સંભાળશે કમાન

ન્યુઝીલેન્ડની T20 ટીમને એક વધુ નવો કેપ્ટન મળ્યો છે, પરંતુ તેઓ નિયમિત કેપ્ટન નથી. સ્ટેન્ડ-ઇન કેપ્ટન તરીકે જેમ્સ નિસમના નામની જાહેરાત કરવામાં આવી છે. તેઓ દક્ષિણ આફ્રિકા સામેની પાંચ મેચની T20 સિરીઝના ચોથા મેચમાં ટીમની કમાન સંભાળશે. જેમ્સ નિસમ પહેલીવાર T20 ઇન્ટરનેશનલ ક્રિકેટમાં કેપ્ટન તરીકે જોવા મળશે અને આ અંગે ન્યુઝીલેન્ડ ક્રિકેટ બોર્ડે સત્તાવાર જાહેરાત કરી છે.

ન્યુઝીલેન્ડ ક્રિકેટએ પોતાના સત્તાવાર X એકાઉન્ટ પર જણાવ્યું છે કે જેમ્સ નિસમ ચોથી T20 મેચમાં ટીમની કમાન સંભાળશે. બોર્ડે લખ્યું છે કે ઓલરાઉન્ડર જેમ્સ નિસમ આજે સાંજે દક્ષિણ આફ્રિકા સામેની ચોથી T20 મેચમાં પહેલીવાર BLACKCAPS (ન્યુઝીલેન્ડ ટીમ)ની કેપ્ટનશીપ કરશે. આ સાથે તેઓ T20 ઇન્ટરનેશનલમાં ન્યુઝીલેન્ડની કેપ્ટનશીપ કરનાર 12મા ખેલાડી બની ગયા છે.

ન્યુઝીલેન્ડ માટે અત્યાર સુધી 11 ખેલાડીઓએ T20 ઇન્ટરનેશનલમાં કેપ્ટનશીપ કરી છે. સૌથી પહેલા કેપ્ટન સ્ટીફન ફ્લેમિંગ હતા, જેમણે 2005 થી 2006 દરમિયાન 5 મેચમાં ટીમને લીડ કરી હતી. ત્યારબાદ ડેનિયલ વિટોરી 28 મેચમાં કેપ્ટન રહ્યા. એટલાજ 28 મેચમાં બ્રેન્ડન મેકકલમએ પણ ટીમની કમાન સંભાળી હતી. 13 મેચમાં રોસ ટેલર કેપ્ટન રહ્યા, જ્યારે કેન વિલિયમસને સૌથી વધુ 75 મેચમાં ટીમની કેપ્ટનશીપ કરી છે.

આ પણ વાંચોઃIPL પહેલા હાર્દિક પંડ્યાનો જલવો, 12 કરોડની ફેરારીમાં શર્ટલેસ અંદાજમાં એન્ટ્રી

કાઇલ મિલ્સે 2 મેચમાં કેપ્ટનશીપ કરી હતી, જ્યારે ટિમ સાઉદી 29 મેચમાં કેપ્ટન રહ્યા છે. મિચેલ સેન્ટનરે 56 મેચમાં ટીમની કમાન સંભાળી છે. ટોમ લેથમે 13 મેચમાં અને માઈકલ બ્રેસવેલે પણ 13 મેચમાં કેપ્ટનશીપ કરી છે. આ વર્ષે ડેરિલ મિચેલે 1 મેચમાં કેપ્ટનશીપ કરી છે અને હવે નવા કેપ્ટન તરીકે જેમ્સ નિસમ હશે, જે પહેલીવાર કોઈપણ ફોર્મેટમાં ટીમની કમાન સંભાળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ