વિશ્વ / ન્યૂયોર્ક પોલીસે ફ્રાન્સના રાષ્ટ્રપતિની કાર રોકી, મેક્રોને સીધો લગાવ્યો ટ્રમ્પને ફોન, અને પછી....!

સોમવારે ન્યૂ યોર્કમાં ટ્રાફિક જામના કારણે એક અણધારી પરિસ્થિતિ ઉભી થઇ. ફ્રાન્સના રાષ્ટ્રપતિ ઇમેન્યુઅલ મેક્રોનને યુએસ રાષ્ટ્રપતિ ડોનાલ્ડ ટ્રમ્પના કાફલાને કારણે રસ્તો બંધ કરી દેવાયો હોવાથી રસ્તામાં જ અટકી જવું પડ્યું.. આ ઘટનાનો એક વીડિયો સોશિયલ મીડિયા પર વાયરલ થયો હતો, જેમાં ફ્રેન્ચ રાષ્ટ્રપતિ થોડા સમય માટે ન્યૂ યોર્કના રસ્તા પર ઉભેલા જોવા મળ્યા હતા કારણ કે પોલીસે ટ્રમ્પના મોટર કાફલા માટે રસ્તો રોકી દીધો હતો.

આ ઘટના સંયુક્ત રાષ્ટ્ર મહાસભા (UNGA)ના 80મા સત્રમાં મેક્રોનના ભાષણ પછી તરત જ બની હતી, જેમાં તેમણે ઔપચારિક રીતે પેલેસ્ટાઇન રાજ્યને માન્યતા આપવાની જાહેરાત કરી હતી. યુએન મુખ્યાલયથી ફ્રેન્ચ દૂતાવાસ તરફ ડ્રાઇવિંગ કરતી વખતે, રાષ્ટ્રપતિ ટ્રમ્પના મોટરકાફલાને પસાર થવા દેવા માટે રસ્તા બંધ કરાયા હતા..આ દરમ્યાન મેક્રોનનો કાફલો ત્યાંથી પસાર થવા જતા પોલીસે આ કાફલાને અટકાવ્યો હતો..

ફ્રેન્ચ મીડિયા આઉટલેટ બ્રુટ દ્વારા શેર કરાયેલા એક વીડિયોમાં, એક પોલીસ અધિકારી મેક્રોનની માફી માંગે છે અને કહે છે, "માફ કરજો રાષ્ટ્રપતિ મહોદય, મને ખેદ છે, હમણાં બધું બંધ છે, જે બાદ તે રાષ્ટ્રપતિ ટ્રમ્પના કાફલા તરફ ઇશારો કરે છે" વાયરલ વીડિયોમાં, ઇમેન્યુઅલ મેક્રોન ટ્રાફિક વચ્ચે તેમની કારમાંથી રસ્તા પર ઉતરતા જોઈ શકાય છે, જ્યાં લોકો તેમની સાથે સેલ્ફી લેવાનો પ્રયાસ કરે છે.

આ પણ વાંચોઃ પ્રેગ્નન્ટ મહિલાઓને પેરાસિટામોલથી ખતરો? ટ્રમ્પના દાવા પર WHO એક્સપર્ટે કર્યો ખુલાસો

આ મામલાએ વધુ રમૂજી વળાંક લીધો જ્યારે ફ્રાન્સના રાષ્ટ્રપતિએ ડોનાલ્ડ ટ્રમ્પને સીધો ફોન કર્યો અને મજાકમાં કહ્યું કે તેઓ તેમના કારણે ટ્રાફિક જામમાં ફસાઈ ગયા છે. વાયરલ થયેલા વીડિયોમાં, મેક્રોનને ફોન પર ટ્રમ્પ સાથે વાત કરતા અને હસતા સાંભળી શકાય છે, "અનુમાન કરો, હું રસ્તા પર રાહ જોઈ રહ્યો છું કારણ કે તમારા માટે બધું બંધ છે."

ડોનાલ્ડ ટ્રમ્પનો કાફલો પસાર થયો, પરંતુ રસ્તો ફક્ત રાહદારીઓ માટે ખુલ્લો હતો, જેના કારણે ઇમેન્યુઅલ મેક્રોનને પગપાળા તેમના આગામી ગંતવ્ય સ્થાન તરફ તેમની સાથે રહેલા લોકો સાથે આગળ પ્રયાણ કર્યુ હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ