દહેરાદૂન / VIDEO: પ્રસિદ્ધ પર્યટન સ્થળ પર વાદળું ફાટ્યું! અંધારામાં ચારેયકોર તબાહી, મંજર ડરામણું

Dehradun Cloud burst : દેહરાદૂનથી એક મોટા સમાચાર સામે આવ્યા છે. સોમવાર મોડી રાત્રે ઉત્તરાખંડના સહસ્ત્રધારા અને મસૂરી વિસ્તારોમાં વાદળ ફાટવાથી ભારે હડકંપ મચ્યો હતો. પ્રાપ્ત માહિતી મુજબ સહસ્ત્રધારાના કાર્ડિગડ ગામ અને આસપાસના વિસ્તારોમાં થયેલી આ કુદરતી આફતે અનેક હોટલ અને દુકાનોને નુકસાન પહોંચાડ્યું છે, જ્યારે મસૂરીના ઝાડીપાની વિસ્તારમાં એક મજૂરનું મોત અને એકના ગંભીર રીતે ઘાયલ થવાના સમાચાર છે.

સહસ્ત્રધારામાં ભારે નુકસાન: કાટમાળ હેઠળ ફસાયા લોકો

કાર્ડિગડના ગામના વડા રાકેશ જાવડીએ જણાવ્યું કે, મુખ્ય બજારમાં રાત્રે અંદાજે 11:30 વાગ્યે વાદળ ફાટતાં ભીષણ કાટમાળ પડ્યો. બે થી ત્રણ મોટી હોટલો તથા 7 થી 8 દુકાનો સંપૂર્ણ રીતે ધરાશાયી થઈ ગઈ.

આ ઘટનામાં લગભગ 100 જેટલા લોકો કાટમાળ વચ્ચે ફસાઈ ગયા હતા, જેમને સ્થાનિક ગ્રામજનોએ ભારે પ્રયત્નો પછી સુરક્ષિત રીતે બહાર કાઢ્યા હતા. હજુ સુધી 1-2 લોકો ગુમ હોવાનું મનાય છે, પરંતુ આ અંગે સત્તાવાર પુષ્ટિ હજુ થવાની બાકી છે. તેમના શોધી કાઢવાની કામગીરી સતત ચાલી રહી છે.

ડિઝાસ્ટર કંટ્રોલ રૂમથી શું મળી માહિતી ?

રાત્રે 2 વાગ્યે ડિઝાસ્ટર કંટ્રોલ રૂમ તરફથી મળેલી માહિતી અનુસાર SDRF અને ફાયર બ્રિગેડની ટીમો ઘટના સ્થળે મોકલાઈ હતી, પરંતુ રસ્તા પર પડેલા ભારે કાટમાળના કારણે તેઓ તરત પહોંચી શક્યા ન હતા. જાહેર બાંધકામ વિભાગની JCB ઘટના સ્થળે પહોંચી ગઈ છે અને રસ્તો ખોલવાનો પ્રયાસ ચાલી રહ્યો છે.

IT પાર્ક નજીક પણ ભીષણ સ્થિતિ, નદીનું સ્તર વધ્યું

સહસ્ત્રધારા નજીકના IT પાર્ક વિસ્તારમાં પણ અચાનક ભારે કાટમાળ પડ્યો. રાત્રે લગભગ 12:30 થી 1 વાગ્યાની વચ્ચે આ ઘટના બની. કાટમાળના કારણે સોંગ નદીનું પાણીનું સ્તર નોંધપાત્ર રીતે વધી ગયું છે.

રાયપુર પોલીસ સ્ટેશનના વડા ગિરીશ નેગીએ જણાવ્યું કે, આ વિસ્તારમાં તાત્કાલિક પોલીસ દળ તૈનાત કરી દેવામાં આવ્યું છે અને લોકોને સલામત સ્થળે જવાની ચેતવણી આપવામાં આવી છે. NDRF અને SDRFની ટીમોને પણ ઘટના સ્થળે તાત્કાલિક બોલાવવામાં આવી છે. હાલે પરિસ્થિતિ નિયંત્રણમાં હોવાનું અધિકારીઓનું કહેવું છે. સદનસીબે અહીંથી કોઈ જાનહાનિની સત્તાવાર માહિતી સામે આવી નથી.

આ પણ વાંચો : ચોમાસાના વિદાય ટાણે મુશળધાર વરસાદની ચેતવણી, ગુજરાત પર પણ અસર, IMDની 'ત્રાટકતી' આગાહી

મસૂરીમાં કાટમાળ: એક મજૂરનું મૃત્યુ, બીજો ઘાયલ

મસૂરીના ઝાડીપાની વિસ્તારમાં પણ ભારે વરસાદને કારણે એક દુખદ ઘટના બની. અહીં મજૂરોના કાચા રહેઠાણ પર કાટમાળ પડતાં એક મજૂરનું મૃત્યુ થયું અને બીજો ગંભીર રીતે ઘાયલ થયો છે. સિટી કોટવાલ સંતોષ કુંવરે જણાવ્યું કે, ભારે વરસાદના કારણે પાણી સાથે કાટમાળ તેમના રહેઠાણ પર આવી પડ્યો હતો, જેના કારણે એક મજૂર કાટમાળ નીચે દટાઈ ગયો અને તેનું સ્થળ પર જ મૃત્યુ થયું, જ્યારે બીજાને ગંભીર ઇજા પહોંચી છે. સ્થાનિક લોકોએ અને પોલીસની ટીમે તાત્કાલિક બચાવ કામગીરી શરૂ કરી અને ઘાયલ મજૂરને સારવાર માટે હોસ્પિટલ ખસેડવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ