હરિયાણા / EDએ રોબર્ટ વાડ્રા વિરુદ્ધ ચાર્જશીટ દાખલ કરી, મની લોન્ડરિંગ સહિત લાગ્યા આ આરોપો

ગુરુવારે (17 જુલાઈ, 2025) ના રોજ એન્ફોર્સમેન્ટ ડિરેક્ટોરેટે કોંગ્રેસ સાંસદ પ્રિયંકા ગાંધી વાડ્રાના પતિ અને વ્યવસાયી રોબર્ટ વાડ્રા વિરુદ્ધ ચાર્જશીટ દાખલ કરી. આ ચાર્જશીટ ગુરુગ્રામ જમીન કેસમાં મની લોન્ડરિંગ સાથે જોડાયેલી છે, જેમાં રોબર્ટ વાડ્રા (આરોપી 1), સત્યાનંદ યાજી (આરોપી 2), કેવલ સિંહ વિરક (આરોપી ૩) અને અમુક કંપનીઓ (આરોપી 4 થી 11) જેમ કે M/s Sky Light Hospitality Pvt. Ltd., M/s Sky Light Realty Pvt. Ltd. અને M/s Onkareshwar Properties Pvt. Ltd.ને આરોપી બનાવવામાં આવ્યા છે.

કેવી રીતે શરુ થયું જમીન કૌભાંડ

આ મામલો 1 સપ્ટેમ્બર 2018 ના રોજ હરિયાણા પોલીસ દ્વારા ગુડગાવના ખેડકી દૌલા સ્ટેશનમાં 0288 નંબરની FIR થી શરુ થયો હતો. આ FIR રોબર્ટ વાડ્રા, હરિયાણાના ભૂતપૂર્વ મુખ્યમંત્રી ભૂપેન્દ્ર સિંહ હુડ્ડા, DLF કંપની, M/s ઓમકારેશ્વર પ્રોપર્ટીઝ પ્રાઇવેટ લિમિટેડ અને અન્ય લોકો સામે IPC ની વિવિધ કલમો (120-B, 420, 467, 471) અને ભ્રષ્ટાચાર નિવારણ અધિનિયમની કલમ 13 હેઠળ કેસ નોંધવામાં આવ્યો હતો.

કયા-કયા આરોપ છે

M/s Sky Light Hospitality Pvt. Ltd. (SLHPL) એ ખૂબ જ ઓછી મૂડી સાથે ગુરુગ્રામના શિકોહપુર ગામમાં M/s ઓમકારેશ્વર પ્રોપર્ટીઝ પાસેથી 7.5 કરોડ રૂપિયામાં 3.5 એકર જમીન ખરીદી.

વેચાણ દસ્તાવેજમાં લખ્યું હતું કે ચુકવણી ચેક દ્વારા કરવામાં આવી હતી, પરંતુ હકીકતમાં આખી ડીલ 15 કરોડ રૂપિયાનો હતી પરંતુ અડધી રકમ દર્શાવીને, 45 લાખ રૂપિયા (આશરે) ની સ્ટેમ્પ ડ્યુટી બચાવી લેવામાં આવી.

એવો આરોપ છે કે આ લેવડ-દેવડ રિશ્વતના રૂપમાં થઇ હતી જેથી રોબર્ટ વાડ્રાની ઓળખાણનો ફાયદો ઉઠાવીને ઓમકારેશ્વર કંપનીને તે જ ગામમાં હાઉસિંગ લાઇસન્સ મળી શકે.

વાડ્રા સાથે જોડાયેલી કંપની SLHPL એ નિયમો નજરઅંદાજ કરીને અને ઉપરથી દબાણ કરીને ખૂબ જ ઝડપથી કોમર્શિયલ કોલોની ડેવલપમેન્ટ લાઇસન્સ મેળવ્યું. આ પછી, જમીન DLF ને 58 કરોડ રૂપિયામાં વેચી દેવામાં આવી.

આ કાયદા હેઠળની કલમો અને સજાની માંગ

ED એ PMLA એક્ટ, 2002 ના અનેક વિભાગોનો ઉપયોગ કર્યો છે:

• કલમ 3: મની લોન્ડરિંગનો ગુનો
• કલમ 4: તેમાં 3 થી 7 વર્ષની સખત કેદની જોગવાઈ છે.
• કલમ 23: અંદરોઅંદર જોડાયેલી લેવડ-દેવડની શંકાના આધારે
• કલમ 24: પુરાવાની જવાબદારી આરોપી પર હોય છે
• કલમ 44: આ કેસ સ્પેશીયલ કોર્ટમાં ચલાવવામાં આવશે
• કલમ 45: આ ગુનાને ઓળખી શકાય તેવું અને નોન-બેલેબલ બનાવે છે

વધુ વાંચો: 'અનહદ અનિલ'! 3000 કરોડની લોન પાસ કરાવવા અંબાણીએ કર્યું 'અતિ હેરાનીભર્યું ', ટોપ સિક્રેટ જાહેર

આ મામલામાં EDનો આરોપ છે કે જમીન લે-વેચની આડમાં રાજનૈતિક પ્રભાવનો દુરુપયોગ કરવામાં આવ્યો હતો, સરકારી નિયમોને નજરઅંદાજ કરીને લાઇસન્સ મેળવવામાં આવ્યા હતા અને જમીનને ઊંચા ભાવે વેચીને ગેરકાયદેસર નફો કમાવવામાં આવ્યો હતો. આ બધું કથિત રીતે મની લોન્ડરિંગ અને ભ્રષ્ટાચાર સાથે જોડાયેલું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ