વિવાદ / ક્રિકેટરો સાથે બનેલી ઘટનાને લઈ રાજકારણ ગરમાયું, કોંગ્રેસના આરોપ પર ભાજપનો પલટવાર

મધ્યપ્રદેશના ઇન્દોરમાં ગુરુવારે સવારે બે ઓસ્ટ્રેલિયન મહિલા ક્રિકેટરો સાથે રસ્તા પર એક શખ્સે છેડતી કરી હતી. આ બંને ખેલાડીઓ મહિલા ક્રિકેટ વર્લ્ડ કપ માટે ભારત આવી છે. આરોપી મોટરસાઇકલ પર સવાર હતો અને બંને ખેલાડીઓની નજીકથી પસાર થતા આરોપીએ બંને બંને મહિલાઓને અયોગ્ય રીતે સ્પર્શ કર્યો અને પછી ભાગી ગયો હતો. આ ઘટના સવારે 11 વાગ્યાની આસપાસ બની જ્યારે ખેલાડીઓ તેમની હોટલથી કેફે તરફ ચાલી રહી હતી. તેમણે તરત જ તેમની ટીમના સુરક્ષા અધિકારીને મેસેજ મોકલીને લોકેશન શેર કર્યું. સુરક્ષા અધિકારી ડેની સિમોન્સે કહ્યું, "ખેલાડીઓએ રડતા રડતા ફોન પર જણાવ્યું કે શું બન્યું. અમે તાત્કાલિક કાર મોકલીને તેમને હોટેલ પાછા લાવ્યા."

કેવી રીતે થઈ આરોપીનો ઓળખ?

રસ્તા પર નજીક ઉભેલા એક વ્યક્તિએ આરોપીની બાઇકનો નંબર નોંધી લીધો, જેના આધારે પોલીસે CCTV ફૂટેજમાંથી તેની ઓળખ કરી લીધી. પોલીસે શુક્રવારે સાંજે આરોપી અકીલની ધરપકડ કરી લીધી.

કોંગ્રેસનો ભાજપ સરકાર પર પ્રહાર

ઘટના બાદ વિપક્ષી પાર્ટીઓએ મધ્યપ્રદેશમાં ભાજપ સરકાર પર આકરા પ્રહાર કર્યા. પ્રદેશ કોંગ્રેસ પ્રમુખ જીતુ પટવારીએ કહ્યું, "ઇન્દોર તેના આતિથ્ય માટે જાણીતું છે, પરંતુ આ ઘટના કાયદો અને વ્યવસ્થા પર ગંભીર સવાલો ઉભા કરે છે. મુખ્યમંત્રીએ જવાબ આપવો જોઈએ." કોંગ્રેસના નેતા અભિષેક મનુ સિંઘવીએ કહ્યું, "આ અત્યંત શરમજનક છે. મહિલાઓની સુરક્ષા સાથે કોઈ સમાધાન ન થવું જોઈએ. સરકારે કડક અને ઝડપી સજા સુનિશ્ચિત કરવી જોઈએ."

TMCના મહાસચિવ કુણાલ ઘોષે કહ્યું, "ભાજપ શાસિત ઇન્દોરમાં આઇસીસી ટૂર્નામેન્ટ દરમિયાન વિદેશી મહિલા ખેલાડીઓ સાથે છેડતી થઈ, આ દેશની પ્રતિષ્ઠા પર ડાઘ છે." ટીએમસીના પ્રવક્તા સુદીપે કહ્યું, "આ બેટી બચાવોનો સાચો ચહેરો છે. ભાજપે પહેલા પોતાની અંદર જોવું જોઈએ."

ભાજપે કોંગ્રેસ પર કર્યો વળતો પ્રહાર

મધ્યપ્રદેશના મંત્રી કૃષ્ણા ગૌરે કોંગ્રેસ પર આરોપ લગાવ્યો કે તે આ મામલાનું રાજકારણ કરી રહી છે. તેમણે કહ્યું, "આ શરમજનક ઘટના છે, પરંતુ અમારી સરકારની ઝીરો ટોલરન્સ પોલિસી હેઠળ આરોપીની તાત્કાલિક ધરપકડ કરી." કેબિનેટ મંત્રી કૈલાશ વિજયવર્ગીય અને ભાજપના ધારાસભ્ય રામેશ્વર શર્માએ પણ આ ઘટનાની નિંદા કરી અને કહ્યું કે આરોપીને સૌથી કડક સજા આપવામાં આવશે. શર્માએ કહ્યું, "દીકરી ઓસ્ટ્રેલિયાની હોય કે ઇંગ્લેન્ડની, તેની સુરક્ષા અમારી જવાબદારી છે. આરોપીએ ઇન્દોરની છબી ખરાબ કરવાનું કાવતરું કર્યું છે."

આ પણ વાંચો: Cyclone: વાવાઝોડાના નામ કેવી રીતે રાખવામાં આવે છે? ‘Montha’ નામ કોણે રાખ્યું?

MPCA પ્રમુખે ઘટનાને શરમજનક ગણાવી

ઇન્દોર ક્રિકેટ એસોસિએશન (MPCA)ના અધ્યક્ષ મહાનારાયણ સિંધિયાએ એક નિવેદન બહાર પાડીને કહ્યું, "આ અત્યંત દુઃખદ અને શરમજનક છે. એક વ્યક્તિના કૃત્યથી આખા શહેરની ગરિમા ખરડાઈ છે. આ રમતગમત અને સમાજ બંને માટે પીડાદાયક છે."

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ