તબાહી / VIDEO: જ્યાં જુઓ ત્યાં બધુ તહેસનહેસ! હિમાચલનું મંડી ફરી જળમગ્ન, બસો બોટ બની

Himachal Pradesh News, હિમાચલ પ્રદેશમાં ફરી એકવાર કુદરતે વિનાશ વરસાવ્યો છે. મુશળધાર વરસાદથી મંડી જિલ્લામાં પરિસ્થિતિ વધુ ખરાબ થઈ ગઈ છે. મંડી જિલ્લાના ધર્મપુરમાં વિનાશક વરસાદને કારણે અનેક વિસ્તારોમાં તબાહીનું મંજર દેખાઈ રહ્યું છે. ધર્મપુર માર્કેટ અને બસ સ્ટેન્ડ સંપૂર્ણપણે કાટમાળમાં ફેરવાઈ ગયું છે. ભાર પુરમાં બસો તણાઈ ગઈ છે. વર્ષ 2015 પછીની આ સૌથી મોટી તબાહી છે. માહિતી પ્રમાણે, અત્યાર સુધીમાં 6-7 લોકો ગુમ થયા હોવાનું સામે આવ્યું છે. છેલ્લા 24 કલાકથી પડી રહેલા ભારે વરસાદને કારણે નદીઓ અને નાળાઓના પાણીનું સ્તર અચાનક વધી ગયું છે. નિહારી તાલુકાના બ્રગટા ગામમાં મોડી રાત્રે ભારે વરસાદ પછી થયેલા ભૂસ્ખલનમાં ત્રણ લોકોના મોત થયા છે. મૃતકોમાં બે મહિલાઓ અને આઠ મહિનાના એક માસૂમ બાળકનો સમાવેશ થાય છે.

સુંદરનગરના સબ-ડિવિઝનલ ઓફિસરે જણાવ્યું કે સતત વરસાદને કારણે અહીં ઘણી જગ્યાએ ભૂસ્ખલન થયું હોવાના અહેવાલો છે. વહીવટીતંત્ર તાત્કાલિક અસરગ્રસ્ત પરિવાર માટે રાહત સામગ્રી અને કામચલાઉ રહેવાની વ્યવસ્થા કરી રહ્યું છે. તેમણે લોકોને હવામાન વિભાગ દ્વારા જારી કરાયેલ ચેતવણીને ગંભીરતાથી લેવા અને હાલ સંવેદનશીલ વિસ્તારોથી દૂર રહેવાની અપીલ કરી છે.

ધર્મપુર બસ સ્ટેશન ડૂબી ગયું

ધર્મપુરમાં પૂરના પાણી બજાર અને બસ સ્ટેશનમાં ઘૂસી ગયા. ધર્મપુર બસ સ્ટેશન સંપૂર્ણપણે ડૂબી ગયું છે. ત્યાં ઉભેલી ઘણી બસો પાણીમાં વહી ગઈ. બજારમાં ડઝનબંધ દુકાનો અને સ્ટોલ પણ પૂરની ઝપેટમાં આવી ગયા. લોકોના ઘરોમાં ઘૂંટણ સુધી પાણી ભરાઈ ગયા અને બધો સામાન બરબાદ થઈ ગયો.

મંડીમાં ઘણી જગ્યાએ રસ્તાઓ તૂટી ગયા છે. ભારે વરસાદ અને પૂરને કારણે આ વિસ્તારમાં જનજીવન અસ્તવ્યસ્ત થઈ ગયું છે. ડિઝાસ્ટર મેનેજમેન્ટ ટીમને ઘટનાસ્થળે મોકલવામાં આવી છે, પરંતુ ખરાબ હવામાનને કારણે રાહત કાર્યમાં ઘણી બાધાઓ આવી રહી છે. વહીવટીતંત્રે જણાવ્યું કે અત્યાર સુધીમાં અડધો ડઝન લોકો ગુમ થયાના અહેવાલ છે. પોલીસ અને SDRF ટીમો સતત તેમને શોધવામાં લાગી છે.

ધર્મપુર સિવાય મંડીના અન્ય ભાગોમાં પણ વરસાદે તબાહી મચાવી છે. ઘણા ગ્રામીણ વિસ્તારોનો સંપર્ક તૂટી ગયો છે. નાના પુલ ધોવાઈ ગયા છે અને રસ્તાઓ પર કાટમાળ દેખાઈ રહ્યો છે. મંડી-કુલ્લુ હાઇવે પર ઘણી જગ્યાએ ભૂસ્ખલન થયું છે, જેના કારણે વાહનવ્યવહાર સંપૂર્ણપણે ઠપ્પ થઈ ગયો છે. મુસાફરો કલાકો સુધી રસ્તા પર ફસાઈ ગયા.

પૂરને કારણે જનજીવન અસ્તવ્યસ્ત

આ વખતે વરસાદે ઘણા વર્ષોનો રેકોર્ડ તોડી નાખ્યો છે. અચાનક આવેલા પૂરથી સામાન્ય જનજીવન અસ્ત વ્યસ્ત થઈ ગયું છે. કેટલાય લોકોના દુકાનો અને ઘરો પાણીમાં ડૂબી ગયા, તેઓને હવે ખુલ્લા આકાશ નીચે રાત વિતાવવાની ફરજ પડી છે. સોશિયલ મીડિયા પર ફોટો અને વીડિયોથી પરિસ્થિતિની ગંભીરતા જાણી શકાય છે. ધર્મપુર બજાર સંપૂર્ણપણે બરબાદ દેખાઈ રહ્યું છે. ચારે બાજુ તૂટેલી દુકાનોનો કાટમાળ, ધોવાઈ ગયેલા વાહનો અને કાદવ દેખાય છે. લોકો રડી રહ્યા છે અને પોતાના નુકસાનનું દુઃખ વ્યક્ત કરી રહ્યા છે.

આ પણ વાંચો: મંદિર ડૂબ્યું! હોટલોનો સત્યાનાશ, હાઈવે ધોવાયો, સહસ્ત્રધારામાં આભ ફાટ્યું, જુઓ VIDEO

નિષ્ણાતો પાસેથી મળેલી માહિતી પ્રમાણે, આબોહવા પરિવર્તન અને સતત વધતા તાપમાનને કારણે, પહાડો પર આ પ્રકારની આફતો વધી રહી છે. સતત મુશળધાર વરસાદ પર્વતો માટે ખતરાની ઘંટી સાબિત થઈ રહ્યો છે. હાલમાં, વહીવટીતંત્રે લોકોને સલામત સ્થળોએ પહોંચવાની અપીલ કરી છે અને ચેતવણી જારી કરી છે. પરંતુ વિનાશના આ ભયાનક દ્રશ્યો સ્પષ્ટપણે દર્શાવે છે કે પહાડો પર વરસાદ હજુ બંધ થયો નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ