હવામાન / મહારાષ્ટ્રમાં સમય પહેલા ચોમાસાનું આગમન, મુંબઈ સહિતના શહેરોમાં ભારે વરસાદની ચેતવણી

કેરળ પછી દક્ષિણ પશ્ચિમ ચોમાસું મહારાષ્ટ્રમાં પણ સમય પહેલાં પ્રવેશી ગયું છે. હવામાન વિભાગના અધિકારી સુભાંગીના જણાવ્યા મુજબ આગામી 2 થી 3 દિવસમાં ચોમાસું મુંબઈ સુધી પહોંચી શકે છે. તેની અસરથી રાજ્યના અનેક વિસ્તારોમાં ભારે વરસાદની ચેતવણી જાહેર કરવામાં આવી છે.

ભારતીય હવામાન વિભાગ (IMD) અનુસાર હાલમાં ચોમાસાની ઉત્તર લાઇન મહારાષ્ટ્રના દેવગઢ સુધી પહોંચી ગઈ છે, જે સામાન્ય સમય કરતાં થોડા દિવસ પહેલાંની સ્થિતિ છે. હવામાન નિષ્ણાતોનું માનવું છે કે આગામી દિવસોમાં રાજ્યના અન્ય ભાગોમાં પણ સારો વરસાદ જોવા મળી શકે છે.

ચોમાસાના સમય પહેલા આગમનથી ખેડૂતોને રાહત મળવાની આશા છે, જયારે નગરપાલિકા અને વહીવટી તંત્ર માટે વરસાદનો સામનો કરવા તૈયારી કરવાનો પડકાર વધ્યો છે.

મુંબઈ અને કોંકણમાં ભારે વરસાદની ચેતવણી

હવામાન વિભાગે રવિવારે કોંકણ અને પશ્ચિમ મહારાષ્ટ્રના કેટલાક વિસ્તારો માટે આગામી કેટલાક દિવસો સુધી ભારેથી અતિભારે વરસાદની ચેતવણી આપી છે. IMD અનુસાર આ દરમિયાન ગર્જના સાથે વીજળી પડવાની અને તીવ્ર પવનની પણ શક્યતા છે. હવામાન વિભાગના જણાવ્યા મુજબ દક્ષિણ મહારાષ્ટ્રમાં ચોમાસાનું આગમન થઈ ગયું છે, જયારે મુંબઈ અને કોંકણમાં હાલ પ્રી-મોન્સૂન વરસાદ થઈ રહ્યો છે.

રાયગઢ, રતનગિરિ, સિંધુદુર્ગ અને પુણે માટે ઓરેન્જ એલર્ટ

બપોરે જારી કરાયેલા એલર્ટ અનુસાર ભારતીય હવામાન વિભાગ (IMD) એ રાયગઢ, રત્નાગિરિ અને સિંધુદુર્ગ જિલ્લાઓ સાથે સતારા, પુણે અને કોલ્હાપુર જિલ્લાના ઘાટ વિસ્તારમાં ઓરેન્જ એલર્ટ જાહેર કર્યો છે. રાયગઢ માટે આ એલર્ટ 25 અને 26 મે સુધી માન્ય રહેશે. જ્યારે રત્નાગિરિ, સિંધુદુર્ગ અને ઘાટ વિસ્તારો માટે પાંચ દિવસ સુધી એલર્ટ લાગુ રહેશે.

મુંબઈ, થાણે, પાલઘરમાં યલો એલર્ટ

IMD એ ચેતવણી આપી છે કે આ વિસ્તારોમાં 50-60 કિમી પ્રતિ કલાકની ઝડપથી પવન ફૂંકાઈ શકે છે, ગર્જના સાથે વરસાદ અને વીજળી પડવાની શક્યતા છે. આ સાથે હવામાન વિભાગે મુંબઈ, થાણે, પાલઘર અને મહારાષ્ટ્રના ઘણા અન્ય જિલ્લાઓ માટે યલો એલર્ટ પણ જાહેર કર્યો છે, જે ચેતવણી અને સાવચેતીનો સંકેત છે.

BMCના એક અધિકારી અનુસાર છેલ્લા 24 કલાક દરમિયાન સવારે 8 વાગ્યા સુધી મુંબઈમાં 37 મિમિ વરસાદ નોંધાયો છે. હવામાન વિભાગની ચેતવણીને ધ્યાનમાં રાખીને સ્થાનિક તંત્ર અને નાગરિકોને સતર્ક રહેવા સલાહ આપવામાં આવી છે.

કેરળમાં ચોમાસાનું આગમન

કેરળમાં ચોમાસું પહોંચી ગયું છે. ભારતમાં મુખ્ય ભૂમિ પર છેલ્લા 16 વર્ષમાં ચોમાસાનું આ સૌથી વહેલું આગમન છે. આ વખતે નિર્ધારિત સમય કરતાં 8 દિવસ પહેલાં જ ચોમાસું કેરળ પહોંચ્યું છે. IMD અનુસાર છેલ્લી વખત રાજ્યમાં ચોમાસાનું આગમન વહેલા થયું હોય તેવું 2009 અને 2001માં 23 મેના રોજ થયું હતું.

વધુ વાંચો: શાહજહાંપુર મેડિકલ કોલેજમાં ગેસ લીકેજ, દર્દીઓમાં મચી અફરાતફરી, એકનું મોત

કેરળમાં ચોમાસાના આગમનની સામાન્ય તારીખ 1 જૂન છે. જોકે 1918માં કેરળમાં 11 મેના રોજ ચોમાસાનું આગમન થયું હતું, જે આજ દિન સુધીનો સૌથી વહેલા ચોમાસાના આગમનનો રેકોર્ડ છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ