દિલ્હી / ભારતનું મોટું પગલું... Pax Silica સાથે ભારતની ભાગીદારી, ચીનને લાગશે મરચાં

India partnership with Pax Silica : ભારતે વૈશ્વિક ટેકનોલોજી અને સપ્લાય ચેઇન ક્ષેત્રમાં એક મહત્વપૂર્ણ પગલું ભર્યું છે. વાસ્તવમાં અમેરિકાના નેતૃત્વ હેઠળ રચાયેલા વ્યૂહાત્મક ગઠબંધન Pax Silica સાથે જોડાવાની ભારતે સત્તાવાર જાહેરાત કરી છે.

નવી દિલ્હીમાં યોજાયેલી India AI Impact Summit 2026 દરમિયાન આ ઘોષણાપત્ર પર હસ્તાક્ષર થયા હતા. આ ભાગીદારીનો મુખ્ય હેતુ મહત્વપૂર્ણ ખનિજો, સેમિકન્ડક્ટર અને કૃત્રિમ બુદ્ધિ (AI) જેવા ક્ષેત્રોમાં મજબૂત અને વિશ્વસનીય સપ્લાય ચેઇન ઉભી કરવાનો છે. ખાસ કરીને દુર્લભ પૃથ્વી ધાતુઓ માટે ચીન પરની નિર્ભરતા ઘટાડવામાં આ પહેલ ઉપયોગી સાબિત થઈ શકે છે.

ચીનના વર્ચસ્વને પડકાર

દુર્લભ ખનિજો અને સિલિકોન આધારિત ઉદ્યોગોમાં ચીનનું પ્રભાવશાળી સ્થાન છે. Pax Silica જેવી પહેલ દ્વારા ભાગીદાર દેશો સાથે મળીને વૈકલ્પિક સપ્લાય ચેઇન વિકસાવવા પ્રયાસ થઈ રહ્યો છે. ભારત માટે આ તક વ્યૂહાત્મક રીતે મહત્વપૂર્ણ છે, કારણ કે તે ઇલેક્ટ્રોનિક્સ અને સેમિકન્ડક્ટર ઉદ્યોગને મજબૂત બનાવશે.

અહેવાલો મુજબ દેશમાં અનેક સેમિકન્ડક્ટર પ્લાન્ટ સ્થાપિત થઈ રહ્યા છે અને ટૂંક સમયમાં પ્રથમ પ્લાન્ટ વ્યાપારી ઉત્પાદન શરૂ કરી શકે છે. Pax Silica સાથેની ભાગીદારી આ ક્ષેત્રમાં ટેકનોલોજી, રોકાણ અને કુશળતા વધારવામાં મદદરૂપ થશે.

અમેરિકા સાથે મજબૂત સહકાર

ભારતમાં અમેરિકાના રાજદૂત Sergio Goreએ આ પહેલને 21મી સદીના આર્થિક અને ટેકનોલોજીકલ દૃશ્યને આકાર આપનાર વ્યૂહાત્મક જોડાણ તરીકે વર્ણવી. તેમનું માનવું છે કે ભારતની એન્જિનિયરિંગ પ્રતિભા અને અમેરિકા સાથેનો સહકાર વિશ્વસનીય AI વિકાસમાં મહત્વની ભૂમિકા ભજવશે.

આ પણ વાંચો : જબલપુરના સિહોરામાં મંદિરમાં આરતી દરમિયાન ઉગ્ર વિવાદ, તોડફોડ બાદ બે જૂથોમાં પથ્થરમારો

હવે જાણો Pax Silica શું છે?

Pax Silica એ એક આંતરરાષ્ટ્રીય ગઠબંધન છે, જે AI અને સેમિકન્ડક્ટર માટે સુરક્ષિત વૈશ્વિક સપ્લાય ચેઇન બનાવવાના હેતુથી શરૂ થયું છે. ગયા વર્ષે વોશિંગ્ટનમાં યોજાયેલી સમિટમાં ઓસ્ટ્રેલિયા, જાપાન, ઇઝરાયલ, કતાર, દક્ષિણ કોરિયા, સિંગાપોર, યુએઈ અને યુકે જેવા દેશોએ ભાગ લીધો હતો. આ પહેલ 20મી સદીના તેલ આધારિત અર્થતંત્રથી આગળ વધી સિલિકોન અને મહત્વપૂર્ણ ખનિજ આધારિત અર્થતંત્ર તરફના પરિવર્તનનું પ્રતિનિધિત્વ કરે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ