વિવાદ / મહેબૂબા મુફ્તીની પુત્રીએ નીતિશ કુમાર વિરુદ્ધ ફરિયાદ નોંધાવી, મહિલાઓની ભાવનાઓને ઠેસ પહોંચાડવાનો આરોપ લગાવ્યો

Hijab Controversy Row: જમ્મુ અને કાશ્મીરના ભૂતપૂર્વ મુખ્યમંત્રી મહેબૂબા મુફ્તીની પુત્રી ઇલ્તિજા મુફ્તીએ શુક્રવારે શ્રીનગરમાં બિહારના મુખ્યમંત્રી નીતિશ કુમાર વિરુદ્ધ ફરિયાદ નોંધાવી હતી. તેમણે તેમના પર મુસ્લિમ સમુદાય, ખાસ કરીને મહિલાઓની લાગણીઓને ઠેસ પહોંચાડવાનો આરોપ લગાવ્યો હતો.

શું છે આખો મામલો?

સોમવારે પટનામાં મુખ્યમંત્રી સચિવાલયમાં એક કાર્યક્રમ દરમિયાન બિહારના મુખ્યમંત્રી નીતિશ કુમારે આયુષ ડોક્ટરનો હિજાબ ઉતારી દીધો હતો, જેનો એક વીડિયો સોશિયલ મીડિયા પર વાયરલ થયો છે, જેનાથી રાજકીય હોબાળો મચી ગયો છે. આ ઘટના ત્યારે બની જ્યારે આયુષ ડોક્ટરો તેમના નિમણૂક પત્રો લેવા માટે એકઠા થયા હતા. જ્યારે મહિલા આયુષ ડોક્ટર નુસરત પરવીન પોતાનો પત્ર લેવા માટે સ્ટેજ પર આવી, ત્યારે નીતિશ કુમારે તેમનો બુરખો જોયો, અને બૂમ પાડી, "આ શું છે?", અને પછી તેને ઉતારી દીધો.

ઇલ્તિજાએ પોતાની ફરિયાદ ક્યાં નોંધાવી?

શુક્રવારે શ્રીનગરના કોઠીબાગ પોલીસ સ્ટેશનમાં ઇલ્તિજા મુફ્તીએ નીતિશ કુમાર વિરુદ્ધ ફરિયાદ નોંધાવી હતી. ફરિયાદમાં ઇલ્તિજાએ કહ્યું હતું કે, "હું મુસ્લિમો, ખાસ કરીને મહિલાઓને દુઃખ પહોંચાડનારી એક ઘૃણાસ્પદ ઘટના તરફ તમારું ધ્યાન દોરવા માટે લખી રહી છું."

"થોડા દિવસો પહેલા, અમે બિહારના મુખ્યમંત્રી નીતિશ કુમારને એક સરકારી કાર્યક્રમમાં એક યુવાન મુસ્લિમ ડોક્ટર નુસરત પરવીનનો હિજાબ જાહેરમાં ઉતારતા જોયો, જેનાથી અમને આઘાત, ભય અને ચિંતા થઈ ગઈ. બિહારના નાયબ મુખ્યમંત્રી સહિત આસપાસના લોકો આ જોઈને હસ્યા અને પરિસ્થિતિ વધુ ખરાબ થઈ ગઈ. તેમનો બુરખો બળજબરીથી ઉતારવો એ માત્ર એક મુસ્લિમ મહિલા પર ક્રૂર હુમલો નથી, પરંતુ દરેક ભારતીય મહિલાની સ્વાયત્તતા, ઓળખ અને ગૌરવ પર પણ હુમલો છે," તેમણે પોતાની ફરિયાદમાં જણાવ્યું હતું.

વધુ વાંચો: 'કંઇક એવું થશે, જેથી આખું બાંગ્લાદેશ...', ઉસ્માન હાદીના મોત પહેલા આરોપીએ ગર્લફ્રેન્ડને આ શું કહ્યું?

નિષ્પક્ષ તપાસની માંગ

ઇલ્તિજાએ માંગ કરી હતી કે પોલીસ ફરિયાદના આધારે એફઆઈઆર નોંધે અને નિષ્પક્ષ તપાસ કરે. તેમણે માંગ કરી હતી કે આ કેસની નિષ્પક્ષ તપાસ થાય અને દોષિતો સામે કડક કાનૂની કાર્યવાહી કરવામાં આવે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ