રજૂઆત / લુવારા ગામની મહિલા વિરુદ્ધ ફરિયાદ મુદ્દે ક્ષત્રિય સમાજના આગેવાનોની મુખ્યમંત્રી સાથે મુલાકાત

• ક્ષત્રિય આગેવાનોની મુખ્યમંત્રી સાથે મુલાકાત
• ભોગ બનનાર મહિલા નિર્દોષ હોવાની રજૂઆત
• નિષ્પક્ષ તપાસ કરવા કરી માગ

ક્ષત્રિય સમાજના આગેવાનોએ મુખ્યમંત્રી રૂપાણી સાથે મુલાકાત કરી છે. અમરેલીના લુવારા ગામની મહિલા વિરુદ્ધ ફરિયાદ મુદ્દે મુલાકાત કરવામાં આવી છે. ક્ષત્રિય સમાજ દ્વારા મુખ્યમંત્રીને રજૂઆત કરવામાં આવી છે કે, ભોગ બનનાર મહિલા નિર્દોષ છે. અને જવાબદાર પોલીસકર્મીઓ સામે ગુનો દાખલ કરવાની માગણી પણ કરી છે. આ સાથે જિલ્લા SPને તાત્કાલિક સસ્પેન્ડ કરવા માટે પણ માગ કરાઈ છે. તો છેલ્લા 3 વર્ષમાં થયેલી ફરિયાદની નિષ્પક્ષ તપાસ કરવાનું પણ સૂચન કરાયું છે.

શું છે સમગ્ર મામલો

અમરેલીના લુવારા ગામેથી ગુજસીટોકના ગુનામાં આરોપી અશોક બોરીચાને 26 જાન્યુઆરીના રોજ ધરપકડ કરાઈ હતી. લોકલ પોલીસ અને LCB આરોપીની ધરપકડ કરવા વાડીએ પહોંચી હતી. ત્યારે આરોપી તરફથી ફાયરિંગની ઘટના સર્જાઈ હતી. જવાબમાં પોલીસે પણ ફાયરિંગ કર્યું હતું. ફાર્મ હાઉસથી આરોપીની ધરપકડ બાદ આરોપીને તેના ઘરે લઈ જવાયો હતો. જ્યાંથી મોટા પ્રમાણમાં કારતૂસ અને શસ્ત્ર મળી આવ્યા હોવાની વાત પોલીસે કરી હતી. 

આ દરમિયાન લોકોનું ટોળું ભેગું થઈ રહ્યું હતું. જે બાદ પોલીસે લોકોના ટોળાને વિખેરવા માટે હવામાં ફાયરિંગ કર્યું હતું. આ દરમિાયન સ્થાનિક રહીશે ફાયરિંગનો વીડિયો બનાવ્યો હતો. વીડિયો ઉતારનારી કાઠી ક્ષત્રિય સમાજની દિકરી વિરુદ્ધ ગુનો દાખલ કરી પોલીસે કરેલા વ્યવહારનો સમગ્ર કાઠી ક્ષત્રિય સમાજમાં રોષ ઉઠ્યો છે.