શુભ વિવાહ / વિક્રમ સંવતના નવા વર્ષમાં લગ્નનાં મુહૂર્ત માત્ર 42 દિવસ

• ગત વર્ષે 61 જેટલા દિવસ હતા 
• નવા વર્ષમાં પ્રથમ લગ્નનું મુહૂર્ત 20 નવેમ્બરથી
• 30 જૂને અષાઢ સુદ દશમના છેલ્લુ મુહૂર્ત 

વિક્રમ સંવત 2075નું સમાપન 28 ઓક્ટોબરે થઈ રહ્યું છે. તેની સાથે નવા વર્ષનો પ્રારંભ પડવો ક્ષય તિથિ હોવાથી બીજ સાથે થઈ રહ્યો છે. જેમાં વિક્રમ સંવત 2076ના વર્ષમાં લગ્નનાં મુહૂર્ત ફક્ત 42 દિવસ છે. ગત વર્ષે 61 જેટલા દિવસ લગ્નનાં મુહૂર્ત હતાં. જે કદાચ છેલ્લાં દસકામાં સૌથી વધારે હતાં.

સૌપ્રથમ લગ્નનું મુહૂર્ત 20 નવેમ્બર કારતક વદ આઠમના રોજ
ગયા વર્ષની સામે આ વર્ષે ફક્ત 42 દિવસ જ લગ્નનાં મુહૂર્ત છે. જેમાં દેવઊઠી એકાદશી સાત-આઠ નવેમ્બરે છે. સૂર્ય તુલા રાશિમાં નીચનો છે, જેના કારણે લગ્નનાં મુહૂર્ત નથી. ત્યારબાદ 16 નવેમ્બરે સૂર્યની વૃશ્ચિક સંક્રાંતિ બાદ સૌપ્રથમ લગ્નનું મુહૂર્ત 20 નવેમ્બર કારતક વદ આઠમના રોજથી શરૂ થશે.

15જાન્યુઆરીએ સવારથી સૂર્યના મકર રાશિમાં પ્રવેશ સાથે લગ્નનાં મુહૂર્તનો પ્રારંભ
નવેમ્બર મહિનામાં 28મી સુધીમાં ચાર દિવસ લગ્નનાં મુહૂર્ત છે. ત્યારબાદ 12 ડિસેમ્બર સુધીમાં સાત દિવસ લગ્નનાં મુહૂર્ત છે. 16 ડિસેમ્બરે સૂર્યના ધન રાશિમાં પ્રવેશ સાથે ધનારકના કારણે લગ્નનાં મુહૂર્ત નથી. 15 જાન્યુઆરીએ વહેલી સવારે સૂર્યના મકર રાશિમાં પ્રવેશ સાથે લગ્નનાં મુહૂર્તનો પ્રારંભ થયા બાદ 18 જાન્યુઆરીએ પ્રથમ મુહૂર્ત છે. 

30 જૂને અષાઢ સુદ દશમના છેલ્લુ મુહૂર્ત 
માર્ચ મહિના સુધીમાં 13 દિવસ લગ્નનાં મુહૂર્ત છે. ત્રીજી માર્ચે હોળાષ્ટકના પ્રારંભ સાથે આઠ માર્ચ સુધી અને 14 માર્ચે મીનારકનો પ્રારંભ થતાં લગ્નનાં મુહૂર્ત નથી. માર્ચ મહિનામાં ફક્ત બે દિવસ 11 અને 12 માર્ચે લગ્નનાં મુહૂર્ત છે. 13 એપ્રિલે મીનારકનું સમાપન થતાં લગ્નના મુહૂર્તનો પ્રારંભ થશે, 30 જૂને અષાઢ સુદ દશમના છેલ્લાં મુહૂર્ત સાથે સમાપન થશે.