ટેક્નોલોજી / 13 વર્ષ બાદ બંધ થવા જઇ રહી છે WhatsAppને ટક્કર આપનારી આ App

13 વર્ષ પહેલાં WhatsApp ને ટક્કર આપવા માટે આવેલી મેસેજિંગ અને ગેમિંગ એપ હાઈકએ ઘણી ચર્ચાઓમાં સ્થાન મેળવ્યું હતું, પરંતુ હવે આ એપ હંમેશા માટે બંધ થવા જઈ રહી છે.

એપના સ્થાપક કવિન મિત્તલે રોકાણકારોને ઇમેલ મારફતે જાણકારી આપી છે કે હાઈક પૂરી રીતે બંધ થવા જઈ રહ્યું છે, જેમાં અમેરિકામાં ચાલતો તેનો બિઝનેસ પણ સામેલ છે. ચાલો જાણીએ કે WhatsApp ને ટક્કર આપનાર આ એપને અંતે શા માટે બંધ કરવી પડી?

હાઈક એપ બંધ થવાનું કારણ

કવિન મિત્તલે કરેલા ઇમેલમાં ભારત સરકાર દ્વારા રિયલ મની ગેમિંગ પર મૂકાયેલા પ્રતિબંધનો ઉલ્લેખ કરવામાં આવ્યો છે. Entrackr દ્વારા જોવામાં આવેલા ઇમેલમાં લખાયું છે કે,

"મેં હાઈકનું સંચાલન સંપૂર્ણ રીતે બંધ કરવાનો નિર્ણય લીધો છે. કંપનીનો નવો ગેમિંગ બિઝનેસ ખૂબ જ ઓછા સમયમાં સફળ થયો હતો, માત્ર ચાર વર્ષમાં કંપનીએ મોટો યૂઝર બેઝ ઉભો કર્યો હતો, પરંતુ તાજેતરમાં ભારત સરકાર દ્વારા રિયલ મની ગેમિંગ પર પ્રતિબંધ મૂકવાથી હાઈકના બિઝનેસ મોડલને મોટું નુકસાન થયું છે."

કવિન મિત્તલના જણાવ્યા અનુસાર, આ નવા નિયમને કારણે કંપનીને આર્થિક નુકસાન વેઠવું પડ્યું છે. હાઈકનો અમેરિકાનો નવો બિઝનેસ સારા પરિણામો આપી રહ્યો હતો, પરંતુ ભારતમાં પ્રતિબંધ પછી થયેલા આર્થિક નુકસાનને કારણે કંપનીના સ્થાપકને આ નિર્ણય લેવા મજબૂર થવું પડ્યું.

રિપોર્ટ મુજબ, હાઈકની બેલેન્સ શીટમાં હાલ 4 મિલિયન ડોલર એટલે કે લગભગ 35.30 કરોડ રૂપિયા વધ્યા છે. આ રકમનો ઉપયોગ વેન્ડર્સની કિમત ચૂકવવા અને કર્મચારીઓને પગાર આપવામાં કરવામાં આવશે. ત્યારબાદ બાકી રહેલા પૈસા રોકાણકારોને પાછા આપવામાં આવશે.

વધુ વાંચો : ના હોય! હાઇ બ્લડ પ્રેશર પર એલર્ટ આપશે આ Apple Watch? ફીચર્સને મળી મંજૂરી

શરૂઆત કેવી રીતે થઈ?

WhatsApp જેમ હાઈક પણ એક મેસેજિંગ એપ તરીકે શરૂ થયું હતું, પરંતુ તે સફળતાપૂર્વક સ્પર્ધા આપી શક્યું નહીં. એ કારણે કંપનીએ પોતાના બિઝનેસનું ધ્યાન ગેમિંગ પર કેન્દ્રિત કર્યું અને Rush નામનું નવું પ્લેટફોર્મ તૈયાર કર્યું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ