તમારા કામનું / રોજ 9 કલાકથી વધારે ઊંઘવું એટલે મોતને નોતરું!, સ્ટડીમાં સામે આવી આંખ ઉઘાડતી હકીકત

આપણે વારંવાર સાંભળીએ છીએ કે ઓછી ઊંઘ લેવાથી શરીર પર ખરાબ અસર પડે છે. તેનાથી થાક, ચીડિયાપણું, હૃદયરોગ, ડિપ્રેશન અને નબળી રોગપ્રતિકારક શક્તિ જેવી સમસ્યાઓ ઊભી થાય છે. પરંતુ તાજેતરના અભ્યાસો દર્શાવે છે કે જો કોઈ વ્યક્તિ દિવસમાં 9 કલાકથી વધુ ઊંઘે છે, તો તે પણ એટલું જ જોખમી સાબિત થઈ શકે છે.

ઊંઘ આપણા શરીર અને મન માટે એટલી જ જરૂરી છે જેટલો યોગ્ય આહાર અને નિયમિત વ્યાયામ. ઊંઘ દરમિયાન શરીર પેશીઓનું સમારકામ કરે છે, હોર્મોન્સને સંતુલિત કરે છે, યાદશક્તિને મજબૂત બનાવે છે અને રોગપ્રતિકારક શક્તિ વધારવામાં મદદ કરે છે. સ્લીપ હેલ્થ ફાઉન્ડેશન મુજબ, પુખ્ત વયના લોકો માટે 7 થી 9 કલાકની ઊંઘ શ્રેષ્ઠ માનવામાં આવે છે.

મૃત્યુનું જોખમ

અભ્યાસ મુજબ, 7 કલાકથી ઓછી ઊંઘ લેનારા લોકોમાં મૃત્યુનું જોખમ 14% વધારે જોવા મળ્યું. પરંતુ આશ્ચર્યજનક રીતે, 9 કલાકથી વધુ ઊંઘ લેનારા લોકોમાં આ જોખમ 34% જેટલું વધે છે. એટલે કે, વધારે પડતી ઊંઘ લાંબા ગાળે અકાળ મૃત્યુ, ડાયાબિટીસ, ડિપ્રેશન અને હૃદય સંબંધિત રોગોનું કારણ બની શકે છે.

લાંબી ઊંઘ સાથે હતાશા, ક્રોનિક પીડા, વજનમાં વધારો અને પ્રકાર-2 ડાયાબિટીસ જેવા રોગો વધુ જોવા મળે છે. જો કે નિષ્ણાતો માને છે કે વધારે ઊંઘ સીધું કારણ નથી, પરંતુ ઘણીવાર તે કોઈ છુપાયેલા રોગ અથવા જીવનશૈલીની સમસ્યાનું લક્ષણ હોઈ શકે છે. ઉદાહરણ તરીકે, સ્લીપ એપનિયા, ડિપ્રેશન કે દવાઓના સાઇડ ઇફેક્ટ્સને કારણે શરીરને વધુ ઊંઘની જરૂર પડી શકે છે. સ્વસ્થ જીવન માટે ઊંઘની લંબાઈ સાથે તેની ગુણવત્તા પણ મહત્વપૂર્ણ છે. કિશોરોને 8 થી 10 કલાક, પુખ્તોને 7 થી 9 કલાક અને વૃદ્ધોને લગભગ એટલી જ ઊંઘ જરૂરી ગણાય છે.

આ પણ વાંચો : ચોમાસામાં ગંદી વાસવાળા કાળા કીડાથી છો પરેશાન? આ અસરદાર રીતથી મળશે છુટકારો

સ્વસ્થ ઊંઘ માટે નિષ્ણાતો કહે છે કે દરરોજ એક જ સમયે સૂવું-ઉઠવું, સૂતા પહેલાં મોબાઇલ-ટીવીથી દૂર રહેવું, બેડરૂમને શાંત-અંધકારમય રાખવું અને ધ્યાન અથવા પુસ્તક વાંચવું ફાયદાકારક છે. એવુ કહી શકાય કે જેમ ઓછી ઊંઘ શરીરને નુકસાન કરે છે, તેમ વધારે ઊંઘ પણ સ્વાસ્થ્ય માટે જોખમી બની શકે છે. જો વારંવાર 9 કલાકથી વધુ ઊંઘ્યા છતાં થાક લાગે, તો તાત્કાલિક ડૉક્ટરની સલાહ લેવી જોઈએ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ