વિવાદ / બિગ બૉસના ઘરમાં એવા દ્રશ્યો સર્જાયા કે સલમાન ખાનના ઘરની બહાર તકલીફ વધી

પદ્દમાવત ફિલ્મ વખતે ચર્ચામાં આવેલી રાજપૂતોની કરણી સેના ફરી એક વખત ચર્ચાનું કેન્દ્ર બની છે. 

સૂત્રોના અહેવાલ મુજબ બૉલીવુડ અભિનેતા સલમાન ખાનના ઘરની બહાર કરણી સેના દેખાવો કરી રહી હતી. આ વિરોધને ધ્યાને લઇને સલમાન ખાનના ઘરની આસપાસની સુરક્ષામાં વધારો કરવામાં આવ્યો છે અને કરણી સેનાના 20 કાર્યકરોની ધરપકડ કરવામાં આવી છે. 

શું હતો વિવાદ?

સલમાન ખાનના પ્રખ્યાત શો બિગ બોસની 13મી સીઝનમાં આ વખતે "બેડ ફ્રેન્ડ ફોરેવર" કન્સેપ્ટ શરુ કરવામાં આવ્યો હતો જેમાં શોના ભાગ લેનાર પુરુષો અને સ્ત્રીઓએ સાથે એક પલંગ ઉપર સુઈ જવાનો ટાસ્ક હતો. આ કન્સેપ્ટનો ભારે વિરોધ થઇ રહ્યો છે. શોને બંધ કરવા સહિતની માંગણીઓ કરવામાં આવી રહી છે. આ કન્સેપ્ટ દેશમાં અશ્લીલતા ફેલાવી રહ્યો છે તેવો આક્ષેપ મુકાયો છે. આ કન્સેપ્ટ શોના મેકર્સે બદલી નાખ્યો હોવા છતાં આ વિવાદ શમી રહ્યો નથી. 

ટ્વીટર પર આ હેશટેગ વાઇરલ 

ટ્વીટર ઉપર આ શોને બંધ કરી દેવાની માંગ ઉઠી છે. આ માટે #Boycott_Bigboss અને #UnsubscribeColoursTV જેવા હેશટેગ ટ્રેડિંગમાં આવી ચુક્યા છે.

BJPના MLAએ પ્રતિબંધને સમર્થન આપ્યું 

આ મામલે ગાઝિયાબાદના લોની વિસ્તારના વિધાનસભાના ભાજપના MLA નંદ કિશોર ગુર્જરે સૂચના અને પ્રસારણ મંત્રાલયને એક પત્ર લખ્યો હતો. આ પત્રમાં તેમણે કલર્સ ચેનલના બિગ બોસ શો ઉપર તાત્કાલિક ધોરણે પ્રતિબંધ મુકવાની માંગ કરી હતી. 

લોકોની આ માંગને સૂચના અને પ્રસારણ મંત્રાલયે પણ આ વાતને ગંભીરતાથી લીધી છે. સૂત્રોને મળેલી માહિતી મુજબ સૂચના અને પ્રસારણ મંત્રાલય બિગ બોસ શો ઉપર પ્રતિબંધ મુકવાનું વિચારી રહી છે.  

નંદ કિશોરે પત્રમાં બિગ બોસ ઉપર ગંભીર આરોપો મુકતા જણાવ્યું હતું કે બિગ બોસ ટીવી ઉપર પ્રાઈમ ટાઈમના સ્લોટમાં પ્રસારિત થાય છે. આ શોનું કન્ટેન્ટ ખુબ અશ્લીલ અને બીભત્સ છે. આ શોની સ્થિતિ એવી થઇ ગઈ છે કે તેને પરિવાર સાથે જોવો ખુબ મુશ્કેલ થઇ ગયો છે. આ શોનું કન્ટેન્ટ એવી રીતે તૈયાર કરવામાં આવી રહ્યું છે કે જેથી દેશનો પૌરાણિક, પારંપારિક, સામાજિક અને સાંસ્કૃતિક મૂલ્યોને નુકશાન પહોંચી શકે છે.