બિઝનેસ / સેન્સેક્સ-નિફ્ટીમાં જોરદાર કડાકો, રોકાણકારોના ₹8 લાખ કરોડ સ્વાહા!

સવારે 9:15 વાગ્યે શેર માર્કેટમાં ફરી ભારે ઘટાડો જોવા મળ્યો. Sensex 1613 પોઇન્ટ નીચે જઈને 75,937 પર ખુલ્યો, જ્યારે Nifty 50 461 પોઇન્ટ ઘટીને 23,589 પર ખુલ્યો. ઇન્ડિગો, મારુતિ અને L&T જેવા મોટા શેરોમાં પણ શરૂઆતથી જ ભારે ઘટાડો જોવા મળ્યો. ભારતીય રૂપિયો પણ દબાણમાં છે. તે આજે 93.28 પ્રતિ ડોલર પર ખુલ્યો જે શુક્રવારના 92.73 કરતાં 55 પૈસા નબળો છે.

સવારે 7:35 વાગ્યાની માહિતી મુજબ અમેરિકા અને ઈરાન વચ્ચેનો તણાવ ઓછો કરવા માટે પાકિસ્તાનમાં થયેલી વાતચીત નિષ્ફળ ગઈ છે. સાથે જ કાચા તેલની કિંમતો વધતા ગ્લોબલ માર્કેટમાં નબળાઈ જોવા મળી છે. તેની અસર ભારતીય શેર માર્કેટ પર પણ પડી રહી છે. એશિયન બજારોમાં પણ ઘટાડો રહ્યો જેમાં જાપાનનો નિક્કેઈ 225, દક્ષિણ કોરિયાનો કોસ્પી અને હાંગકાંગનો હેંગસેંગ ઇન્ડેક્સ બધા નીચે ગયા. આ તમામ કારણોસર આજે ભારતીય બજાર ઘટાડા સાથે ખુલ્યું.

ગિફ્ટ નિફ્ટી આજે

GIFT Nifty આજે લગભગ 23,768 આસપાસ ટ્રેડ કરી રહ્યો હતો જે નિફ્ટી ફ્યુચર્સના ગયા બંધ કરતા લગભગ 333 પોઇન્ટ ઓછો છે. આથી ભારતીય શેર માર્કેટ આજે ઘટાડા સાથે શરૂ થવાનો સંકેત મળે છે.

વોલ સ્ટ્રીટની સ્થિતિ

અમેરિકાના બજારમાં પણ નબળાઈ જોવા મળી. Dow Jones Industrial Average ફ્યુચર્સ 517 પોઇન્ટ (1.1%) ઘટ્યા, જ્યારે S&P 500 અને Nasdaq 100 ફ્યુચર્સ પણ લગભગ 1.1% અને 1.2% ઘટ્યા.

આ પણ વાંચોઃ મે મહિનાથી ભારત-યુકે વચ્ચે FTA લાગુ થશે, નિકાસમાં થશે વધુ ફાયદો

કાચા તેલના ભાવ

અમેરિકા-ઈરાન તણાવ અને ડોનાલ્ડ ટ્રમ્પની ધમકી પછી કાચા તેલના ભાવમાં તેજી આવી. બ્રેન્ટ ક્રૂડ લગભગ 7.05% વધી 101.91 ડોલર પ્રતિ બેરલ થયો જ્યારે યુએસ વેસ્ટ ટેક્સાસ ઇન્ટરમીડિયેટ 7.86% વધીને 104.16 ડોલર પ્રતિ બેરલ સુધી પહોંચી ગયો.

સોનાના ભાવમાં ઘટાડો

આજે મજબૂત ડોલરના દબાણને કારણે સોનાના ભાવમાં ઘટાડો જોવા મળ્યો. સોમવારે સોનાની કિંમત લગભગ એક અઠવાડિયાના સૌથી નીચા સ્તર પર આવી ગઈ. સ્પોટ ગોલ્ડ 1.1% ઘટીને 4,694.30 ડોલર પ્રતિ ઔંસ પર પહોંચ્યું, જે 7 એપ્રિલ પછીનો સૌથી નીચો સ્તર છે. જૂન ડિલિવરી માટે અમેરિકન ગોલ્ડ ફ્યુચર્સ 1.4% ઘટીને 4,717.80 ડોલર પર આવી ગયું. સાથે જ સ્પોટ સિલ્વર પણ 1.9% ઘટીને 74.45 ડોલર પ્રતિ ઔંસ પર આવી ગયું.

ડોલર અપડેટ

છ કરન્સીઓની સામે અમેરિકન ડોલર ઈન્ડેક્સ 99.056 પર લગભગ સ્થિર રહ્યો જે 7 એપ્રિલ પછીના તેના હાઈ લેવલ નજીક છે. યુરો 0.3% ઘટીને 1.1684 ડોલર પર આવી ગયો, જ્યારે બ્રિટિશ પાઉન્ડ 0.5% ઘટીને 1.3398 ડોલર પર પહોંચી ગયો. યેનની સામે અમેરિકન ડોલર 0.4% વધીને 159.83 પર ટ્રેડ થઈ રહ્યો હતો.

(DISCLAIMER: બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, vtvgujarati.com કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.)

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ