સ્પોર્ટસ / અમેરિકન ખેલાડી તો ટ્રમ્પનો પણ બાપ નિકળ્યો, રાજાને ઉઠાવીને ફેંકી દીધો

અમેરિકન ચેસ સ્ટાર હિકારુ નાકામુરા વિશ્વ ચેમ્પિયન ડી. ગુકેશને હરાવ્યા બાદ કિંગ (રાજા) ફેંકવાના વિવાદાસ્પદ કૃત્યને કારણે હાલમાં ચર્ચામાં છે. યુએસએ વિરુદ્ધ ભારત ચેકમેટ ટુર્નામેન્ટમાં યુએસએની 5-0ની જીત બાદ આ ઘટના બની હતી. નાકામુરાની આ ઉજવણીને અનેક ભૂતપૂર્વ ખેલાડીઓ દ્વારા રમતની ભાવના વિરુદ્ધ અને અપમાનજનક ગણાવવામાં આવી છે. ખાસ કરીને ભૂતપૂર્વ વિશ્વ ચેમ્પિયન વ્લાદિમીર ક્રેમનિકે X પર લખીને આ કૃત્યને 'બાલિશ', 'બેસ્વાદ' અને 'ઉશ્કેરણીજનક' ગણાવીને ચેસની ગરિમાને ઘટાડનારું ગણાવ્યું હતું.

જોકે, નાકામુરાએ આ કૃત્ય બદલ માફી માંગવાનો ઇનકાર કર્યો છે અને જણાવ્યું છે કે તે "હંમેશા જીતે તો રાજાને ફેંકે છે" અને આનાથી 'બુલેટ ગેમ' વધુ 'મનોરંજક' બની હતી. તેમના સમર્થકોએ દલીલ કરી છે કે આ કૃત્ય માત્ર પ્રદર્શન માટે કરવામાં આવ્યું હતું. પ્રખ્યાત ચેસ સ્ટ્રીમર લેવી રોમેને ખુલાસો કર્યો કે ટુર્નામેન્ટના આયોજકોએ ખેલાડીઓને ઉજવણીમાં રાજાને ફેંકવા માટે પ્રોત્સાહન આપ્યું હતું, જે દર્શાવે છે કે આ એક પૂર્વ-નિયોજિત મનોરંજનનો ભાગ હતો. ભારતીય મૂળના ડચ ગ્રાન્ડમાસ્ટર અનીશ ગિરીએ પણ નાકામુરાનું સમર્થન કરતા કહ્યું કે તે ફક્ત પ્રેક્ષકો માટે એક મનોરંજક ચાલ કરી રહ્યા હતા અને આમાં કોઈ મોટી વાત નથી.

વધુ વાંચો : 'હું એક ટીમની...', હવે કોની અંદર જાગી ટીમ ઇન્ડિયાના કેપ્ટન બનવાની તમન્ના? નામ ચોંકાવનારું

આ વિવાદે ચેસમાં પરંપરા (ટ્રેડિશન) અને મનોરંજન (એન્ટરટેઇનમેન્ટ) વચ્ચેના સંતુલન પર પ્રશ્ન ઊભો કર્યો છે. ક્રેમનિક જેવા પરંપરાવાદીઓ વિરોધીના રાજાને ફેંકવાને અપમાનજનક માને છે, જ્યારે ચાહકો અને અન્ય ખેલાડીઓ દલીલ કરે છે કે ડિજિટલ યુગમાં ચેસને સોશિયલ મીડિયાને અનુરૂપ મનોરંજનનું એક સ્વરૂપ બનવાની જરૂર છે. નાકામુરાના આ કૃત્ય પાછળનો હેતુ ગમે તે હોય, એટલું સ્પષ્ટ છે કે તેમની ક્રિયાઓએ ચેસની દુનિયામાં એક નવો વિવાદ પેદા કર્યો છે અને આ મુદ્દે ચર્ચા ચાલુ રહી છે કે ચેસની રમતને તેના મૂલ્યો જાળવીને કેવી રીતે વધુ લોકપ્રિય અને આકર્ષક બનાવી શકાય.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ