હવામાન અપડેટ / વેસ્ટર્ન ડિસ્ટર્બન્સ અને ટ્રફ સક્રિય થતા વધશે ગુજરાતમાં વધશે ગરમી, હવામાન વિભાગની આગાહી

Gujarat Weather Forecast : ફરી એકવાર હવે ગરમીને લઈ હવામાન વિભાગની આગાહી સામે આવી છે. ગુજરાતમાં ફેબ્રુઆરી મહિનાની શરૂઆત સાથે જ ગરમીનો અહેસાસ વધી રહ્યો છે. હવામાન વિભાગના જણાવ્યા મુજબ ઉત્તર ગુજરાત વિસ્તારમાં વેસ્ટર્ન ડિસ્ટર્બન્સ અને ટ્રફ સક્રિય થતા તાપમાનમાં વધારો થવાની શક્યતા છે. આગામી 24 કલાક બાદ રાજ્યના મહત્તમ તાપમાનમાં અંદાજે 2 થી 3 ડિગ્રી સુધીનો વધારો નોંધાઈ શકે છે.

શું કહ્યું હવામાન વિભાગે ?

હવામાન વિભાગના ડાયરેક્ટર એ.કે. દાસે જણાવ્યું છે કે, ફેબ્રુઆરી દરમિયાન સામાન્ય કરતા ઊંચું તાપમાન નોંધાઈ શકે છે, જેના કારણે લોકોને વહેલી ગરમીનો સામનો કરવો પડી શકે છે. ખાસ કરીને ઉત્તર ગુજરાતમાં આ સિસ્ટમ સક્રિય બનતાં ગરમીનું પ્રમાણ વધુ રહેશે.

ડીસા સહીતના વિસ્તારમાં તાપમાન વધ્યું

હાલમાં રાજ્યનું સૌથી વધુ તાપમાન ડીસામાં નોંધાયું છે, જ્યાં પારો 34.3 ડિગ્રી સુધી પહોંચ્યો હતો. અમદાવાદમાં પણ 34.2 ડિગ્રી મહત્તમ તાપમાન નોંધાયું છે, જે ફેબ્રુઆરી માટે સામાન્ય કરતાં ઊંચું ગણાય છે. બીજી તરફ કેશોદમાં રાજ્યનું સૌથી ઓછું 13.5 ડિગ્રી તાપમાન નોંધાયું છે.

આ પણ વાંચો : PSIની લેખિત પરીક્ષાની તારીખ જાહેર! થોડા સમયમાં જાહેર થશે શારીરિક પરીક્ષાનું પરિણામ

મહત્વનું છે કે, હવામાન નિષ્ણાતોના જણાવ્યા મુજબ, આ પરિસ્થિતિને કારણે દિવસ દરમિયાન ગરમીનો અહેસાસ વધુ રહેશે, જ્યારે સવાર અને રાત્રિના સમયમાં હજી થોડું ઠંડક અનુભવાઈ શકે છે. આવનારા દિવસોમાં તાપમાનમાં વધુ વધારો થવાની શક્યતા હોવાને કારણે લોકોને સાવચેત રહેવાની સલાહ આપવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ