ક્રાઈમ / સુરતમાં ડબલ મર્ડરના આરોપી શિવા ટકલા પર પોલીસનું ફાયરિંગ, હુમલો કરી ભાગવાનો પ્રયાસ, હોસ્પિટલમાં દાખલ

સુરત શહેરમાં ફરી એક વખત ગુનાહિત જગતની હિંસક હકીકત સામે આવી છે. ગોડાદરા ડબલ મર્ડર કેસના મુખ્ય આરોપી અને કુખ્યાત બુટલેગર શિવા ટકલા પર પોલીસને ફાયરિંગ કરવાની ફરજ પડી છે. દેવત ગામ પાસે થયેલી આ ઘટનાએ સમગ્ર વિસ્તારમાં ચકચાર મચાવી દીધી છે. પોલીસના જણાવ્યા મુજબ, શિવા ટકલા ઝડપથી ભાગવાનો પ્રયાસ કરી રહ્યો હતો અને તેણે પોલીસ પર હુમલો કરવાની કોશિશ કરી, જેના કારણે સ્વબચાવમાં ગોળી ચલાવવી પડી.

પોલીસને મળેલી માહિતી અનુસાર, લાંબા સમયથી ફરાર રહેલો શિવા ટકલા સુરતના દક્ષિણ વિસ્તારમાં છુપાયો હોવાની જાણ થતાં ક્રાઈમ બ્રાન્ચની ટીમ તેને પકડવા માટે રવાના થઈ હતી. દેવત ગામ નજીક જ્યારે પોલીસે તેને ઘેરવાનો પ્રયાસ કર્યો ત્યારે શિવા ટકલા અચાનક ઉશ્કેરાયો અને પોલીસ કર્મચારીઓ પર હુમલો કરવા દોડી ગયો. પરિસ્થિતિ કાબૂમાં લેવા માટે પોલીસે બે રાઉન્ડ ફાયરિંગ કર્યું, જેમાં એક ગોળી શિવા ટકલાના પગમાં વાગી. ફાયરિંગ બાદ ઘટનાસ્થળે અફરાતફરી મચી ગઈ હતી. પોલીસ દ્વારા તરત જ ઘાયલ થયેલા શિવા ટકલાને કાબૂમાં લઈ સુરતની સ્મિમેર હોસ્પિટલમાં સારવાર માટે ખસેડવામાં આવ્યો છે. હોસ્પિટલમાં ભારે પોલીસ બંદોબસ્ત ગોઠવવામાં આવ્યો છે જેથી કોઈ અનિચ્છનીય ઘટના ન બને.

આ સમગ્ર કેસની પૃષ્ઠભૂમિ અત્યંત ભયાનક છે. 1 ડિસેમ્બરના રોજ સુરતના ગોડાદરા વિસ્તારમાં માત્ર 20 હજાર રૂપિયાની ઉઘરાણી માટે શિવા ટકલા અને તેના સાગરીતોએ ત્રણ યુવકોનું અપહરણ કર્યું હતું. તેમને લાકડાના ફટકા, લોખંડના સળિયા અને લાતો-બૂટથી નિર્દયતાપૂર્વક માર મારવામાં આવ્યો હતો. આરોપીઓએ પીડિતોને “કોઈને મોઢું બતાવવા લાયક નહીં રાખીએ” તેવી ધમકી આપી તેમની અડધી વાળ, મૂછ અને આંખની ભ્રમર અસ્તરાથી કાપી નાખી હતી. આ અમાનુષી અત્યાચાર સહન ન થતા 22 વર્ષીય સોએબ શેખનું ઘટનાસ્થળે જ મોત નીપજ્યું હતું, જ્યારે બીજા યુવક નાઝીમની લાશ બાદમાં મહારાષ્ટ્રની સરહદ પરથી મળી આવી હતી. આ ડબલ મર્ડર કેસે સમગ્ર સુરત અને ગુજરાતને હચમચાવી દીધું હતું. પોલીસે આ કેસમાં અગાઉ બે આરોપીઓની ધરપકડ કરી હતી, પરંતુ મુખ્ય આરોપી શિવા ટકલા લાંબા સમયથી ફરાર હતો.

પોલીસના જણાવ્યા પ્રમાણે, શિવા ટકલા એક કુખ્યાત બુટલેગર છે અને તેના વિરુદ્ધ અનેક ગુનાહિત કેસ નોંધાયેલા છે. તેની ધરપકડ માટે અનેક વખત ટીમો રચાઈ હતી. અંતે આજે જ્યારે તેને રિકન્સ્ટ્રક્શન માટે લઈ જવાઈ રહ્યો હતો ત્યારે તેણે પોલીસની પકડમાંથી છૂટીને ભાગવાનો પ્રયાસ કર્યો, જેના પરિણામે ફાયરિંગ કરવું પડ્યું. આ ઘટનાને લઈને સુરત પોલીસના ઉચ્ચ અધિકારીઓએ જણાવ્યું છે કે કાયદો અને વ્યવસ્થા જાળવવા માટે પોલીસ સંપૂર્ણ રીતે પ્રતિબદ્ધ છે. કોઈ પણ આરોપી કાયદાથી ઉપર નથી. શિવા ટકલા સ્વસ્થ થયા બાદ તેને કોર્ટમાં રજૂ કરી વધુ તપાસ કરવામાં આવશે.

વધુ વાંચો: સિડની એટેકમાં નવો જ વળાંક, સામે આવ્યું ભારતીય પાસપોર્ટ કનેક્શન! જાણો કેમ

શહેરમાં આ ઘટનાના પગલે લોકોમાં ભય અને ગુસ્સો બંને જોવા મળી રહ્યા છે. સ્થાનિક નાગરિકોનું કહેવું છે કે આવા ગુનાહિત તત્વો સામે કડક કાર્યવાહી જરૂરી છે જેથી આવનારા સમયમાં કોઈ પણ આવી અમાનુષી ઘટના કરવાની હિંમત ન કરે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ