રાજકોટ / સૌરાષ્ટ્ર યુનિવર્સિટીમાં દારૂના અડ્ડા! ઓડિટોરિયમમાંથી 6 અને ટોયલેટમાંથી 9 દારૂની ખાલી બોટલ મળી

Saurashtra University : રાજકોટથી સૌરાષ્ટ્ર યુનિવર્સિટી ફરી એકવાર વિવાદમાં આવી છે. વાસ્તવમાં શિક્ષણ અને સંસ્કાર માટે ઓળખાતા કેમ્પસમાં નશાખોરી જેવી પ્રવૃત્તિઓ સામે આવતાં લોકોમાં ચિંતા વધી રહી છે. વિગતો મુજબ તાજેતરમાં યુનિવર્સિટી કેમ્પસના ઓડિટોરિયમ અને નજીકના ટોયલેટમાંથી કુલ 15 ખાલી દારૂની બોટલો મળી આવી હતી. તેમાં 6 બોટલો ઓડિટોરિયમમાંથી અને 9 બોટલો ટોયલેટમાંથી મળી હોવાનું સામે આવ્યું છે. આ બંને સ્થળો મુખ્ય બિલ્ડિંગથી બહુ નજીક છે અને ગાંધીગ્રામ-2 પોલીસ સ્ટેશનથી પણ અંદાજે 500 મીટરના અંતરે આવેલ છે, જેના કારણે સુરક્ષા વ્યવસ્થા અંગે પ્રશ્નો ઊભા થયા છે.

મહત્વનું છે કે, યુનિવર્સિટીમાં સાંજના સમય પછી સામાન્ય લોકોના પ્રવેશ પર પ્રતિબંધ છે. છતાં આ પ્રકારની ગેરકાયદેસર પ્રવૃત્તિઓ કેવી રીતે ચાલે છે તે એક મોટો સવાલ છે. યુનિવર્સિટી દ્વારા દર વર્ષે સિક્યોરિટી માટે લાખો રૂપિયાનું ખર્ચ કરવામાં આવે છે, છતાં આવી ઘટનાઓ સામે આવતાં વ્યવસ્થાની અસરકારકતા અંગે શંકા ઊભી થાય છે.

આ પણ વાંચો : તમામ દોષિતોને 5 વર્ષની સજા, 10 વર્ષ બાદ ઉના દલિતકાંડમાં કોર્ટનો મોટો ચુકાદો

વીડિયો વાયરલ થયો અને પછી...

આ મામલો વધુ ગંભીર ત્યારે બન્યો જ્યારે આ ઘટનાનો વીડિયો સોશિયલ મીડિયામાં વાયરલ થયો. વીડિયો બહાર આવ્યા બાદ તાત્કાલિક ખાલી બોટલો હટાવવામાં આવી હતી, જે વધુ શંકા ઊભી કરે છે કે શું આ મુદ્દાને દબાવવાનો પ્રયાસ કરવામાં આવ્યો હતો? આ તરફ યુનિવર્સિટીના કુલપતિ દ્વારા આ સમગ્ર મામલે તપાસના આદેશ આપવામાં આવ્યા છે. હવે જોવાનું એ રહેશે કે આ તપાસમાં શું સામે આવે છે અને જવાબદાર લોકો સામે કઈ કાર્યવાહી થાય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ