ચર્ચાનો વિષય / પ્રદેશ પ્રમુખની પસંદગી હવે ભાજપ હાઈકમાન્ડ માટે બની ગઇ માથાનો દુઃખાવો, કારણ બળવાની બીક!

ગુજરાત ભાજપના પ્રદેશ પ્રમુખની પસંદગી હાઈકમાન્ડ માટે માથાનો દુઃખાવો બની ગઈ છે. પાર્ટીને આશંકા છે કે જો નવુ નામ જાહેર કરવામાં આવશે તો કેટલાક અસંતુષ્ટ લોકો બળવો ઊભો કરી શકે છે. વધુમાં, જો માત્ર જ્ઞાતિ-જાતિ અને પ્રદેશના સમીકરણોનો જ વિચાર કરવામાં આવશે અને મજબૂત નેતૃત્વ લાવવામાં નિષ્ફળતા મળશે, તો 2027ની વિધાનસભા ચૂંટણીમાં મુશ્કેલી ઊભી થઈ શકે છે. આમ આદમી પાર્ટી તો પહેલાથી જ આક્રામક વલણ અપનાવી રહી છે અને પોતાનું સંગઠન મજબૂત બનાવી રહી છે.

ભાજપ માટે વધી રહી છે ચિંતા

ગુજરાત ભાજપના પ્રદેશ પ્રમુખની પસંદગી અનેક વખત ટળી ચૂકી છે. હાલના પ્રમુખ C.R.પાટીલ પોતે પણ ઘણીવાર જાહેરમાં જણાવ્યું છે કે તેઓ હવે આ જવાબદારીમાંથી મુક્ત થવા માંગે છે. પેટાચૂંટણીઓ અને સ્થાનિક સ્વરાજની ચૂંટણીઓના કારણે નિર્ણય લંબાવાયો હતો. હવે જ્યાં નજીકના સમયમાં કોઈ મોટી રાજકીય ઘટના નથી, ત્યારે આગામી થોડા દિવસોમાં નવા પ્રમુખની જાહેરાત થવાની શક્યતા છે.

જાતિ અને પ્રદેશના મુદ્દા પર અટવાયુ છે નામ

જો વાત કરીએ તો , છેલ્લા દોઢેક વર્ષમાં અનેક નામોએ ચર્ચામાં સ્થાન લીધું હતું. પરંતુ ભાજપમાં એવું પણ કહેવાય છે કે જેમના નામોની વધારે ચર્ચા થાય છે, તેઓની પસંદગી કરવામાં આવતી નથી. હાલ અમદાવાદના વેજલપુરના ધારાસભ્ય અમિત ઠાકરનું નામ સૌથી આગળ છે. તેમ છતાં, આ નિર્ણય દિલ્હી હાઈકમાન્ડ માટે સરળ નથી કારણ કે 2027ની વિધાનસભા ચૂંટણીમાં હવે માત્ર અઢી વર્ષ બાકી છે.

સક્ષમ નેતૃત્વની જરૂરિયાત

ભાજપ પાસે હાલ વિધાનસભાની 162 બેઠકો છે અને લોકસભાની 26માંથી 25 બેઠકો. વિરોધ પક્ષોમાં કોંગ્રેસ કમજોર છે અને આપનું પણ કોંગ્રેસ જેવી જ સ્થિતિ છે. છતાં, વિસાવદરની ચૂંટણીમાં ગોપાલ ઇટાલીયાએ ભાજપને હરાવતાં આમ આદમી પાર્ટીનું મોરાલ વધ્યું છે, જેને કારણે ભાજપ થોડું ચિંતિત છે.

મજબુત પ્રદેશ પ્રમુખ શોધવા ખુબ જરૂરી

આગામી વિધાનસભાની આગામી સામાન્ય ચૂંટણીમાં આપ કે કોંગ્રેસ સહીતના કોઈપણ પક્ષ કે અપક્ષ ઉમેદવારો કોઈ ચમત્કાર ન કરી જાય તે માટે પાટિલ જેવા મજબૂત પ્રદેશ પ્રમુખ શોધવા પડશે. ભાજપમાં જ આંતરીક રોષ ન ફેલાય તે માટે જ્ઞાતિ જાતિ તેમજ પ્રદેશને ધ્યાનમાં લેવા પણ જરૂરી છે. આવુ કરવામાં કદાચ મજબુત પ્રમુખ ન મળી શકે.

ભાજપને પણ હવે બળવાની બીક

મજબુત અને યુવાન તેમજ ભણેલા ગણેલા અને ગોપાલ જેવા સામે એગ્રેસિવ થઈ શકે, તેમનો સામનો કરીને તેમના પર હાવી થઈ શકે તેવી પસંદગી કરવાનુ ભાજપ વધુ યોગ્ય ગણશે. જો કે, આવુ કરવામાં જ્ઞાતિ-જાતિ કે પ્રદેશનુ ધ્યાન ન રાખી શકાય અને તેને કારણે પણ ભાજપની નીચેની બન્ને કેડરોમાં અસંતોષ ઉભો થઈ શકે છે. આવા અસંતુષ્ટો ભલે ખુલીને બહાર ન આવે પરંતુ ચૂંટણીમાં તેમની નેગેટિવ ભૂમિકા ભજવે તો વિરોધ પક્ષોને તેનો સીધો ફાયદો થાય.

આ પણ વાંચો : CM ભૂપેન્દ્ર પટેલની અધ્યક્ષતામાં આજે મહત્વની બેઠક, વરસાદ, વાવેતર અને શિક્ષણ વિષયક મુદ્દાઓ પર સમીક્ષા

નવા પ્રમુખની જાહેરાત નજીક

પાર્ટીના મુખ્ય સૂત્રો કહે છે કે આગામી બે અઠવાડિયામાં નવા પ્રદેશ પ્રમુખના નામની જાહેરાત થઈ શકે છે. 2027ની વિધાનસભા ચૂંટણીમાં જીત મેળવવા માટે આ પસંદગી ખૂબ જ નિર્ણાયક બની રહેશે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ