દુર્ઘટના / ગુજરાતમાં એક દિવસમાં 10 લોકોના મોત, દ્વારકામાં 4 ભક્તોના અને અમરેલીમાં 3 ભાઈઓના મોત

Gujarat Accident News : આજે બુધવારનો દિવસ રાજ્યમાં 10 લોકો માટે કાળ સાબિત થયો છે. વિગતો મુજબ અમદાવાદ, અમરેલી, દેવભૂમિ દ્વારકા, વિસનગર અને વડોદરામાં થયેલા પાંચ મોટા અકસ્માતોમાં કુલ 10 લોકોના કરૂણ મોત થયા છે, જ્યારે અનેક લોકો ઇજાગ્રસ્ત થયા છે.

અમદાવાદમાં ડમ્પરની ટક્કરથી મહિલાનું મોત

વિગતો મુજબ મેટ્રો સિટી અમદાવાદના ચાંદલોડિયા વિસ્તારમાં રહેતા ગાયત્રીબેન પ્રજાપતિ પોતાના પતિ સાથે સ્કૂટર પર હોસ્પિટલ જઈ રહ્યા હતા. રસ્તામાં AMCના ડમ્પરે તેમની એક્ટિવાને ટક્કર મારી જેમાં ગાયત્રીબેન રોડ પર પડી ગયા અને ડમ્પરના ટાયર નીચે માથું આવી જતાં સ્થળ પર જ તેમનું મોત થયું. પતિને સામાન્ય ઇજા પહોંચી હતી. આ અકસ્માતે શહેરમાં ભારે ચકચાર મચાવી છે.

અમરેલીમાં કાર અકસ્માતમાં 3 પિતરાઈ ભાઈના મોત

અમરેલી જિલ્લાના બગસરા તાલુકામાં રાત્રિના સમયે એક કાર અકસ્માત સર્જાયો હતો. ઝડપમાં આવી રહેલી કાર ચાલકે નિયંત્રણ ગુમાવતા કાર રોડ પરથી પલટી મારી ખેતરમાં ઘૂસી ગઈ. કારમાં સવાર ચાર પૈકી ત્રણ પિતરાઈ ભાઈઓના ઘટનાસ્થળે જ મોત થયા, જ્યારે એક વ્યક્તિ ગંભીર રીતે ઘાયલ થયો.

લાઠીમાં બોલેરો અને ટ્રાવેલ્સ બસ વચ્ચે ટક્કર

અમરેલી લાઠી તાલુકાના ટોડા ગામ પાસે બોલેરો પિકઅપ અને ખાનગી ટ્રાવેલ્સ બસ વચ્ચે અકસ્માત થયો હતો. બોલેરોમાં સવાર એક વ્યક્તિ ફસાઈ જતા ફાયર વિભાગે તેમને બહાર કાઢી સારવાર માટે ખસેડ્યા. બસમાં સવાર મુસાફરો સુરક્ષિત રહ્યા.

દ્વારકામાં પદયાત્રીઓ પર અજાણ્યા વાહનની ટક્કર

દ્વારકાધીશના દર્શન માટે પગપાળા જઈ રહેલા ભક્તો પર માળિયા-પીપળીયા હાઈવે પર અજાણ્યા વાહને ટક્કર મારી. આ ભયાનક અકસ્માતમાં ચાર પદયાત્રીઓના સ્થળ પર જ મોત થયા જ્યારે એક વ્યક્તિને ગંભીર ઇજા પહોંચતા હોસ્પિટલ ખસેડવામાં આવ્યો છે.

વિસનગરમાં પતિની સામે પત્નીનું મોત

વિસનગર તાલુકાના કાંસા ગામમાં ટ્રકે એક્ટિવાને પાછળથી ટક્કર મારતા પતિ-પત્ની રોડ પર પડી ગયા. ટ્રકનું ટાયર પત્ની ઉપર ફરી વળતાં તેમનું કરૂણ મોત થયું. પતિને સામાન્ય ઇજા થઈ છે. અકસ્માત બાદ ટ્રક ચાલક ફરાર થઈ ગયો હતો અને ઘટનાના CCTV દ્રશ્યો પણ સામે આવ્યા છે.

આ પણ વાંચો : અમદાવાદની સ્કૂલોને બોમ્બથી ઉડાવી દેવાની ધમકી કોણે આપી? સામે આવ્યું આ નામ

વડોદરામાં સગીરનું બાઈક સ્લીપ થતાં મૃત્યુ

વડોદરાના સમા તળાવ નજીક મોડી રાત્રે સગીર યુવક બાઈક ચલાવી રહ્યો હતો. ઝડપી અને બેદરકારીથી બાઈક ચલાવતા તે સ્લીપ થઈ ગયો અને માથામાં ગંભીર ઈજા થતાં સ્થળ પર જ તેનું મોત થયું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ