પ્રચાર માટે લોકો જાતજાતના હથકંડા અપનાવતા હોય છે ત્યારે રાજકોટના આમ આદમી પાર્ટીના એક કાર્યકરે પોતાના લગ્નના માધ્યમ દ્વારા પ્રચાર કરવાનો એક નવો વિકલ્પ શોધી કાઢ્યો છે. હકીકતમાં 9 ડિસેમ્બરે રાજકોટના 34 વર્ષીય પ્રભાત હુંબલેના લગ્ન થવાના છે અને તેમણે લગ્નની કંકોત્રીમાં આમ આદમી પાર્ટીના પ્રચાર માટે સૂત્રો લખાવ્યાં છે.
રાજકોટમાં 'આપ'ની યૂથ વિંગના પ્રમુખ તરીકે હુંબલ છે અને તેમના લગ્ન 9 ડિસેમ્બરે થશે.
આમ આદમી પાર્ટીને વોટ આપો- મહેમાનોને કરી વિનંતી
રિયલ એસ્ટેટના બિઝનેસમેન એવા આ વરરાજાએ જણાવ્યું હતું કે આપ રાજકોટના સ્થાપક સભ્ય તરીકે તેઓ આમંત્રિતોને તેમના રાજકીય ઝુકાવ અને શા માટે તેમણે પક્ષને ટેકો આપવો જોઈએ તે વિશે વાકેફ કરાવવા ઈચ્છે છે તેથી તેમણે વેડિંગ કાર્ડ (કંકોત્રી)માં આપના પ્રચાર માટેના સૂત્રો લખ્યાં છે કે આમ આદમી પાર્ટીને વોટ આપવો જોઈએ.
શું છે હુંબલના લગ્નના કાર્ડ અને કવરમાં
હુંબલના લગ્નના કાર્ડ અને કવરમાં 'આપ'નું પાર્ટીનું ચિહ્ન છે અને તેમનું નિવેદન છે કે તેમનો પરિવાર 'આપ'ને મત આપશે. તેમણે જણાવ્યું હતું કે, આમંત્રણ પત્રિકાઓ તેમના પરિવાર દ્વારા 35થી 40 ગામોમાં વહેંચવામાં આવશે અને તેઓ આ પ્રસંગનો ઉપયોગ આમંત્રિતોને આપને મત આપવા વિનંતી માટે કરશે.
હુંબલ પરિવારે પણ સોશ્યલ મિડિયા પર કંકોત્રી શેર કરી
હુંબલ પરિવારે સોશ્યલ મિડિયા પર આ આમંત્રણ પત્રિકા મૂકી હતી અને એને જબરદસ્ત પ્રતિસાદ મળ્યો હતો. આપના નેતાઓએ કાર્ડની છબીઓ ટ્વીટ કરી છે અને પ્રભાતને વ્યક્તિગત રૂપે ફોન કરીને અભિનંદન પાઠવ્યા છે. સોશિયલ મીડિયા પર આ કાર્ડ જોનારા લોકો તરફથી પણ તેને સકારાત્મક પ્રતિસાદ મળ્યો છે. હુંબલને આશા છે કે આ કાર્ડને મળેલા જબરદસ્ત પ્રતિસાદને જોતાં મોટી સંખ્યામાં લોકોને 'આપ'ને મત આપવા માટે મનાવી શકશે.
વાયરલ થઈ આપના પ્રચારવાળી લગ્નની કંકોત્રી
વાયરલ થયેલા લગ્નના કાર્ડના જવાબમાં તેને 5૦૦ થી વધુ કોલ અને સંદેશા મળી ચૂક્યા છે. હુંબલના સાસુ-સસરાએ પણ આ પ્રયાસની પ્રશંસા કરી છે અને તેમના આમંત્રિતોને આમંત્રણ પત્રિકાઓ આપે ત્યારે 'આપ'ને મત આપવા વિનંતી કરવાની યોજના બનાવી છે.