કાર્યવાહી / નવસારી જિલ્લામાં આશ્રમ શાળામાં વિદ્યાર્થીની સાથે અડપલા, પોક્સો હેઠળ ડાયરેક્ટરની ધરપકડ

નવસારી જિલ્લામાં શિક્ષણ ક્ષેત્રને કલંકિત કરતો એક ગંભીર બનાવ સામે આવ્યો છે. મહુવાસ ગામની એક આશ્રમ શાળાની હોસ્ટેલમાં રહેતી ધોરણ 11 સાયન્સમાં ભણતી વિદ્યાર્થીની સાથે સંસ્થાના ડાયરેક્ટર દ્વારા અડપલા કરાયા હોવાનો આક્ષેપ થયો છે.

વિદ્યાર્થીનીને ઓફીસમાં બોલાવી શારીરિક અડપલા કર્યા

માહિતી અનુસાર, હોસ્ટેલની વિદ્યાર્થીની પાસે મોબાઇલ મળતા વોર્ડને તે મોબાઇલ જપ્ત કર્યો હતો. ત્યારબાદ મોબાઇલ સંસ્થાના ટ્રસ્ટીના પુત્ર અને ડાયરેક્ટર દિશાંત ઠાકોરને સોંપવામાં આવ્યો હતો. આરોપ છે કે દિશાંત ઠાકોરે વિદ્યાર્થીનીને તપાસના બહાને ઓફિસમાં બોલાવી શારીરિક અડપલા કર્યા.

પોલીસે ડાયરેક્ટરની ધરપકડ કરી

વિદ્યાર્થીનીએ આ ઘટનાની જાણ માતાને કરતાં માતાએ વાંસદા પોલીસ મથકમાં ફરિયાદ નોંધાવી હતી. પોલીસ દ્વારા ફરિયાદના આધારે પોક્સો એક્ટ હેઠળ ગુનો નોંધવામાં આવ્યો છે અને સંસ્થાના ડાયરેક્ટરની ધરપકડ કરવામાં આવી છે.

આ પણ વાંચોઃ હોળી પહેલા AMCનો ફૂડ વિભાગ એક્શનમાં, સ્કૂલ અને 22 એકમોમાં ચકાસણી

સ્થાનિકોમાં રોષ

આ ઘટનાએ આશ્રમ શાળાઓમાં ભણતી દીકરીઓની સુરક્ષા અંગે ગંભીર પ્રશ્નો ઉભા કર્યા છે. સ્થાનિકોમાં રોષ વ્યાપ્યો છે અને સંસ્થાની કામગીરી અંગે પણ તપાસની માંગ ઉઠી રહી છે. પોલીસ દ્વારા વધુ તપાસ હાથ ધરવામાં આવી છે અને સંબંધિત તથ્યો એકત્રિત કરવામાં આવી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ