અમદાવાદ / હોળી પહેલા AMCનો ફૂડ વિભાગ એક્શનમાં, સ્કૂલ અને 22 એકમોમાં ચકાસણી

હોળીના તહેવાર પૂર્વે ખાદ્ય પદાર્થોમાં ભેળસેળ કરવામાં આવતી હોઈ અમદાવાદ મ્યુનિસિપલ કોર્પોરેશન (AMC)ના ફૂડ વિભાગે શહેરભરમાં ખાસ ચકાસણી અભિયાન હાથ ધર્યું છે. તહેવાર દરમિયાન વધતા ખાદ્ય પદાર્થોના વેચાણને ધ્યાનમાં રાખીને વિવિધ શાળાઓ અને ખાદ્ય એકમોમાંથી નમૂનાઓ લેવામાં આવ્યા હતા.

સ્કૂલમાંથી મધ્યાહન ભોજનના નમૂના લીધા

ફૂડ વિભાગે AMC સંચાલિત શાળાઓમાં આપવામાં આવતા મધ્યાહન ભોજનની ગુણવત્તા ચકાસવા માટે જામાલપુર વિસ્તારમાં આવેલી મ્યુનિસિપલ શાળા નંબર 5 અને જામાલપુર ઉર્દૂ શાળા નંબર 5માંથી નમૂનાઓ લીધા હતા. બંને શાળાઓમાંથી સુખડી અને રોટલીના સેમ્પલ લેવામાં આવ્યા હોવાનું જાણવા મળે છે.

ખાણીપીણીની દુકાનમાંથી પણ નમૂના લીધા

આ ઉપરાંત, શહેરના લોકપ્રિય લક્ષ્મી ગાંઠિયા રથમાંથી ગાંઠિયા, જલેબી અને ફાફડાના નમૂનાઓ લેવામાં આવ્યા હતા. આશ્રમ રોડ પર આવેલી ફૂડ ઇન હોટલમાંથી પણ ખાદ્ય પદાર્થોના સેમ્પલ એકત્રિત કરવામાં આવ્યા હતા.

કુલ મળીને શહેરના 22 ખાદ્ય એકમોમાંથી નમૂનાઓ લેવામાં આવ્યા છે. તમામ સેમ્પલને વિગતવાર તપાસ માટે લેબોરેટરીમાં મોકલી આપવામાં આવ્યા છે. રિપોર્ટ આવ્યા બાદ નિયમોનું ઉલ્લંઘન કરનાર સામે યોગ્ય કાર્યવાહી કરવામાં આવશે તેમ ફૂડ વિભાગના સૂત્રોએ જણાવ્યું હતું.

આ પણ વાંચોઃ 'વેશ્યાવૃતિ સમાજ સેવા' ગુજરાતી એક્ટ્રેસ મોના થિબા કનોડિયાએ માફી માગી, જાણો શું કહ્યું

AMCના અધિકારીઓએ નાગરિકોને સ્વચ્છ અને ગુણવત્તાયુક્ત ખાદ્ય પદાર્થોનો ઉપયોગ કરવા તેમજ શંકાસ્પદ ખાદ્ય પદાર્થો અંગે તંત્રને જાણ કરવા અપીલ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ