ઉત્તરાખંડ હોનારત / સીએમ રાવતે કહ્યું, લોકો જુના વીડિયો દ્વારા અફવા ન ફેલાવે

• સીએમ ત્રિવેન્દ્ર સિંહ રાવત ચમોલીના તપોવન વિસ્તારના રેની ગામમાં પહોંચ્યા, સ્થિતિની સમીક્ષા કરી
• ગ્લેશિયર હોનારત પર લોકોને અફવા ન ફેલાવવાની સીએમ ત્રિવેન્દ્ર સિંહ રાવતની અપીલ 
• કૃપા કરીને ઘટના અંગે જુના વીડિયો દ્વારા અફવા ન ફેલાવો- રાવત

ગ્લેશિયર હોનારત પર લોકોને અફવા ન ફેલાવવાની અપીલ કરતા ઉત્તરાખંડના સીએમ ત્રિવેન્દ્ર સિંહ રાવતે જણાવ્યું કે સરકારે કેટલાક હેલ્પલાઈન નંબર જારી કર્યાં છે. તેમણે કહ્યું કે જો તમે અસરગ્રસ્ત વિસ્તારમાં ફસાયા હોય અને કોઈ પણ પ્રકારની મદદની જરુર હોય તો તમે 1070 અથવા  9557444486 પર સંપર્ક સાધી શકો છો. કૃપા કરીને ઘટના અંગે જુના વીડિયો દ્વારા અફવા ન ફેલાવો. ત્યાં એનડીઆરએફના 200 જવાનોને મોકલાયા છે, ગભરાવાની કોઈ જરુર નથી. 

રાહત કાર્ય પૂરજોશમાં 

પ્રાથમિક માહિતી અનુસાર, આ હોનારતથી 10,000 લોકો પ્રભાવિત થયાં હોવાની પણ માહિતી મળી રહી છે. તેમાં એવા લોકો પણ છે જે નદીના કાંઠે રહેતા હતા. વળી, એવા મજૂરો પણ છે જે ડેમમાં કામ કરતા હતા. આઇટીબીપી ઉત્તરાખંડ પોલીસ નેશનલ ડિઝાસ્ટર રિલીફ ફોર્સ અને સ્ટેટ ડિઝાસ્ટર રિલીફ ફોર્સની ટીમ સ્થળ પર રવાના થઈ છે.

શું બની ઘટના? 

ઉત્તરાખંડમાં ફરી એક વાર કુદરતી કોપ સર્જાયો છે. રાજ્યના ચમોલીના રેણી ગામ નજીક એક મહાકાય ગ્લેશિયર(હિમશીલા) તૂટી પડતા ભારે ખાનાખરાબી સર્જાઈ હતી. હિમશીલા તૂટી પડવાને કારણે ચમોલીના જોશીમઠ વિસ્તારની ધોળીગંગા  નદીમાં ઘોડાપૂર આવ્યું હતું.  સૌથી વધારે તબાહી ઋષિગંગા પાવર પ્રોજેક્ટની થઈ હતી.પાવર પ્રોજેક્ટમાં કામ કરતા 100-150 લોકો લાપત્તા થયા છે તથા અત્યાર સુધી 10 લોકોની લાશ મળી આવી છે. સ્થાનિક વહીવટી તંત્રને સમાચાર મળતા જ ઘટના સ્થળે રાહત કામગીરી પહોંચાડવા તજવીજ હાથ ધરી હતી. આ ઘટનાને પગલે સ્થાનિકોના ઘરને મોટાપાયે નુકસાન પહોંચ્યું છે.